JUKʼAMP YATJJATAÑATAKI RECUADRO 19B
Mä jiskʼa jawirajj jachʼaruw tukjje
Diosan templopat mistki uka jiskʼa jawir lado Ezequielajj sari, uka jawirajj mä qhawqha kilometronakwa jachʼa jawirar tukjje, ukhamätapajj mä milagrowa. Uka jawir ladonakan Ezequielajj walja jachʼa qoqanakwa uñji, ukanakajj manqʼañanak utjayi, qollarakiwa. ¿Taqe ukanakajj kunamp sasisa?
Walja bendicionanak apanir jawira
NAYRA TIEMPONA: Jerusalenar kuttʼapkäna uka judionakarojja, templon jukʼat jukʼat Diosar adorjjapjjäna ukarjamaw Jehová Diosajj jupanakar bendisïna
JICHHA TIEMPONA: 1919 maranwa Dios saparuk adorañajj mayamp qalltawayi, ukhamatwa Diosat jan jitheqtirinakajj nayrat sipansa jukʼamp bendicionanak katoqapjje
JUTÏR TIEMPONA: Armagedón guerra pasatatjja, Jehová Diosan bendicionanakapajj jupar serviñatakiw yanaptʼistani, promesanakap phoqasirsa uñjarakiñäniwa
Jakañ churir uma
NAYRA TIEMPONA: Jehová Diosajj istʼasiri markaparojj wal bendisïna, ukatwa markankirinakajj jiljjattapkäna ukhas Diosar serviskakiñatakejj kunayman yanaptʼanak katoqapjjäna
JICHHA TIEMPONA: Jichha tiempon mä paraisons Diosar sirvksna ukhamawa, ukanjja Jehová Diosan walja bendicionanakap katoqtanjja, markapajj jiljjattaskchisa Diosan bendicionanakapajj jiljjattarakiwa
JUTÏR TIEMPONA: Armagedón guerra qhepatjja walja millón jaqenakaw jiwatat jaktanipjjani, Jehová Diosasti taqeniruw jilarkir bendisirakini
Manqʼañanak utjayiri qolliri qoqanaka
NAYRA TIEMPONA: Diosat jan jitheqtirinakajj Jerusalenar kuttʼjjapjjäna marksa askichjjapjjarakïna ukhajja, Diosajj jupar servisipkakiñapatakiw wal yanaptʼäna, jan walinak jaytapjjañapatakis yanaptʼarakïnwa
JICHHA TIEMPONA: Diosajj Biblian yatichäwinakapampiw walja jaqenakar yanaptʼaski, ukanakaw servirinakaparojj jupar servisipkakiñapatakisa, juchanakat jitheqtapjjañapatakisa, aka jan wali pachan amuyunakap apanukupjjañapatakis yanaptʼi
JUTÏR TIEMPONA: Jesucristompi 144.000 ajllitanakamp apnaqapkani ukhajja, istʼasiri jaqenakarojj perfector tukupjjañapataki, kʼumaräjjapjjañapataki, chʼamanïpjjañapatakiw yanaptʼapjjani, ¡ukajj wiñayatakïniwa!
