JUKʼAMP YATJJATAÑATAKI RECUADRO 1B
Kuna toqenakatsa Ezequiel librojj parli
Ezequiel libronjja, aka toqenakatwa parli:
CAPÍTULOS 1-3
Judionakajj Babiloniar apatäpkäna ukanakamp chika jakkasajja, Ezequielajj 613 antes de Cristo (a.C.) maranwa visionanak Jehová Diosat katoqäna, ukatsti Kebar jawir jakʼan jakapkäna uka judionakan ukaruw profetat sarañaparakïna.
CAPÍTULOS 4-24
613 a.C. marat 609 a.C. marakamajja, jilapartejj Jerusalén contraw Ezequielajj profecianak arsüna. Jerusalén markankirinakajj jan istʼasiri, idolonakar adoriri ukhamäpjjänwa, ukatwa uka profecianakat jilapartejj Jerusalén marka conträna.
CAPÍTULOS 25-32
609 a.C. marat qalltasajja, mä arun babilonionakajj Jerusalenar qhep qhepa kutin muyuntañ qalltapkäna ukhajja, Ezequielajj janiw Jerusalén contra juchañchir profecianak arsjjänti, jan ukasti Israel marka jakʼanakankapkäna uka enemigo markanak contraw profecianak arsjjäna, uka markanakajj Ammón, Edom, Egipto, Filistea, Moab, Sidón, Tiro ukanakänwa.
CAPÍTULOS 33-48
606 a.C. marat qalltasajja Ezequielajj suma arunakwa yatiyjjäna, mä arunjja kunjamsa Jehová Diosar mayamp sum adorasjjani uka toqetwa parläna. Uka tiemponjja Jerusalenampi templompejj qʼala tukjatänwa, Babiloniat wali jayankarakïnwa.
Ezequiel librojj kunas nayraqat pasäna ukjjarojj kunas pasarakïna ukarjam qellqatawa, ukatsti kuna toqetsa parli ukarjam jaljatarakiwa. Nayraqatjja Jerusalenampi templompejj kunjam tukjatänisa ukaw qhanañchasi, ukjjarusti kunjamsa Diosaruk adorasjjani ukaw jila parte profecianakan qhanañchasiraki. Ukhamätapajj wali wakiskiriwa, nayraqatjja Diosar templon adorañajj kunjamsa chhaqtani uka toqetwa parli, ukjjarusti kunjamsa Jehová Diosaruk adorasjjani uka toqetwa parlaraki.
Ukhamarusa, Israel marka jakʼanakankir enemigo markanak contra arsuskäna uka profecianakajja (capítulos 25-32), Jerusalén contra juchañchir profecianak qhepatwa arsusïna, ukjjarojj kunjamsa Jehová Diosaruk adorasjjani ukaw arsusirakïna. Ezequielajj Israel marka jakʼanakankir markanak contra profecianak arskäna uka toqetjja, yatjjattʼat mä jaqejj akham sänwa: “Diosajj markap contra colerasisajj kunanaksa arsüna, ukatsti kunjamsa markapat khuyaptʼayasirakïna ukajj suma qellqatawa. Diosajj markapar salvañatakiw enemigo markanakarojj castigäna” sasa.
