Ezequiel 23 capitulonjja, kunjamsa yaqha diosanakar adoriri markaparojj Diosajj juchañchäna ukaw qellqata. Uka capitulojja 16 capitulompejj niya pachpakiwa. Paypach capitulonakanwa prostituta pä kullakanakat parli. Samaria markajj jilïrïkaspasa Jerusalén markajj sullkïrïkaspas ukhamaw qhanañchasi. Uka capitulonakanjja, kunjamsa jilïr kullakapat yateqasisajj sullkïr kullakajj prostitutjam sarnaqe uka toqetwa parli. Ukampis jilïrit sipansa, sullkïriw jukʼamp qʼañu juchanak luräna. Diosajja 23 capitulonwa kamsatäpjjes uk qhanañchi: Jilïrejj Oholá satawa, ukajj Israelan (tunka tribunaka) capitalapäki uka Samaria markampi sasiwa; sullkïrejj Oholibá satawa, ukajj Judá (pä tribunaka) markan capitalapäki uka Jerusalén markamp sasirakiwa (Ezeq. 23:1-4). *

Ezequiel 16, 23 capitulonakajja yaqha toqenwa niya pachpakïpjjaraki. Inas ukanakajj jukʼamp importantëchi. Qalltanjja, uka markanakajj Jehová Diosan esposapäkaspasa ukhamaw qhanañchasi, ukampis Diosar jaytasajj prostituta warminakjamaw qhepat sarnaqapjjäna. Ukatjja paypach capitulonakanwa uka markanakatakejj suytʼäwejj utji. 16 capitulonjja kunjamsa Diosajj markapar perdonañ amti ukajj wali qhanawa, ukampis 23 capitulonjja janiw ukhamäkiti. Ukhamäkchisa kunjamsa Diosajj markapan prostitutjam sarnaqatap chhaqtayani, ukwa mä promesan arsu (Ezeq. 16:16, 20, 21, 37, 38, 41, 42; 23:4, 11, 22, 23, 27, 37).

Nayrajja Oholá, Oholibá warminakajj cristianöpjjtwa sapki uka religionanakamp sasiwa sasaw qellqatanakasajj qhanañchäna, mä arunjja religión catolicampi protestante religionampis uka warminakäkaspa ukhamaw qhanañchasïna. Ukampis Jehová Diosar wal orasisasa, jukʼamp yatjjatasasa aka jisktʼanakaw utjawayi: ¿cristianöpjjtwa sapki uka religionanakajj Diosan esposapäpjjarakïnti? ¿Diosampis mä pacto lurapjjarakïnti? ¡Janiwa! Jehová Diosajj jupan Israelapamp Jesús taypi ‘mä machaq pacto’ lurkäna ukhajja, cristianöpjjtwa sirinakajj janïraw utjkänti, ukhamarus janipuniw kunapachas ajllit cristianonak taypinkapkänti (Jer. 31:31; Luc. 22:20). Apostolonakajj jiwjjapjjäna uka qhepatwa cristianöpjjtwa sirinakajj utjaskäna. Jupanakajj 300 mara qhepatwa Dios contra saytʼiri, jan walinak luriri mä organizacionjam uñstäna. Cristianöpjjtwa sirinakajja, Jesusajj mä profecian trigompita jan wali qorampit parlkäna uka “jan wali qorampi” sasipjjewa (Mat. 13:24-30).

Maysa toqetsti Jehová Diosat jitheqtiri Jerusalén markarusa Samaria markarusa, Diosajj perdonañatak mä suytʼäwi churäna (Ezeq. 16:41, 42, 53-55). Ukampis cristianöpjjtwa siri religionanakatakejj janiw Biblian mä suytʼäwejj utjkiti, jupanakajj Jachʼa Babiloniamp chikaw tukjatäpjjani.

Ukhamasti Oholá, Oholibá warminakajj janiw cristianöpjjtwa sapki ukanakamp saskiti. Ukampis cristianöpjjtwa sapki ukanakan utjatapajja, Jehová Diosan sutip jiskʼachapki ukanakarusa Diosar adorañatak leyinakar jan istʼapki ukanakarusa, kunjamsa Diosajj uñji ukwa uñachtʼayistu. ¿Kunatsa cristianöpjjtwa sirinakajj wali juchanïpjjaraki? Taqpach religionanakapajj Bibliajj parlki uka Diosarus adorapkaspa, Jehová Diosan Jesucristo munat yoqapas jupanakar pʼeqtʼkaspa ukhamwa sapjje. Ukampis jupanak pachpaw Jesusajj kimsa diosanakat maynïrïkaspas ukham yatichapjje, Jesusajj ‘aka mundot’ jitheqtapjjam siski uka ewjjtʼarus janiw istʼapkiti (Juan 15:19). Jupanakajj idolonakaruw adorapjje, sapa kutiw politicar mitisipjjaraki, ukatwa ‘jachʼa prostitutamp’ saski uka religionanak taypinkapjje (Apoc. 17:1). Ukatwa falso religionanakamp chika tukjatäpjjani.