¿Kunjamsa jichhajj amuyasjje?
Nayrajja Ezequielan profecianakapat jilapartejj janiw kunjamtï jichhajj amuyaski ukham amuyaskänti. Ukampis aka qhepa maranakanjja Yatiyañataki revistajj uka profecianak jukʼamp sumwa qhanstayawayi. Jehová Diosarukiw oraqpachan adorasjjani sat aka libronjja, Ezequielan profecianakapat jukʼamp qhanañchäwinakaw utji. Jichhajj aka jisktʼanakan qhanañchäwip amtañäni:
¿Ezequielajj visionan uñjkäna uka angelanakan pusi ajanunakapajj kunsa uñachtʼayi?
¿Kunjamas nayrajj amuyasïna? Sapa querubín angelanakan pusi ajanunakapajja, Jehová Diosan jukʼamp jilankki uka pusi cualidadanakapat may uñachtʼayi.
¿Kunjamas jichhajj amuyasjje? Querubín angelanakan pusi ajanunakapajj Jehová Diosan jukʼamp jilankki uka pusi cualidadanakapampi saskchisa, taqpach ajanunakajj Jehová Diosan taqpach cualidadanakapampi sasiwa. Janiw ukakïkiti, uka pusi ajanunakajj Jehová Diosajj wali chʼamanïtapa wali jachʼätapwa uñachtʼayaraki.
¿Kunatsa ukham amuyasjje? Biblianjja pusi sasajj taqpacha jan ukajj phoqata sañatakiw jilapartejj apnaqasi. Ukhamasti kunapachatï taqpach pusi ajanunakajj juntuk uñstki ukhajja, Jehová Diosan taqe cualidadanakapampi sasiwa. Uka kimsa animalanakampina jaqempina ajanunakapajja, jupanakajj wali chʼamanïpjjatapa wali musparkañäpjjatapwa uñachtʼayi. Querubinanakan uñstkäna uka pusi ajanunakajja, Jehová Diosan tronop manqha toqenkapjjewa. Ukhamätapajja Jehová Diosajj Taqe Kunjjar Apnaqerïtapwa uñachtʼayi.
¿Secretarion tinta apnaqañ cajitapanïki uka chachajj khitimp sasisa?
¿Kunjamas nayrajj amuyasïna? Secretarion tinta apnaqañ cajitapanïki uka chachajja, aka oraqenkasipki uka ajllit cristianonakampi sasiwa. Jupanakajj jaqenakar predicasa Jesusan arkiripar tukuyasaw ‘walja jaqenaka’ sasin uñtʼatäpki ukanakan paraparojj mä marca uchasipki (Apoc. 7:9).
¿Kunjamas jichhajj amuyasjje? Secretarion tinta apnaqañ cajitapanïki uka chachajja, Jesucristomp sasiwa. Jupaw ‘jachʼa tʼaqesiñ tiempon’ khitinakatï ‘walja jaqenakjam’ uñtʼatäpki ukanakarojj ovejanakäpkaspas ukham mä marca uchani (Mat. 24:21).
¿Kunatsa ukham amuyasjje? Jehová Diosaw Yoqaparojj jaqenakar juzgañapatak uttʼayi (Juan 5:22, 23). Mateo 25:31-33 textorjamajja, Jesusaw khitinakas ‘ovejanakäpjjani’ khitinakas ‘cabranakäpjjarakini’ uk amtjjani.
¿Oholá, Oholibá prostitutanakajj cristianöpjjtwa sapki uka religionanakamp sasiti? ¿Uka prostituta warminakajj religión catolicampi religión protestantempi sasiti?
¿Kunjamas nayrajj amuyasïna? Oholá warmejja (Samaria, Israel markan capitalapa) jilïr kullakawa, religión catolicampi sasiwa; Oholibá warmisti (Jerusalén, Judá markan capitalapa) sullkïr kullakawa, religión protestantempi sasirakiwa.
¿Kunjamas jichhajj amuyasjje? Uka pä prostituta warminakajja, janiw cristianöpjjtwa sapki uka religionanakampi saskiti. Antisas uka prostitutanakat parlasitapajja, Diosan servirinakapajj yaqha diosanakar adorapki ukhajj kunjamakis Jupajj jikjjatasi uk amuytʼañatakiw yanaptʼistu. Falso religionanakajja, Jehová Diosatakejj uka prostituta warminakjamawa.
¿Kunatsa ukham amuyasjje? Bibliarjamajja janiw Oholá, Oholibá prostituta warminakajj cristianöpjjtwa sapki uka religionanakamp saskaspati. Israel markasa Judá markas Jehová Diosat jan jitheqtiri markanakäpjjänwa, ukampis cristianöpjjtwa sapki uka religionanakajj janiw kunapachas Jehová Diosar serviwayapkiti. Janiw ukakïkiti, Ezequiel libron 16, 23 capitulonakanjja, Diosat jitheqtirinakajj prostitutanakampi sasïnwa, ukhamäkchïnsa jupanakajj jan wali luratanakapat perdonatäpjjaspänwa. Ukampis cristianöpjjtwa sapki uka religionanakarojja, janipuniw kunapachas Diosar kuttʼjjapjjañapatakejj mä suytʼäwejj churasiwaykiti.
¿Apostatar tukkäna uka Jerusalenajj cristianöpjjtwa sapki uka religionanakamp sasiti?
¿Kunjamas nayrajj amuyasïna? Jehová Diosat jitheqtkäna uka Jerusalén markajj cristianöpjjtwa sapki uka religionanakamp sasiwa. Uka markan tʼunjasitapajja, kunjamsa cristianöpjjtwa sapki uka religionanakarojj tʼunjasini ukwa uñachtʼayi.
¿Kunjamas jichhajj amuyasjje? Jehová Diosat jitheqtkäna uka Jerusalén markajja, idolonakaru ukhamarak yaqha diosanakaruw adoräna, kunayman jan walinakwa lurarakïna. Ukajja kuna jan walinaktï cristianöpjjtwa sapki uka religionanakajj lurapki ukwa amtayistu. Ukampis Jerusalenajj cristianöpjjtwa sapki uka religionanakamp sasiwa sasajj janiw jichhajj amuyjjtanti.
¿Kunatsa ukham amuyasjje? Amuyatajja, Bibliarjamajj janiw Jerusalenajj cristianöpjjtwa sapki uka religionanakamp saskaspati. Jerusalén markajj Jehová Diosarukiw adoräna, ukampis cristianöpjjtwa sirinakajj janiw kunapachas Diosar adorawayapkiti. Janiw ukakïkiti, Diosajj Jerusalén markar perdonänwa, ukampis cristianöpjjtwa sapki uka religionanakar janiw kunapachas Diosajj perdonkaniti.
¿Chʼakhanakamp phoqantat mä valle Ezequielajj visionan uñjkäna ukajj kunjamas phoqasiwayi?
¿Kunjamas nayrajj amuyasïna? 1918 maranjja ajllitanakajj arknaqataw uñjasipjjäna, Jachʼa Babiloniamp apnaqatäjjarakïnwa. Ukhajj janiw Diosan arunakap yatiyjjapjjänti, jiwatäpkaspas ukhamänwa. Ukampis 1919 maranwa Diosajj jupanakar jaktaykaspas ukhamäna, ukhaw Reinon yatiyäwinakap yatiyañ qalltapjjarakïna.
¿Kunjamas jichhajj amuyasjje? Cristianonakajj janïr 1918 maräkipanwa Jachʼa Babiloniampi apnaqat uñjasipjjäna, ukatwa jupanakajj 100 después de Cristo (d.C.) marat qalltasajj 1919 marakamajj jiwatäpkaspas ukhamäna. Ukajj kuntï Jesusajj trigompit jan wali qorampit parlkäna ukar uñtasitawa, ukarjamajj trigompina jan wali qorampin poqorañapkamajj walja tiempow pasañapäna.
¿Kunatsa ukham amuyasjje? Israel markajja 740 marat 537 antes de Cristo marakamaw yaqha markar apat uñjasïna. Ezequielan profeciaparjamajja, uka chʼakhanakajj ‘qʼala wañsutänwa’, ukhamätapajj uka jaqenakan walja tiempo jiwatäjjapjjatapwa uñachtʼayi. Kunapachatï Bibliajj chʼakhanakajj wasitatwa jakapjjäna sasin siski ukhajja, jukʼat jukʼat jaktañatwa parlaski.
¿Pä lawanakan mayakëjjatapajj kamsañs muni?
¿Kunjamas nayrajj amuyasïna? Primera Guerra Mundialanjja, aka oraqenkir ajllitanakajj mä jukʼa tiempojj tʼaqanoqtatäpjjänwa, ukampis 1919 maranwa wasitamp mayachthapisipjjäna.
¿Kunjamas jichhajj amuyasjje? Uka profeciarjamajja, Jehová Diosakiw servirinakapar mayachthapini. Aka oraqen jakañ suyasipki ukanakajj jukʼat jukʼatwa waljaptasipki, jupanakajj 1919 marat aksaruw ajllitanakamp mayachtʼasiwayapjjaraki. Uka pä gruponakajj mayachtʼataw Jehová Diosar adorapjje.
¿Kunatsa ukham amuyasjje? Uka profeciajj janiw payar partjat mä lawaw mayachthapisi sasajj siskiti. Ukhamajj janiw mä grupojj tʼaqanoqtasin mayampiw mayachthapisi sañ munkiti, antisas pä gruponakaw mayachthapisini sañwa muni.
¿Magog oraqenkiri Gog satäki ukajj khitisa?
¿Kunjamas nayrajj amuyasïna? Magog oraqenkiri Gog satäki ukajj Supayawa sasaw alajjpachat jaqoqanitäkäna ukhat aksarojj amuyasi.
¿Kunjamas jichhajj amuyasjje? Magog oraqenkir Gog satäki ukajja, jachʼa tʼaqesiñ tiempon Diosan servirinakapar atackani uka mayachtʼat markanakäniwa.
¿Kunatsa ukham amuyasjje? Gog satäki uka toqet parlir profeciajja, aycha manqʼani jamachʼinakar katuyatäniwa, aka oraqen mä sepultura churatarakïniwa sasaw qhanañchi. Ukhamätapaw Gog satäki ukajj jan mä angelätap uñachtʼayi. Janiw ukakïkiti, kunjamsa Gog satäki ukajj Diosan markapar atacani uka pachpwa Daniel, Apocalipsis libronakajj qhanañchi (Dan. 11:40, 44, 45; Apoc. 17:14; 19:19).
¿Ezequielajj visionan uñjkäna uka templompi apóstol Pablojj Diosan jachʼa templopat qhanañchkäna ukampejj pachpakiti?
¿Kunjamas nayrajj amuyasïna? Ezequielajj uñjkäna uka templompi walja maranak qhepat apóstol Pablojj Diosan jachʼa templopat qhanañchkäna ukampejj pachpakiwa.
¿Kunjamas jichhajj amuyasjje? Ezequielajj uñjkäna uka templojj janiw Diosan jachʼa templopäkänti (templo espiritual), jan ukasti kunjamas Jerusalenar kuttʼasajj Jehová Dios saparuk adorasjjañapäna ukwa uñachtʼayäna, Moisesan Leyiparjamajj ukhampunwa Diosar adorasiñapäna. Diosan jachʼa templopajj 29 (d.C.) maranwa uttʼayasiskäna. Pablojj Diosan amuytʼayatäsin Diosan jachʼa templopat qhanañchkäna ukanjja, kuntï Jesusajj 29 marat 33 marakam Jachʼa Jilïr Sacerdotjam lurkäna uka toqetwa parli. Ukampis Ezequielajj janiw jachʼa jilïr sacerdotet parlkiti, jan ukasti 1919 marat qalltasajj kunjamsa Jehová Diosaruk adorasjjañapäna uka toqetwa parli. Ukhamasti Ezequielajj visionan uñjkäna uka templon kunanakatï utjkäna ukanakajj kunamp sasisa medidanakapas kunamp sasisa ukanak qhanañchañajj janiw wakiskiti. Jan ukasti, Ezequielan visionapajj Dios saparuk adorañatakejj jupan leyinakap phoqañajj wali wakiskirïtapwa yatichistu.
¿Kunatsa ukham amuyasjje? Ezequielajj uñjkäna uka templompi Pablojj Diosan jachʼa templopat qhanañchkäna ukampejj janiw kikpäkiti. Ezequielajj uñjkäna uka templon walja sacrificionakaw loqtasïna, ukampis Pablojj qhanañchkäna uka templon mä kutikiw sacrificiojj wiñayatak loqtasïna (Heb. 9:11, 12). Ezequielan tiempopanjja mä arun Jesucriston aka oraqer jutañapatakejj walja maranak faltaskäna ukhajja, janïraw Jehová Diosan jachʼa templopat qhanañchasiñapajj wakiskänti.
