Kunjamtï aka qellqatan uñjawayktanjja, Biblian walja ewjjtʼanakaw utji, ukanakaw jumarusa ukat familiamarus wal yanaptʼaspa. Wali kusisit jakasipjjasma ukwa Jehová Diosajj muni. Jumanakatï Diosar yupaychañ nayrar uchapjjäta ukhajja, janiw kunas faltapkätamti, Jupajj akham sasaw arsuwayi: “Taqe aka yänakajja jumanakarojj churatakïpjjätawa” sasa (Mateo 6:33). Jupamp sum apasipjjasma ukwa Diosajj muni, ukhamajj Jupamp sum apasiñatak chʼamachasipjjapunim. Ukaw jukʼamp askejja (Mateo 22:37, 38).

BIBLIAJJ KAMSISA: ‘“Jumanakan Awkimäyäwa, jumanakasti wawanakajjäpjjarakïtawa” siw Diosajja’ (2 Corintios 6:18). Oracionan mayisiñaw Diosar jakʼachasiñatakejj yanaptʼätam, Jupajj amigomäñwa muni ukat akham sarakistuwa: “Jan inaktʼas orapjjam” sasa (1 Tesalonicenses 5:17). Kunas llakisiytam ukat kunas chuymaman utji ukwa Diosajj wal yatiñ muni (Filipenses 4:6). Jumatï familiamamp chika Diosar oracionan mayisïta ukhajja, qawqsa Jehová Diosar munasta ukwa jupanakajj amuyapjjani.

Diosan arup istʼañamajj wakisirakiwa. Bibliat apstʼat qellqatanakata ukat pachpa Bibliat yatjjatasaw Jupan arup istʼasma (Salmo 1:1, 2). Ukatjja, kuntï yateqawaykta ukjjat lupʼiñaw yanaptʼarakïtam (Salmo 77:11, 12). Maysa toqetjja, Jehová Diosar istʼañatakejj jan qheparasaw tantachäwinakar sarañama (Salmo 122:1-4).

Diosamp sum apasiñatakejj yaqha jaqenakaruw Jupat parlañama. Jumatï Diosat parlañatak jukʼamp chʼamachasïta ukhajja, jukʼampirakiw Jupar jakʼachasïta (Mateo 28:19, 20).

KUNSA LURASMA:

• Sapüru Biblia liyiñataki ukat Diosat oracionan mayisiñatakiw tiempo apstʼasiñama

• Diosan munañap lurañaw kusistʼäwinakat sipansa nayrankañapa, uk amuyañwa familiamar yanaptʼañama

BIBLIAJJ KAMSISA: “Diosar jakʼachasipjjam, jupasti jumanakarojj jakʼachasirakiniwa” (Santiago 4:8). Kuna urusa ukat kuna horarusa familjam Bibliat yatjjatapjjasma ukwa amtañama (Génesis 18:19). Ukatjja, Diosatakjam sarnaqañatakiw chʼamachasiñama ukat Jupamp sum apasipjjañapatakiw familiamar yanaptʼañamaraki. Bibliajj akham siwa: “Wawanakamaruw yaticharakïta; utamankkasina, thakinjam sarkasina, ukhamarakiw parlarakïta ikintañataki, sartañatakisa” sasa (Deuteronomio 6:6, 7). Kunjamtï Josué chachajj siskänjja, ukhamarakiw sarakïta: “Nayampi taqe familiajjampejja Diosaruw servipjjä” sasa (Josué 24:15).

KUNSA LURASMA:

• Familiamanjja, kunanakansa sapa maynir yanaptʼañajj wakisi ukarjamaw kunsa sapa semanajj yatjjatapjjäta uk amtañama