¿LINDA kullakjam jikjjatasirïtati? Ukham kʼarintatajj chuyma ustʼataw kullakajj jikjjatasïna. Yaqhepanakajj chuyma ustʼatäsajj Diosar serviñan jukʼat jukʼatwa aynachtʼjjapjje, ukajj wali llakkañawa. ¿Jumajj ukhamanti uñjasirakta?

Kunapachatï mä kullakasa jan ukajj mä jilatas jan wal luristu ukhajja, perdonañajj chʼamakïspawa. Kuna laykutejj jilat kullakanakajj munasiñampiw taqenir uñjapjjañapa (Juan 13:34, 35). Ukatwa tama taypin maynejj mä jan wal luristaspa ukhajj chuyma ustʼat jikjjatassna (Salmo 55:12).

Mä jilata jan ukajj mä kullak ‘contra quejasiñatak razonajj’ utjaspawa sasaw Biblian qhanañchi (Colosenses 3:13). Ukampis kunapachatï ukham jikjjatastan ukhajja, nayrar sartaskakiñajj chʼamakïspawa. ¿Kunas yanaptʼistaspa? Biblian wiñay yatichäwinakapat (principios bíblicos) amuytʼañaw yanaptʼistaspa. Jichhajj ukanakat kimsa toqet amuytʼañäni.

Alajjpachankir Awkisaw taqe kunsa uñjaski. Jehová Diosajj taqe kunwa uñji, ina chʼusat juchañchapkistu uksa, uka kawsa tʼaqesktan uksa uñjaskarakiwa (Hebreos 4:13). Janiw ukakïkiti, tʼaqestan ukhajj jupajj tʼaqesirakiwa (Isaías 63:9). Llakinakasa, tʼaqesiñanakas utjaskpan, jan ukajj mä jilat kullakas jan wal luraskpan, Diosajj janipuniw jaytkistuti, munasiskakistuwa (Romanos 8:35, 38, 39). Jupat yateqasisajja, janiw kunampisa ni khitimpis ‘Diosan munasiñapat’ apaqayasiñasäkiti.

Maynir perdonañajj janiw luratapajj walikïskiw sañ munkiti. Maynir jan wali luratanakapat perdonañajja, luratapajj walikïkaspasa janis kunäkaspa ukham janiw sañ munkiti. Diosajja mä juchajj walikïkaspas ukham janipuniw uñjkiti, ukampis kunapachatï maynejj juchapat arrepentiski ukhajja, jupajj perdoniwa (Salmo 103:12, 13; Habacuc 1:13). Jehová Diosajj janiw “wiñayatak chuyma ustʼatäkaniti” (Salmo 103:9). Niyakejjay jupat yateqasiñas munchejja, mayninakar perdonañatakiw chʼamañchtʼistu (Mateo 6:14).

Colerasiñ jan apanuktan ukhajj jiwas pachpaw aynachtʼtanjja. ¿Kunatsa? Amparaman niya mä kilon qalsa wali altor katjjäskasma ukham amuytʼam. Mä qhawqha tiempo uka qal katjjasiñajj janiw chʼamäkaspati, ukampis ¿walja tiempo katjjasjjasma ukhajj kunas pasaspa? Mä qhawqha minutonaka, mä hora jan ukajj walja horanak katjjasisma ukhajja qarjjasmawa. Uka pachpa qala jaya tiempo katjjasisma ukhajja, jukʼamp jathïkaspas ukhamwa amuyjjasma. Chuyma ustʼatakïskañajj ukar uñtasitawa: mä jiskʼa jan waltʼäwit jaya tiempo  chuyma ustʼatakïskañäni ukhajja, jiwas pachpaw jukʼamp jan waltʼayasiñäni. Ukatwa Jehová Diosajj colerasiñanak jan imjjasipjjämti sasin ewjjtʼistu, jupajj kunatï jiwasatak askïki uk sum yati (Proverbios 11:17).

Kʼarintkäna uka kullakatak jan jukʼamp coleratäjjañatakejja, ¿kunas Linda sat kullakar yanaptʼawayi? Biblia liytʼasajja, kunatsa mayninakar perdonañajj wakisi uka toqet lupʼiñaw jupar yanaptʼawayi (Salmo 130:3, 4). Jiwasatï mayninakar perdonañäni ukhajja, ukhamarakiw Jehová Diosajj jiwasar perdonistani, uk amtañaw Linda sat kullakar jukʼamp yanaptʼäna (Efesios 4:32-5:2). Kunjamsa uka textonakajj chuymapar purtʼawayi uka toqet lupʼisajja, akham siwa: “Jehová Diosas parlkitaspa ukhamänwa” sasa.

Tiempompejja, Linda kullakajj taqe chuymaw jupar kʼarintkäna uka kullakarojj perdonäna, jan wali luratapsa armjjarakïnwa. Jichhajj wali sumaw jupanakajj apasipjje. Linda kullakajj Diosar serviskakiwa. Jehová Diosajj wiñayatak jupar servisma ukwa munaraki.