JEHOVÁ DIOSAW markapar kuttʼaniñamatakejj yanaptʼätam. Llakinakar saykatañatakisa, jan chuyma ustʼatäjjañatakisa, qʼoma conciencianïñatakis jupaw yanaptʼarakïtam. Uka yanaptʼa katoqäta ukhajja, mayampiw jilat kullakanakamp chika Jehová Diosar serviñ munjjäta. Kunjamtï nayrïr patak maranakan yaqhep cristianonakajj jikjjatasipkänjja, ukhamarakiw jumajj jikjjatasïta. Apóstol Pedrojj akham sasaw jupanakar qellqäna: “Jumanakajj maysar saranukut ovejanakjamäpjjayätawa, ukampis jichhajja almanakam awatirïki uñjirïkaraki jupan ukaruw kuttʼanjjapjjtajja” sasa (1 Pedro 2:25).

Jumatï Jehová Diosampi sum apasiñataki mayamp chʼamachasïta ukhajja, janiw ukham luratamat amtaskätati. ¿Kunatsa? Nayraqatajj Jehová Diosaruw wal kusisiyäta (Proverbios 27:11). Jupajj jiwasjam chuymanirakiwa, ukhamajj luratanakasajj kusisiyaspawa jan ukajj llakisiyaspawa. Ukampis janiw jupar munasiñasatakisa jupar serviñasatakis obligkistuti (Deuteronomio 30:19, 20). Kunapachatï munasiñat Jehová Diosar sirvtan ukhajja, chuymassa jupar jistʼarksna ukhamawa. Ukajj wal jupar kusisiyi, taqpach chuymasampi serviñ amtatasajj jupar churat mä regalökaspas ukhamwa uñji. Kunjamtï Jehová Diosar adorañajj wakiski ukham adorasajj wal kusistanjja (Hechos 20:35; Apocalipsis 4:11).

Diosan markapar kuttʼanisajj Diosar serviñatak walja yanaptʼanakwa katoqäta (Mateo 5:3). Walja jaqenakaw “¿akakïpachat jakañajja?” sasin jisktʼasipjje. Ukampis jupanakajj uka jisktʼana, ukat yaqha ukham wakiskir jisktʼanakan qhanañchäwinakap janiw jikjjatapkiti. Jehová Diosajj jupat yatjjatañ munirwa lurawayistu. Jupar servisakiw kusisit jakassna uk jupajj sum yati. Ukhamajj jumatï munasiñat Diosar servïta ukhajja, wali kusisitaw jikjjatasïta (Salmo 63:1-5).

Jehová Diosajj markapar kuttʼaniñamwa muni, ukatakiw aka folletojj wakichtʼasiwayi. Diosan yanaptʼap mayisisa, wali munasiñampi wakichtʼatawa. Inas mä ancianosa jan ukajj congregacionamankir yaqha jilatas aka folleto churstam, ukatwa jichhajj liytʼaskarakpachätajja. Kuntï liytʼkta ukajj chuymaruw purtʼpachätamjja. Jehová Diosajj janiw jumat armaskiti, munasiñamp katoqtʼañatakiw suyasktamjja, ukajj qhanaw amuyasi (Juan 6:44).

Jehová Diosajj chhaqat ovejanakapat janiw armaskiti, uk yatiñajj wal chuymachtʼistu. Ukwa Donna sat mä kullakajj qhan amuyawayi. Jupajj akham siwa: “Jukʼat jukʼatwa Diosan markapat jitheqtawayta, ukampis kuntï Salmo 139:23, 24 qellqatan siski uka arunakatwa sapa kut lupʼirïta, ukanjja akham siwa: ‘Dios Tata, chuymaj uñantita, chuymajsa uñtʼarakim. Chuymaj uñantita, llakisiykitu uka amuyunakajsa uñtʼarakim. Kuna jan wali lurañ amuyunakas nayan utji uk uñjam, wiñay thaknam irpita’ sasa. Supayampi apnaqat akapachajj janiw nayatakjamäkänti, ni kusisitas jikjjataskayätti. Diosan markapankasakiw kusisitäsna, uk nayajj sum yatiskayäta. Jehová Diosajj janiw jaytjkitänti, nayaw kunjamats Diosan markapar kuttʼaniñajäna. ¡Diosan markapar kuttʼanitajat walpun kusista!” sasa.

Wasitat ‘kusisit’ jakasjjañamatakiw Jehová Diosar orarapipjjsma (Nehemías 8:10). Alajjpachankir Awkisampi wasitat sum apasiñatak chʼamachasitamat janipuniw arrepentiskätati.