Munat jilata, munat kullaka:

Nayra tiempon jakir walja chachanakata warminakatwa Biblian qellqatajja. Jupanakajj taqe chuymaw Diosarojj servipjjäna, ‘jiwasjam jaqekïpjjarakïnwa’, jiwasjamaw jan waltʼäwinakan uñjasipjjarakïna (Santiago 5:17). Yaqhep chacha warminakajja, jan walinakampi llakinakampi aynachtʼataw uñjasipjjäna, Diosar servirinakat yaqhepajj kuna jan waltï lurapkäna uk uñjasas chuyma ustʼataw jikjjatasipjjarakïna. Waljanirakiw nayra luratanakapat juchañchasipjjäna, ukanakaw jupanakar aynachtʼayäna.

Ukhamanakan uñjasisas janiw Diosat jitheqtapkänti. Jupanakat waljaniw mä salmista chachjam Diosar akham sasin mayisipjjäna: “Chhaqat mä ovejar uñtataw nayajj saranukta. Servirimar thaqer jutakimaya, kuna laykutejj janiw nayajj mandamientonakamat armaskti” sasa (Salmo 119:176). ¿Jumajj ukham jikjjatasirakirïtati?

Jehová Diosajj tamat jitheqtat servirinakapat janipuniw armaskiti. Jan ukasti jilat kullakanak toqew jupanakar thaqer sari. Jehová Diosajj kunjamsa Job chacharojj yanaptʼäna uk amuytʼañäni, jupajj jan kunani, wali usuntata ukhamaw jikjjatasïna, wawanakapas jiwarapjjarakïnwa. Amigonakapas chuymachtʼañat sipansa jukʼampikiw aynachtʼayjjapjjäna. Job chachajj janis Diosat jitheqtkchïnjja, awisajj Jehová Diosas jupar tʼaqesiykaspa ukhamwa amuyäna (Job 1:22; 2:10). Jan ukham amuyañapatakejj ¿kunjamsa Jehová Diosajj Job chachar yanaptʼäna?

Elihú chacha toqew yanaptʼäna. Kuna jan walinakantï Job chachajj jikjjataskäna uk wali amuyumpiw Elihú chachajj nayraqat istʼäna, ukjjaruw kuntï amuykäna uk sarakïna. ¿Jupajj kamspachänsa? ¿Jiskʼachpachänti, jan ukajj ‘jumaw juchanïtajja’ sasat cheqañchpachäna? ¿Jachʼa jachʼa tukusat parlpachäna? Janiwa. Espíritu santon amuytʼayatajj akham sänwa: “Cheqpach Diosan nayraqatapanjja, nayajj jumjamarakïtwa, ñeqʼet luratarakïtwa. Ukhamajj janiw jumajj nayar ajjsarañamäkiti. Kuntï nayajj jumar siskäma ukajj janiw jumar llakisiyañapäkiti” sasa (Job 33:6, 7). Job chachar aynachtʼayañat sipansa, Elihú chachajj munasiñampiw ewjjtʼäna, chʼamañchtʼarakïnwa.

Ukham munasiñampirakiw aka folleto wakichtʼanipjjta. Nayraqatjja, tamat jitheqtatäpkäna uka walja jilat kullakanakaruw sum istʼapjjta, ukatjja kunjamsa jikjjatasipjjäna ukwa amuykiptʼapjjarakta (Proverbios 18:13). Ukjjarusti Jehová Diosar oración toqe yanaptʼa mayisajja, kunjamsa nayra servirinakaparojj jan walinakan uñjasipkäna ukhajj yanaptʼäna uka toqet parlir sarnaqäwinakatwa Bibliat yatjjatapjjta. Ukatjja kunjamsa uka sarnaqäwinakajj jichhürunakan jan walinakar saykatañatak yanaptʼistaspa ukwa amuytʼapjjarakta. Aka folleto wali amuyump liytʼañamatakiw chʼamañchtʼanipjjsma. Munasiñampiw arunta apayanipjjsma.

Jehová Diosan Testigonakapan Cuerpo Gobernantepa