TAQENIW llakinakanïtanjja, Diosan servirinakapas ukhamaraki. Salmo qellqerejj akham sänwa: ‘Llakinakajj aynachtʼayitänwa’ sasa (Salmo 94:19). Aka qhepa urunakanjja, ‘jakañjjat llakisiñanak’ utjatap laykojj Jehová Diosar serviñajj chʼamakïniwa sasaw Jesusajj säna (Lucas 21:34). ¿Qollqet llakisiytam? ¿Familian llakinakapach aynachtʼaytam? Jan ukajj ¿usuntat uñjasisach aynachtʼat jikjjatasta? ¿Kunjamsa Jehová Diosajj yanaptʼiristam?

Llakinakar saykatañatakejj maynin yanaptʼapwa muntanjja. Apóstol Pablojj akham sänwa: “‘Nanakajj kunayman jan waltʼañanakampi muyuntatäpjjtwa’, ‘jan kun kamachirjamaw uñjasipjjta’, ‘tinkuyapjjetuwa’, ‘ukampis janiw jan onjjtirjamäpkti’, ‘ukanakat mistuñajj utjakipuniwa’, ‘janiw tukjatäpkti’” sasa. Ukham aguantañatakejj ¿kunas yanaptʼistu? Taqe Kunjjar Munañani Jehová Diosan ‘chʼamapaw’ yanaptʼistu (2 Corintios 4:7-9).

Kunjamsa nayra maranakan ‘jaqen chʼamapat jilankki uka chʼamajj’ yanaptʼayätam uk amtasim. Wali chʼamañchtʼir mä discurso istʼasajja, ¿Diosajj kunja munasirisa jan jaytjasirisa uk amuyirïtati? Aka oraqejj mä Paraisor tukuyatäniwa sasin jaqenakar yatiyañajja, ¿janit Diosan promesanakapar jukʼamp confiyañatak yanaptʼkayätam? Tantachäwinakasa predicañasa, llakinakampi jan aynachtʼañataki ukat Jehová Diosar kusisit chuymamp serviñatakiw yanaptʼistu.

Jehová Diosajj Reinop nayraqat thaqsna, kunanakatï jupar serviñasatakejj yanaptʼkistu ukanak jan jaytas lursna ukwa muni (Mateo 6:33; Lucas 13:24). Inas familian problemanak utjatapata jan ukajj usutätamat aynachtʼsta, jan ukajj inas Diosar servitamat familiaranakamasa, amigonakamas juma contra saytʼasisajj aynachtʼayapjjstam. Jan tiempon trabajisajj inas tantachäwinakar jan sarjjarakstati. Ukhamanakan uñjasisasa, wali qarita jikjjatasisasa, jan tiemponïsasa inas aynachtʼat jikjjatasiraksta. Janjakiw kunjamtï Jehová Diosajj munki ukham jupar servkiristi sasin inas amuyaraksta.

Jehová Diosajj kunjamsa jikjjatastan uk sum yati, kuntï lurirjamäktan ukakwa mayirakistu. Wali qarita jan ukajj llakimp aynachtʼat uñjastan ukhajja, wasitat sum jikjjatasiñasatakejj tiempo wakisitap Diosajj sum yati (Salmo 103:13, 14).

Jehová Diosajj kunjamsa Elías profetar yanaptʼäna uk amuytʼañäni. Mä kutejja wali llakitaw Eliasajj jikjjatasïna, ajjsarañatsa wasararuw escapjjäna. Uk uñjasajj ¿kunsa Diosajj luräna? ¿Juchañchpachänti? ¿“Jankʼak profetjam phoqer saram” sasat sispachäna? Janiwa. Antisas Eliasar yanaptʼañatakejj pä kutiw mä angelar  khitäna, ukhamat wali munasiñampi ikit sartayañapataki ukat manqʼa churañapataki. 40 urunak pasatatjja, Eliasajj llakitäskakïnwa. Jupar chʼamañchtʼañatakejj ¿kunampsa Diosajj luräna? Nayraqatjja, jupar jarkʼaqañatak chʼamanïtapwa uñachtʼayäna. Ukatsti ‘jiskʼat parlasa suma qoña arunakampiw’ chuymachtʼäna. Ukjjarojj jupjam taqe chuyma yupaychirinakajj waljanïskatapwa amuytʼayäna. ¿Kunjamsa ukajj yanaptʼäna? Profetjam serviskakiñapatakiw chʼamañchtʼäna (1 Reyes 19:1-19). ¿Kunsa ukajj yatichistu? Eliasajj llakinakampi aynachtʼatäkäna ukhajja, Diosajj wali munasiñampi ukat pacienciampiw yanaptʼäna. Diosajj pachpakïskiwa, kunjamtï Eliasat llakiskänjja ukhamarakiw jumat llakisi.

“Kunjamtï nayrajj Jehová Diosar servirïkayäta ukham janiw jichhajj servkiristi” sasajj janiw amuyañamäkiti. Amuytʼañäni: mä tʼijuritï walja phajjsinaka jan ukajj walja maranak tʼijuñ jaytjjaspa ukhajja, janiw jankʼak nayrjam tʼijkaspati. Kunjamtï nayrajj tʼijurïkäna ukham tʼijuñatakejj jukʼat jukʼatwa mayamp chʼamachasiñapa. Cristianonakajj uka kikparakiw Diosar serviskakiñatakejj jukʼat jukʼat chʼamañchasiñasa (1 Corintios 9:24-27). ¿Kun lurasas qalltasma? ¿Janit tantachäwinakar sarkasma? Ukatakejj Diosar yanaptʼa mayisim. Jumatï jukʼat jukʼat chʼamachasïta ukhajja, Jehová Diosajj kunja “suma Diosasa” uk qhanwa amuyäta (Salmo 34:8). Diosar munasitam uñachtʼayañatakejj janis waljanak lurkchïtajja, Diosajj wali valoranitwa uk uñjani, uk janipuniw armañamäkiti (Lucas 21:1-4).

Qalltan parlaniwayktan uka June kullakarojj ¿kunjamsa Jehová Diosajj yanaptʼäna? Kullakajj siwa: “Diosar oración toqe ‘yanaptʼita’ sasajj wal mayisiyäta. Mä urojja, ‘markamanwa asambleajj utjani’ sasaw yojjchʼajajj sitäna, ukatwa ukar mä uru sarañ amtayäta. ¡Jehová Diosan markapamp chika mayamp tantachasiñajj wali kusiskañänwa! Uka asambleaw wal chʼamañchtʼawayitu. Jichhajj mayampiw Jehová Diosar sirvjjta, wali kusisitaw jikjjatasirakta. Diosan tamapat jitheqtañajj jan walïtapa, jilat kullakanakan yanaptʼapajj wali askïtapwa amuyawayta. Akapachan tukusiñap janïr purinkipan Diosan markapar kuttʼanitajat walpun kusista” sasa.