Fariseonakampi Herodesan arkirinakapampejj Jesusaruw jiwayañ munapjjäna, uk yatisajj discipulonakapampiw Jesusajj Galilea Qota toqer sarjjäna. Ukarusti walja jaqenakaw Galileata, Jerusalenata, Idumeata, Jordán Jawir khurkatat jutapjjäna. Tiro, Sidón uksa toqenakatsa ukhamarakiw jutapjjäna. Ukanjja Jesusajj walja usutanakaruw qolläna, wali phoqarakïnwa, ukatwa usuntat jaqenakajj Jesusan ukar nuktʼas nuktʼas jutapjjäna. Jesusan amparapampi loqjjatatäñat sipansa, uka usutanakaw Jesusar llamktʼañatakejj amparanakap wali chʼamampi loqtʼapjjäna (Marcos 3:9, 10).

Walja jaqenak ukankapjjatapatjja, jan jukʼamp nukjayasiñatakisa jaqenakat jitheqtasin botet yatichañatakisa, Jesusajj mä jiskʼa bote nayatak wakichapjjam sasaw discipulonakapar säna. Jesusajj uka botetwa jaqenakar yatichäna, uka botet yaqha cheqanakar jittʼasarakiw jukʼamp jaqenakar yanaptʼäna.

Kunanaktï Jesusajj Galilea Qotan lurkäna ukanak uñjasajja, kuntï Isaías profetajj qellqkäna ukanak phoqasitapwa Mateo discipulojj amuyäna (Mateo 12:17). ¿Isaiasan kawkïr profeciapsa Jesusajj phoqaskäna?

Profeciajj akham sänwa: “¡Jupaw nayan ajllit servirijajja, jupasti wali munatawa, nayajj wal jupat kusisirakta! Juparuw espirituj churäjja, kunatejj cheqapäki ukwa markanakarojj qhanañcharakini. Janiw chʼajjwkanisa ni jachʼatsa arnaqaskaniti, janirakiw arunakapas jachʼa thakinakan istʼaskaniti. Taqe kunanakatï jan walïki ukanak sum askichañkamajja, janiw kuna pʼakit cañsa jukʼamp pʼakjkaniti, janirakiw jewqʼeskiri micha pawilsa jiwaykaniti. Cheqansa sutipjjaruw markanakajj suyapjjani” sasa (Mateo 12:18-21; Isaías 42:1-4).

Jesusaw Diosan wali munat serviripajja, Diosajj jupat wal kusisiraki. Cheqansa Jesusaw kunatejj cheqapäki uk qhanañchäna. Kʼari religionanakajj costumbreparjamaw kunatï cheqapäki uk chhaqtayapjjäna. Ukhamarus Diosan Leyip amuyuparjam phoqañ munasajja, fariseonakajj sábado urun janiw usutanakarojj yanaptʼapjjerïkänti. Jesusajj kunatï cheqapäki uk qhanañchasasa, espíritu santojj jupjjankatap uñachtʼayasasa, jan wali costumbrenak apanukupjjañapatakiw jaqenakar yanaptʼäna, ukajj mä jathi qʼepsa apaqkaspa ukhamänwa. Ukatwa religión pʼeqtʼirinakajj Jesusar jiwayañ munapjjäna, ukajj wali llakkañänwa.

“Janiw chʼajjwkanisa ni jachʼatsa arnaqaskaniti, janirakiw arunakapas jachʼa thakinakan istʼaskaniti”  siski uka arunakajja, ¿kamsañsa muni? Jesusajj qollkäna uka jaqenakarojja, janiw yaqhanakar uka toqet parlapjjätati sasaw ewjjerïna, demonionakarus uka toqet parlañ jarkʼänwa (Marcos 3:12). Cheqansa Jesusajj janiw mayjtʼayat yatiyäwinak maynit maynikam yatiykipasipjjañap munkänti, janirakiw ukhamat uñtʼayasiñsa munkänti.

Jesusajj khitinakatï pʼakjat cañaru uñtasitäpki ukham jaqenakaruw chuymachtʼkir arunak yatiyäna. Uka jaqenakajja, jewqʼeskir micha pawilor uñtasitäpjjänwa. Jesusajj janiw pʼakit cañar jukʼamp pʼakjkänti, ni jewqʼeskiri micha pawilarus jiwaykänti, jan ukasti munasiñampiw suma chuyman jaqenakarojj chuymachtʼäna chʼamañchtʼarakïna. Cheqansa Jesusaw taqe markankir jaqenakarojj yanaptʼani.