Jesusajj Bautisir Juanarojj wali respetompiw uñjäna, ukampis janiw taqe jaqenakajj ukham uñjapkänti. Ukatwa Jesusajj uka tiempon jakir jaqenakat akham säna: “Qhatun qontʼat wawanakaw anatiri masinakapar arnaqapjje, akham sasa: ‘Nanakajj flauta jumanakatak tuktʼarapipjjsma, jumanakajj janiw thoqopktati. Nanakajj jachʼatwa wararipjjta, jumanakajj janiw llakisiñat chuyms leqʼesipktati’” sasa (Mateo 11:16, 17).

Uka arunakampejj ¿kamsañsa Jesusajj munäna? Jupajj sänwa: “Juanajj jutkäna ukhajja, janiw manqʼkänsa ni umkänsa. Ukampis jaqenakajj jupat akham sapjjewa: ‘Demonion mantatawa’ sasa. Jaqen Yoqapajj jutki ukhajja, manqʼänwa umarakïnwa, ukampis jaqenakajj jupat akham sapjjewa: ‘Aka jaqejj añcha manqʼeriwa, añcha vino umiriwa, impuesto cobririnakana ukhamarak jucharar jaqenakan amigopawa’” sasa (Mateo 11:18, 19). Juanajj janiw walja utjirinïkänti, antisas nazareo jaqjamaw jakäna, janiw vinsa umirïkänti, ukampis ‘demonion mantatawa’ sasaw jaqenakajj Juanat sapjjäna (Números 6:2, 3; Lucas 1:15). Maysa toqetsti, Jesusajj uka tiempon jakir jaqenakjamaw jakasïna, jupanakjamarakiw manqʼäna umäna, wali amuyumpi. Ukampis añcha manqʼeriwa, añcha umiriwa sasaw jaqenakajj sapjjäna. Janiw kunampis contentasipkänti.

Jesusajj uka tiempon jakiri jaqenakarojja, qhatunkir wawanakaruw uñtayäna, uka wawanakajj janiw flauta istʼasajj thoqopkänti ni jachʼat wararir istʼasas llakisipkänti. Ukatjja Jesusajj sarakïnwa: “Cheqansa maynin yatiñanïtapajj luratanakapanwa uñjasi” sasa (Mateo 11:16, 19). Juanasa Jesusasa ‘luratanakapampiw’ kuntï jaqenakajj jupanakat sapkäna ukajj kʼarïtap uñachtʼayapjjäna.

Jesusajja uka tiempon jakiri jaqenakarojj jan istʼasirinaka sasaw säna. Ukatjja Corazín, Betsaida, Capernaúm uka markanakaruw juchañchäna. Uka markanakanwa Jesusajj milagronak luräna. Fenicia toqenkir Tiro, Sidón uka markankirinakatï uka milagronak uñjapjjaspäna ukhajja, ukankirinakajj arrepentisipjjaspänwa sasaw sarakïna. Capernaúm markarus juchañcharakïnwa. Jesusajj ukanwa jukʼamp jaqenakar yanaptʼäna, ukhamäkchïnsa janiw Jesusar confiyapkänti. Ukatwa Jesusajj uka markar akham säna: “Juicio Urunjja, Sodoma markat sipansa, jukʼamp jan walinwa uñjasipjjäta” sasa (Mateo 11:24).

Ukjjarusti Jesusajj Awkiparuw jachʼañchäna. Diosajj cheqa yatichäwinakjja, “yatiñan jaqenakatsa wali pʼeqen jaqenakatsa” imantänwa, wawanakjam humildenakaruw qhanañchäna (Mateo 11:25). Jesusajj akham sasaw uka humilde jaqenakar invittʼäna: “Nayar jutapjjam, taqe qarjatanaka, jatjatanaka, nayaw jumanakar samarañ churapjjäma. Nayan yukuj jumanakjjar apapjjam, nayat yateqasipjjarakita. Nayajj llampʼu chuymanïtwa, humilde chuymanirakïtwa, ukatsti jumanakatakejj samarañsa jikjjatapjjätawa. Nayan yukuj apañajj janiw chʼama tukuñäkiti, qʼepijas phisnakirakiwa” sasa (Mateo 11:28-30).

Religión pʼeqtʼirinakajja, costumbrenakarjam yatichasaw jaqenakarojj wali jathi qʼepimpi apjjatapjjäna, jupanakajj sábado uru imañajj wali chʼamäkaspas ukham yatichapjjäna. Jesusasti Jehová Diosat cheqa yatichäwinak yatichasaw jaqenakarojj samarañ churäna, yatichäwinakapajj janiw costumbrenakarjamäkänti. Ukatjja autoridadanakampi jan waltʼayata uñjasipkäna, juchanakapat arrepentisipkäna ukanakaruw samarañ churarakïna. Juchanakap  perdonayasiñatakejj kunsa lurapjjañapäna, Jehová Diosamp sum apasiñatakejj kunsa lurapjjañaparakïna ukanakwa jupanakarojj yatichäna.

Taqe khitinakatï Jesusan yatichäwinakapar istʼapki ukanakajja, jakañapwa Diosar katuyasipjje. Ukatjja khuyapayasiri munasiri alajjpachankir Awkisaruw servipjjaraki. Uk lurañajj janiw mä jathi qʼepjamäkiti, ‘Diosan mandamientonakap phoqañajj janiw chʼamäkiti’ (1 Juan 5:3).