Bautisir Juanajja niya mä maraw carcelan llawintatäjjäna. Ukanwa jupajj Jesusan milagronakapat istʼäna. Jesusajj Naín markanwa mä viuda warmin yoqapar jaktayi sasin discipulonakapajj Juanar yatiyapjjäna ukhajja, jupajj wal kusispachäna. Ukatsti Juanajj pä discipuloparuw jawsayäna, Jesusar akham sas jisktʼanipjjañapatakiw khitarakïna: “¿Jumätati jutañapäkäna ukajja, jan ukajj yaqharuch suyapjjäjja?” sasa (Lucas 7:19).

¿Kunatsa Juanajj ukham jisktʼaspachäna? Juanajja Diosar taqe chuymaw servïna. Jupajj pä maranak nayra Jesusaru bautiskäna ukhajja, Jesusjjaru Diosan espiritup mä palomar uñtat saraqanirwa uñjäna, ukatsti Diosan arupwa istʼarakïna akham siri: ‘Jesusajj wawajawa’ sasa. Ukhamasti, Juanajj janiw Jesusat pächaskänti. Ukhamäspäna ukhajja Jesusajj janiw Juanarojj jachʼañchkaspänti. Ukhamasti niyakejjay Jesusat jan pächaskchïnjja, ¿kunatsa ukham jisktʼaspachäna?

Jesusajj pachpa arunakapampi ‘nayajj Mesiasätwa’ saspa ukwa Juanajj istʼañ munpachäna. Uk yatiñaw carcelankkasajj chʼamañchtʼaspäna. Biblian qellqatäki uka profeciarjamajja, Mesiasajj reyjamaw apnaqañapäna, markaruw salvañaparakïna. Ukampis Jesusajj bautisasïna ukhat mä qhawqha phajjsinakatjja Juanarojj carcelanwa llawintapjjäna. Ukatwa Juanajj uka profecianak phoqañatak jutañapäkäna uka Mesiasajja, ¿jumätati jan ukajj yaqharuch suyapjjäjja? sasin Jesusar jisktʼpachäna.

Jesusajja janiw ‘nayätwa Mesiasajja’ sasin Juanan discipulonakaparojj cheq siskänti, jan ukasti kunayman usutanakar qollasaw kunjamsa Diosajj jupar yanaptʼaskäna uk uñachtʼayäna. Jupasti sarakïnwa: “Sarapjjam, kuntï uñjapkta, istʼapkta ukanak Juanar yatiyanipjjam: juykhunakajj uñjapjjewa, cojonakas sarnaqapjjewa, lepra usuninakas qʼomachatäpjjewa, oqaranakas istʼapjjewa, jiwatanakas jaktayatäpjjewa, pobrenakarus suma yatiyäwinakajj yatiyasirakiwa” sasa (Mateo 11:4, 5).

Juanajj jukʼamp milagronak Jesusajj luraspa ukwa suypachäna, inas carcelat jupar apsuspa uk suyarakchïna. Jesusasti Juanarojj kuna milagronaktï lurkta ukanakat sipansa janiw jukʼampi lurkäti sasaw säna.

Juanan discipulonakapajj sarjjapjjäna ukhajja, Jesusajj Juanajj ‘profetanakat sipansa jukʼampiwa’ sasaw jaqenakarojj säna. Malaquías 3:1 qellqatarjamajj Juanaw ‘Diosan khitatapänjja’. Malaquías 4:5, 6 qellqatarjamasti Juanaw Elías profetänjja. Jesusajj saskakïnwa: “Qhanakwa sapjjsma, warmit nasir jaqenak taypinjja, janiw khitis Bautisir Juanat sipans jukʼamp jilïrejj utjkiti. Khititejj alajjpachankir Reinon jiskʼäki ukajja, jupat sipansa jukʼamp jilïriwa” sasa (Mateo 11:11).

“Khititejj alajjpachankir Reinon jiskʼäki ukajja, [Juanat] sipansa jukʼamp jilïriwa” sasin Jesusajj siskäna ukhajja, Bautisir Juanajj janiw alajjpachankir Reinor sarkaniti sañwa munaskäna. Juanajj Jesusan jutañapatakiw thaki wakichäna, ukampis alajjpachar sarañajj janïr utjkäna ukhaw jiwjjäna (Hebreos 10:19, 20). Juanajj Diosat jan jitheqtasaw profetjam serviwayäna, ukhamasti Diosan Reinopajj apnaqjjani ukhajj aka oraqenwa jupajj jakjjani.