Jesusampi discipulonakapampejj Betsaidaruw puripjjäna. Jupan ukarojj mä juykhuruw apanipjjäna, llamktʼas qollañapatakiw ruwtʼapjjarakïna.

Jesusajj uka jaqerojj marka anqäjjaruw irpsüna. Nayranakapatjja thusunqallampiw uchäna, ukatjja akham sasaw jisktʼarakïna: “¿Uñj-jjtati?” sasa. Uka jaqejj sarakïnwa: “Jaqenak uñjta. Arbolanakäkaspas ukham uñjta, sarnaqasipkiwa” sasa (Marcos 8:23, 24). Jesusajj mayampiw nayranakapat llamktʼäna. Uka jaqejj walikëjjänwa, Jesusajj utaparuw khitjjarakïna, ‘janiw markar mantätati’ sasaw ewjjarakïna.

Jesusampi discipulonakapampejj Cesarea de Filipo toqeruw sarapjjäna. Ukajj 40 kilometronak alay toqer sarañankänwa. Uka markajj mä qollunkänwa, uka qollutjja Hermón khunu qollojj qhanaw uñjasïna. Uka markarojj pä uru jan ukajj pä uru jilaw sarapjjpachäna.

Thak sarkasajja, Jesusajj sapak oración lurañatakiw yaqha cheqar saräna. Jiwañapatakejj llätunka jan ukajj tunka phajjsinakakiw faltjjäna, ukatwa discipulonakapat llakisïna. Uka nayrakiw walja discipulonakajj Jesusat jitheqtapjjäna, yaqhepasti amtanakap jan phoqasitap uñjasajj aynachtʼapjjänwa. Jaqenakajj reyïñapataki Jesusar uttʼayañ munapjjäna ukhajja, kunatsa jan munkpacha, jan ukajj khitïnsa uk uñachtʼayañatakejj kunatsa mä señal jan lurkpacha sasin inas jisktʼasipjjchïna.

Jesusajj oraskäna ukaruw discipulonakapajj sarapjjäna. Jesusasti akham sasaw jisktʼäna: “¿Jaqen Yoqapajj khitiw sapjjes jaqenakajja?” sasa. Jupanakasti sapjjarakïnwa: “Bautisir Juanaw sasaw yaqhepajj sapjje; yaqhepasti Eliasaw sapjjewa; mayninakasti Jeremiasawa jan ukajj yaqha profetawa sasaw sapjje” sasa. Jaqenakajja jiwatäjjapjjäna uka profetanakat mayniw jaktanpacha sasaw Jesusat amuyapjjäna. Ukampis kunsa discipulonakapajj amuyapjjäna uk yatiñatakejja, Jesusajj akham sasaw jisktʼarakïna: “Jumanakajj ¿khitiw sapjjestasa?” sasa. Uk satasti Pedrojj jankʼakiw “jumajj Cristötawa, jakkir Diosan Yoqapätawa” sasin säna (Mateo 16:13-16).

Jesusasti Pedrorojj kusisim Diosaw uk yatiytam sasaw säna. Ukatjja sarakïnwa: “Nayajj saraksmawa: jumajj Pedrötawa, aka qarqa patjjaruw congregacionaj uttʼayäjja, janirakiw uka congregacionatakejj Sepulturan punkupas chʼamanïkaniti” sasa. Ukham sasajja, Jesusajj kunjamsa jupa pachpjjaru congregación uttʼayani uka toqetwa parlaskäna, Diosat jan jitheqtir servirinakaparojj janiw jiwañasa jarkʼkaniti sañwa munaskarakïna. Ukatjja Pedror sarakïnwa: “Nayaw alajjpachankir Reinon llavenakap churäma” sasa (Mateo 16:18, 19).

Jesusajj ukham sasinjja, janiw Pedrosa mayni apostolonakat sipan jilïrïkaspa, Pedrjjarusa  congregación uttʼaykaspa ukham sañ munkänti. Cheqansa Jesusjjaruw congregacionajj uttʼayasi, jupaw Qarqajja (1 Corintios 3:11; Efesios 2:20). Ukampis Pedrojj kimsa llavenakwa katoqäna, jupaw Diosan Reinopar mantapjjañapatak jaqenakarojj yanaptʼañapäna.

Nayrïr llavempejja, Pedrojj 33 maran Pentecostés urunwa arrepentisit judionakarusa prosélito jaqenakarus yanaptʼäna, jupanakarojj kunsa salvasiñatakejj lurapjjañapäna ukwa qhanañchäna. Payïr llavempisti Jesusar creyipkäna uka samaritanonakaruw alajjpachankir Reinor mantapjjañapatak yanaptʼäna. Kimsïr llavempisti 36 maranwa jan circuncidat yaqha markankirinakaru Reinor mantapjjañapatak yanaptʼarakïna, Corneliompi, familiapampi, amigonakapampiw jupanak taypinkapjjäna (Hechos 2:37, 38; 8:14-17; 10:44-48).

Jesusajj kunjamsa Jerusalenan tʼaqesiyatäsin jiwayatäni ukwa apostolonakapar qhanañchäna, jupanakasti uk istʼasajj llakisipjjänwa. Pedrojj Jesusan alajjpachan jakañataki jaktayatäñap jan sum amuyasajja, Jesusarojj yaqha cheqar irpasaw akham ewjjtʼäna: “Tata, jan ukham parlamti, janipuniw jumajj ukhamar purtʼaskätati” sasa. Jesusajja kutikipstasajj Pedror sänwa: “¡Saraqet Supaya! Kuntï lurañajäki ukat jan jarkʼistati. Janiw jumajj kunjamtï Diosajj amuyki ukham amuyktati, jan ukasti jaqenakjamaw amuytajja” sasa (Mateo 16:22, 23).

Ukatjja Jesusajj jaqenakaru discipulonakaparuw jawsayäna, jupar arkañatakejj qhawqsa chʼamachasipjjañapa uk akham sänwa: “Maynitejj nayar arkañ munchitojja, jupa pachpat armtʼaspan, tʼaqesiñ lawap apjjarusisin jan qheparas arkitpan. Khititejj jakañap salvasiñ munki ukajja, aptʼasiniwa, khititejj naya layku, suma yatiyäwinak layku jakañap aptʼaskani ukajja, salvasiniwa” sasa (Marcos 8:34, 35).

Jesusamp suma uñjatäñatakejja, arkirinakapajj janiw ajjsarapjjañapäkiti, tʼaqesiñatakis jankʼakïpjjañaparakiwa. Jupajj sänwa: “Khititejj nayatsa arunakajatsa phenqʼaskani, Diosat jitheqtir aka tiempon jakir jucharar jaqenak taypinjja, jaqen Yoqapajj jupat phenqʼasirakiniwa, Awkipan jachʼa munañapampi santo angelanakampi jutkani ukapachajja” sasa (Marcos 8:38). Jesusajj jutkani ukhajja, “sapa mayniruw luratanakaparjam kunatï wakiski uk churani” (Mateo 16:27).