Diosan yatiyäwinakapajj Biblian qellqatawa. Alajjpachankir Awkisajj jaqenakar yatichañatakiwa uka yatiyäwinak Biblian qellqayäna. Pä waranqa maranak nayrajja, pä wali wakiskir yatiyäwinakaw yatiyasïna, ukanakat jichhajj yatjjatañäni. Uka yatiyäwinakjja, Gabriel ángel taypiw Diosajj yatiyäna, uka angelajj sänwa: “Uruy arumaw Dios nayraqatankaskta” sasa (Lucas 1:19). Gabriel angelajja, ¿kunapachansa uka pä wali wakiskiri yatiyäwinak yatiyäna?

Niya 3 (antes de Cristo) maräjjänwa. Judeankir mä markanjja, Zacarías sutini mä sacerdotew jakasïna, uka markajj Jerusalenat janiw jayankkänti. Jupasa Elisabet esposapasa jilïrëjjapjjänwa, janirakiw wawanïpkänti. Mä urojja, Zacariasajj sacerdotetwa Jerusalenankir Diosan templopan serviskäna, ukatjja akatjamatwa Gabriel angelajj incienso altara kupëjjapan saytʼasïna. Ukanwa Gabriel angelajj nayrïr yatiyäwi yatiyäna.

Angelar uñjasajja Zacariasajj wal sustjasïna. Ukatwa angelajj akham säna: “Zacarías, jan ajjsaramti. Taqe chuyma ruwtʼasitamarojj Diosajj istʼiwa. Elisabet warmimajj mä wawa jumatakejj ususini, Juan sasaw jupar sutiyäta” sasa. Gabrielajj saskakïnwa: “Jupasti Jehová Diosatakejj wali jachʼäniwa” ukatjja “Jehová Diosatakejj mä wakichtʼat marka wakichani” sasa (Lucas 1:13-17).

Zacarías chachatakejja, uka yatiyäwejj janiw cheqaw sañjamäkänti. Warmipasa jupasa jilïrëjjapjjänwa. Ukatwa Gabriel angelajj akham säna: “Arunakajar jan creyitam laykojja, janiw arunëjjätati, amutuw uñjasïta, kunürutï ukanakajj phoqaskani ukhakama” sasa (Lucas 1:20).

Ukañkamasti Zacariasajj kunatsa jan jankʼak mistunki sasaw anqankir jaqenakajj jisktʼasipjjäna. Mistunïna ukhasti, janiw parlirjamäkänti, amparampikiw parljjäna. Templonkkasina wali musparkañ mä milagro uñjatapajj qhanaw amuyasïna.

Templon serviñ urunakapajj tukusjjäna ukhajja, utaparuw Zacariasajj sarjjäna. Mä qhawqha urunak qhepatsti, Elisabetajj usurëjjänwa. Wawan nasiñapkamajja phesqa phajjsinakaw utat jan mistkänti.

Payïr kutinjja Gabriel angelajj María soltera tawaqoruw uñstäna. Mariajj Nazaret markanwa jakasïna, uka markajj Galilea toqenkänwa, Jerusalén markat alayana (norte). ¿Kunsa angelajj jupar yatiyäna? Angelajj akham sänwa: “Jumajj Diosan suma warmit uñjatätawa. Jumajj usuriptätawa, mä yoqall wawa ususïta, Jesús sasaw sutiyäta. Jupasti wali jachʼäniwa, Jachʼa Diosan Wawapa satarakïniwa. [...] Jacobun utapjjaruw jupajj wiñayataki mä Reyjam apnaqani, janirakiw Reinopajj tukuskaniti” sasa (Lucas 1:30-33).

Gabriel angelajja, uka yatiyäwinak yatiyasajj kunja kusisitäpachänsa uk amuysnawa. Juan chachampita Jesusampit aka libron yatjjatkasajja, kunatsa uka pä yatiyäwinakajj wali wakiskirïna ukwa amuyañäni.