Bautisasïna uka qhepatjja, Jesusarojj mä enemigow pantjasiyañ munäna. Uka enemigojj Supayawa. Jesusajj janïr yatiyañ qalltkäna ukhatpachwa Supayajj pantjasiyañ munäna, walja kutirakiw Jesusar yantʼäna. Ukampis Jesusajj Supayat akham sänwa: “Akapachan apnaqeripaw jutaski, jupajj janiw nayjjar chʼamanïkiti” sasa (Juan 14:30).

Apóstol Juanajja, kunas Diablo Supayarojj pasani ukwa mä visionan uñjäna. Juparojja jachʼa dragona mä arunjja, nayra asiro sasaw uñtʼasiraki. Uka jan sinttʼasiri, taqe jaqenakan enemigopajj aka oraqer jaqoqanitäñapänwa, “jukʼa tiemponikïtap yatisajja wali colerataw” saraqaniñapäna (Apocalipsis 12:9, 12). Cristianonakajj uka ‘jukʼa tiemponwa’ jakasktanjja, janiw ukat pächasktanti. Niyaw “jachʼa dragonajja, mä arunjja nayra asirojj” mikʼayar jaqontatäni, 1.000 maranakaw jan kunsa lurkarakiniti. Ukañkamajj Jesusaw Diosan Reinopan apnaqani (Apocalipsis 20:1, 2).

¿Kunanakas uka 1.000 maranakan aka oraqen paspachäni? ¿Khitinakas aka oraqen jakapjjani, kunjamansa jakasipjjarakini? Jesusajj ovejanakampit cabranakampit parlir uñachtʼäwit parlasaw uka jisktʼanakar qhanañchäna. Ovejanakar uñtasita suma chuymani jaqenakarojja, mä arunjja Jesusan jilanakapar sum uñjiri yanaptʼiri jaqenakarojja, ¿kunas pasani? Ukatjja cabranakar uñtasita jan wali jaqenakarojja, ¿kunas pasarakini? Jesusajj akham sasaw qhanañchäna: “Jupanakasti [cabranakasti] wiñayatak jiwayataw uñjasipjjani, cheqapar sarnaqerinakasti [ovejanakasti] wiñay jakañ katoqapjjarakini” sasa (Mateo 25:46).

Jesusan uka arunakapajja, kuntï jupan ladopan warkkatatäkäna uka jan wali jaqerojj siskäna uk amuyañatakiw yanaptʼistu. Uka jaqerojja  Jesusajj janiw kuntï apostolonakapar siskäna uka kikpa siskänti, apostolonakapajj jupamp chikaw alajjpachankir Reinonkapjjañapäna. Ukampis jan walit arrepentisit jaqerojja, Jesusajj akham sänwa: “Cheqpachapuniw nayajj jichhürun sissma, nayamp chikaw jumajj Paraisonkäta” sasa (Lucas 23:43). Uka jaqejj Paraisona mä arunjja, jachʼa jardinar uñtasit mä suma lugaran jakasiñwa suytʼañapäna. Ukatjja khitinakatejj jichhürunakan ovejanakar uñtatäpjjatap uñachtʼayapki ukanakajja, ‘wiñay jakañwa’ katoqapjjani, Paraisonwa jakapjjarakini.

Apóstol Juanajja, aka oraqen jakasiñajj uka tiempon kunjamänis uk akham sasaw qellqäna: “Diosan tabernaculopajj jaqenakampi chikäjjewa, jupanakampiw jupajj jakani, jupanakajj jupan markapäpjjarakiniwa. Diosajj jupanakampi chikäjjaniwa. Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa” sasa (Apocalipsis 21:3, 4).

Uka jaqejj Paraison jakasiñatakejja, jiwatanak taypit jaktayatäniwa. Janiw jupa sapakejj jaktayatäkaniti. Jesusajj uka toqet sänwa: “Horasajj purininiwa, ukapachaw taqe khitinakatï sepulturankapki ukanakajj arup istʼapjjani, ukatjja mistunipjjaniwa, khitinakatï suma luräwinak lurapki ukanakajja, jakañatakiw jaktanipjjani, khitinakatï jan walinak lurapki ukanakajja, juzgatäñatakiw jaktanipjjani” sasa (Juan 5:28, 29).

Maysa toqetjja, ¿kunas apostolonakampisa khitinakatï alajjpachan Jesusamp chikäñatak jakhutäpki ukanakampis pasani? Biblian akham siwa: “Jupanakaw Diosampina Cristompin sacerdotenakapäpjjani, waranqa maranakaw Cristomp chikajj reyinakjam apnaqapjjarakini” sasa (Apocalipsis 20:6). Cristomp chika apnaqanipkani uka chachanakampi warminakampejj aka oraqenwa jakasipjjäna. Ukatwa Diosan Reinopampi apnaqatäpkani uka jaqenakarojj munasiñampi uñjapjjani (Apocalipsis 5:10).

Jesusan jiwatap laykojja, aka oraqen jakasipkani uka jaqenakajj walja bendicionanakwa katoqapjjani. Nayrïr awk taykasat katoqawaytan uka juchsa Jesusajj chhaqtayjjarakiniwa. Jesusasa jupamp chika apnaqanipkani ukanakasa, Diosan taqe chuyma servirinakarojj perfectöpjjañapatakiw yanaptʼapjjani. Ukhamatwa jaqenakajj kunjamtï Diosajj qalltatpach jakasipjjañap munkäna ukham jakasipjjani. Diosasti Adanampi Evampejj wawanakapampi aka oraq phoqantapjjaspa ukwa munäna. ¡Adanan juchapat katoqktan uka jiwañas janirakiw utj-jjaniti!

Ukhamatwa Jehová Diosan munañap lurañ Jesusajj tukuyani. Jesusajj 1.000 maranak apnaqañ tukuyjjasajja, Awkiparuw Reino katuyjjani, perfector tukuyat jaqenakamp chika. Jesusajj humilde chuymanïtapatwa ukham lurani, ukatwa apóstol Pablojj akham qellqäna: “Diosajj taqe kunsa Yoqapar katuyjjani ukhajja, Yoqajja taqe kun katuykäna uka Awkiparuw katuyasjjarakini, ukhamat Diosajj taqeniru apnaqjjañapataki” sasa (1 Corintios 15:28).

Diosan amtanakap phoqasiñapatakejja, Jesusan yanaptʼapaw munasi ukwa qhan amuytanjja. Diosan amtanakapajj wiñayaw phoqasiskani, ukañkamasti Jesusajj kuntï jupa pachpat siskäna ukarjamaw jakarakini, jupasti ukham sänwa: “Nayätwa thakisa, cheqasa, jakañasa” sasa (Juan 14:6).