Jiwatat jaktayatäsajja, Jesusajj 11 apostolonakaparojj Galileankir mä qollur sarapjjam, ukan tantachasiñasataki sasaw säna. Yaqha 500 discipulonakajj ukankapjjarakïnwa, jupanakat yaqhepajj Jesusan jakaskatapat pächasisipkänwa (Mateo 28:17; 1 Corintios 15:6). Jesusan arunakap istʼasajja, cheqapuni jupan jakaskatap creyjjapjjänwa.

Jesusajja Diosajj alajjpachansa aka oraqensa munañanïña churatap qhanañchäna. Ukatwa jupanakar akham säna: “Ukhamasti sarapjjam, taqe markankir jaqenakar nayan discipulojar tukuyapjjam, bautisapjjam Awkina, Yoqana, espíritu santon sutipjjaru. Ukatsti taqe kuntï nayajj jumanakar yatichapksma ukanak phoqañ yatichapjjarakim” sasa (Mateo 28:18-20). Cheqansa Jesusajj jakaskänwa, Reinon suma yatiyäwinakapajj yatiyasispa ukwa munarakïna.

Jesusajja taqe arkirinakaparuwa mä arunjja, chachanakarusa, warminakarusa, wawanakarusa, jaqenakar nayan discipulojar tukuyapjjam sasin säna. Enemigonakajj janiw yatiyasiñapsa ni yatichasiñapsa munapjjañapäkänti, ukatwa Jesusajj akham säna: “Diosaw taqe munañanïñ churitu, alajjpachansa ukhamaraki aka oraqensa” sasa. ¿Ukampejj kamsañsa munäna? Jesusajj sänwa: “Nayajj sapürupuniw jumanakampïskta, akapachajj tukuskani ukapachkama” sasa. Ukham sasinjja, Diosan arunakap yatiyirinakajj taqeniw milagronak lurapjjani sasajj janiw sañ munkänti, jan ukasti espíritu santo katoqapjjañapäna.

Jiwatat jaktayatäsajja, Jesusajj “pusi tunka urunakaw” discipulonakapar uñstäna. Jesusajj jupanakar may may cuerponwa uñstäna, “ukhamat jupajj cheqpachapuni jakaskatap jan pächasis yatipjjañapataki”, jupanakarojj “Diosan Reinopatwa” yaticharakïna (Hechos 1:3; 1 Corintios 15:7).

Apostolonakajj Galileankasipkäna ukhajja, Jesusajj Jerusalenar kuttʼapjjañapatakiw jupanakar khitjjäna. Jupanakampi uka markan tantachtʼasisajja, akham sasaw sarakïna: “Jan Jerusalenat mistupjjamti, antisas kuntï alajjpachankir Awkejj arskäna, kuntï nayatsa istʼapkta uk suyasipkakim. Juanajj umampiw bautisäna, akat mä qhawqha urunakatjja, jumanakajj espíritu santompi bautisatäpjjätawa” sasa (Hechos 1:4, 5).

Qheparusti Jesusajj mayampiw apostolonakapamp tantachasïna. “Betania markakamaw jupanakar irpäna”, uka markajj Olivos Qollu mistuñankänwa (Lucas 24:50). Jesusajj walja kutis apostolonakapar sarjjañapjjat qhanañchkchïnjja, jupanakajj Jesusan Reinopajj aka oraqenkañapäkaspas ukham amuyasipkakïnwa (Lucas 22:16, 18, 30; Juan 14:2, 3).

Apostolonakapajj akham sasaw jupar jisktʼapjjäna: “Tata, ¿aka tiemponti Israel markatakejj reino mayamp uttʼayaskta?” sasa. Jesusasti sänwa: “Alajjpachankir Awkejj munañaparjamaw tiemponaksa señalat urunaksa uskuwayi, ukanak yatiñajj janiw jumanakar waktʼapktamti” sasa. Ukatjja kuntï jupanakajj lurapjjañapäki uk mayampiw akham qhanañchtʼäna: “Espíritu santojj jumanakjjar jutkani ukhaw chʼam katoqapjjäta, Jerusalén markanwa nayat qhanañchapjjarakïta, taqe Judeana, Samariana ukhamaraki taqe aka oraqpachana” sasa (Hechos 1:6-8).

Apostolonakajj Jesusampiw Olivos Qollunkasipkäna, ukhamaruw jupajj alajjpachar makatjjäna. Mä qenayaw jupar jamastʼayasin chhaqtayjjarakïna. Jiwatat jaktasajja, Jesusajj may may cuerponwa uñstäna. Ukampis jichhajj qhepa jañchi cuerpopatjja, espíritu cuerponiw alajjpachar makatjjäna (1 Corintios 15:44, 50; 1 Pedro 3:18). Apostolonakajj alajjpacharuw uñchʼukisipkäna, ukhamaruw “janqʼo isini pä jaqenakajj jupanak jakʼan uñstäna”. Uka angelanakajj  jañchi cuerponïpjjänwa, akham sasaw jupanakar jisktʼapjjarakïna: “Galileankir tatanaka, ¿kunatsa alajjpach uñtat sayasipkta? Jumanak taypit alajjpachar aptatäjje uka Jesusajja, kunjamtï jumanakajj alajjpachar sarir uñjapktajja ukhamarakiw jutani” sasa (Hechos 1:10, 11).

Jesusajj janiw walja jaqenakan uñjkat aka oraqet sarkänti, jan ukasti jupat jan jitheqtir arkirinakapan uñjatakiw sarjjäna. Kuttʼankani ukhajj “ukhamarakiw jutani”, jan jitheqtir arkirinakapakiw Reyjam apnaqjjatap amuyapjjani.

Apostolonakajj Jerusalenaruw kuttʼjjapjjäna. Jutïr urunakanjja, yaqha discipulonakampiw tantachasipjjäna, “Jesusan jilanakapampi, María mamapampi” kunaw tantachasipjjäna (Hechos 1:14). Jupanakajj wal oración lurapjjäna. Oracionanakapanjja Judas Iscariote lanti yaqha discípulo ajlliñatakiw mayisipjjarakïna, ukhamat 12 apostolöjjañataki (Mateo 19:28). Khitirutejj ajllipkäna ukajj Jesusan luräwinakapsa jaktayatätapsa uñjañapänwa. Uka toqet kunas Diosan munañapajj uk yatiñatakejja, jupanakajj suerte willtapjjäna, ukham suerte willtañat janiw ukat uksarojj Biblian parlasjjeti (Salmo 109:8; Proverbios 16:33). Matiasaruw ajllipjjäna, jupajj inas Jesusajj 70 discipulonakar khitkäna ukanak taypinkchïna. Jichhasti “tunka mayani apostolonakamp chika jakhutäjjänwa” (Hechos 1:26).

Jesusan alajjpacharu makatjjatapat tunka urunak pasatatjja, judionakaw 33 maran Pentecostés Fiesta amtapjjañapäna. Jerusalenanjja mä 120 discipulonakaw mä altus utan tantachtʼatäsipkäna. Ukhamaruw wali chʼaman wayras thaytʼankaspa ukham istʼasïna, utpacharuw phoqantarakïna. Ukatjja lajjranakar uñtat nakhaskir ninanakaw uñjasïna, sapa mayniruw mayakam purirakïna. Taqe discipulonakarakiw kunayman arunakat parlañ qalltapjjäna. Jesusajj khitanïw siskäna uka espíritu santo katoqapjjäna (Juan 14:26).