Jesusajj perfecto jaqënwa, janiw mayni jaqenakjamajj kunayman llakinakansa jan walinakansa uñjasirïkänti. Ukhamäkchïnsa jupajj jaqenakar wal munasïna, walja toqenakatwa yanaptʼarakïna. Jesusajja wali khuyaptʼayasiritapatwa jaqenakar yanaptʼäna. Ukwa 32, 37, 57, 99 yatichäwinakan yatjjatsna.

Jesusarojja wayn tawaqonakasa, jilïrinakasa, taqeniw parlañatak jakʼachasipjjäna. Jupajj janiw jachʼa jachʼa tukurïkänti ni yaqhachasirïkänsa. Jesusan sapa maynit llakisitap uñjasajja, jaqenakajj wal jupar jakʼachasipjjäna. Ukwa 25, 27, 95 yatichäwinakan yatjjatsna.

Jesusajja sapäkasasa jan ukajj Diosan servirinakapampi chikäkasasa Awkiparojj taqe chuymaw orasirïna. Janiw manqʼañatakik oraskänti, jan ukasti walja kutiw oración luräna. Oración lurasajj Awkiparuw yuspäräna, jachʼañcharakïnwa, wakiskir amtanakar puriñatakis yanaptʼap mayirakïnwa. Ukwa 24, 34, 91, 122, 123 yatichäwinakan yatjjatsna.

Awisajja Jesusajj samartʼañ munarakïnwa, ukampis janiw askip thaqkänti, jan ukasti jaqenakan askipwa thaqäna. Jesusat ukham lurañ yateqasiñasarakiwa. Ukwa 19, 41, 52 yatichäwinakan yatjjatsna.

Jesusajj kunatsa mayninakar perdonañajj wakisi ukwa arkirinakapar yatichäna, jupa pachpasa arkirinakapar perdonañatakejj jankʼakïtapwa uñachtʼayarakïna. Ukwa 26, 40, 64, 85, 131 yatichäwinakan yatjjatsna.

Profecianakanjja, jila parte judionakajj janiw Jesusan Mesiasätap creyipkaniti, enemigonakapas jiwayapjjaniwa sasaw qhanañchjjäna. Ukanak yatisajja Jesusajj jaqenakar yanaptʼañatak janiw chʼamachaskaspänti. Ukampis Jesusajj taqe chuymaw yatiyäna, ukhamatwa taqe arkirinakaparojj mä uñachtʼäwi jaytäna. Ukwa 16, 72, 103 yatichäwinakan yatjjatsna.

Jesusajj janiw mayni jaqenakjamäkänti, jupajj wali yatjjattʼatänwa wali yatiñanirakïnwa. Jupajj perfectönwa, ukhamasti janiw khitis kunanaktï Jesusajj lurkäna ukanak lurkaspänti. Ukhamäkchïnsa jupajj humilde chuymanïnwa, mayninakarus servirakïnwa. Ukwa 10, 62, 66, 94, 116 yatichäwinakan yatjjatsna.

Apostolonakasa mayni jaqenakasa Jesusat jan yateqasipkäna, jan ukajj yatichäwinakaparjam jan sarnaqapkäna ukhajja, Jesusajj wali pacienciampiw jupanakar uñjäna. Jehová Diosar jukʼamp jakʼachasiñatakejj kunanak lurapjjañapas wakisïna ukanakjja pacienciampiw yaticharakïna. Ukwa 74, 98, 118, 135 yatichäwinakan yatjjatsna.