Jesusajj fariseon utapanwa mä usut jaqer qolläna. Ukankkasajja, kunjamsa yaqha invitadonakajj suma lugaranak qontʼasiñatak thaqapjjäna uk uñjäna. Ukatwa kunatsa humilde chuymanïñajj wakisi uk yatichäna.

Jesusajj sänwa: “Maynejj casarasïwin mä jachʼa manqʼäwir jumar invitkätam ukhajja, jan jumajj mä suma lugarar qontʼasimti. Inas jumat sipans jukʼamp yäqat jaqejj invitatäskchi. Khititï jumarus juparus invitapktam ukajja, akham sasaw jutasin jumar sätam: ‘Jupay uka cheqar qontʼaspan’ sasa. Jumajj mä phenqʼaw jan suma lugarar qontʼasir sarjjäta” sasa (Lucas 14:8, 9).

Jesusajj saskakïnwa: “Invitapkätam ukhajja, jan suma lugaräki uka cheqar qontʼasir saram, ukhamatwa khititï invitktam ukajja, juman ukar jutasin akham sätam: ‘Amigo, suma cheqar qontʼasinim’ sasa. Ukhamatwa jumamp chika invitatäpki taqe uka jaqenak nayraqatan jachʼar aptatäyäta” sasa. Janiw respeto uñachtʼayañ laykukejj ukham lurañapäkänti. Jesusajj akham sänwa: “Khititï jachʼa jachʼa tukki ukajja jiskʼachatäniwa, khititï jiskʼar tukki ukajja jachʼar aptatäniwa” sasa (Lucas 14:10, 11). Cheqansa humildëpjjañapatakiw chʼamañchtʼaskäna.

Ukatjja, invitkäna uka fariseojj kunjamsa Diosar kusisiykir mä manqʼäwi wakichaspa, ukwa Jesusajj akham säna: “Kunapachatï jumajj chika ururu, jan ukajj cenaru manqtʼasiñatak invitkäta ukhajja, janiw amigonakamarusa, ni jilatanakamarusa, ni familiaranakamarusa, ni utam jakʼan utjasipki uka qamir jaqenakarus invitañamäkiti. Jumatï ukham lurätajja, inas jupanakajj invitapjjarakchïtam, ukhamatwa jumarojj luratamat kuttʼayapjjätam. Jumajj mä jachʼa manqʼäwi wakichkäta ukhajja, pobrenakaru, amparat usutanakaru, cojonakaru, juykhunakar invitañamawa, ukhamatwa jumajj wal kusisirakïta. Jumar kuttʼayañatakejj janiw jupanakan kunas utjkiti” sasa (Lucas 14:12-14).

Cheqansa amigonakasaru, familiaranakasaru jan ukajj vecinonakasaru manqtʼasiñataki invitañajj walikïskiwa, Jesusatakis ukajj walikïskänwa. Ukampis pobrenakaru, amparat usutanakaru, cojonakaru, juykhunakaru invitirejj walja bendicionanakwa katoqani sasaw Jesusajj säna. Jupar invitkäna uka jaqerusti akham sänwa: “Cheqapar sarnaqer jaqenakajj jaktanipkani ukhaw jumajj pago katoqjjäta” sasa. Yaqha invitat jaqesti akham sarakïnwa: “Khititï Diosan Reinopan manqʼki ukajj kusispan” sasa (Lucas 14:15). Uka jaqejj Diosan Reinopankañajj kunja kusiskañänisa ukjja amuyänwa. Ukampis janiw taqenejj ukham amuyapkänti, ukatwa Jesusajj akham säna:

“Mä jaqejja mä cena wakichäna, walja jaqenakaruw invitarakïna. Manqʼañ horasäjjäna ukhajja, mä esclavoparuw jupajj khitäna, khitinakatï invitatäpkäna ukanakar akham saniñapataki: ‘Jutapjjam, taqe kunas wakichatäjjewa’ sasa. Jupanakajj jan sarañ laykojja, taqeniw kunayman parlapjjäna. Nayrïristi akham sänwa: ‘Mä oraq alasta, uk uñjir sarañajätwa, mirä amp suma, janjamakiw sarkäti’ sasa. Maynisti sarakïnwa: ‘Phesqa yuntanak alasta, ukanak yantʼir sarañajätwa, mirä amp suma, janjamakiw sarkäti’ sasa. Maynejj akham sarakïnwa: ‘Jichhakiw casarasta, ukhamajj janjamakiw jutkiristti’ sasa” (Lucas 14:16-20).

Jan sarañ laykukiw ukham parlapjjäna. Uka jaqenakajj janïr alaskasaw oraqepsa yuntanakapsa sum uñakipapjjañapäna, janiw jichhakejj sarapjjañapäkänti. Kimsïr jaqesti casaratäjjänwa, janiw casarasiñatak wakichasiñapäkänti, manqʼäwirojj saraskaspänwa. Jan jutañ munapjjatapatjja, invitirejj wal colerasïna. Esclavoparusti sänwa:

 “Anchhitpach markan jachʼa thakinakaparu ukhamaraki jiskʼa thakinakapar saram, pobrenakaru, amparat usutanakaru, juykhunakaru, cojonakar irptanim” sasa. Esclavojj uka jaqenakar irptanïna ukhajja, chʼusa lugaranakajj utjaskakïnwa. Ukatwa invitir jaqejj akham säna: “Marka anqäjjan utjki uka thakinakaru, jiskʼa thakinakar saram, jaqenakarojj iyawsayasin irpantanim, ukhamat utajan phoqäñapataki. Nayasti sapjjsmawa, khitinakatï nayraqat invitatäpkäna uka jaqenakatjja, janiw maynis manqʼajat malltʼkaniti” sasa (Lucas 14:21-24).

Uka uñachtʼäwejja, kunjamsa Jehová Diosajj alajjpachankir Reinor mantapjjañapatakejj Jesusampi jaqenakar jawsayi ukwa qhanañchistu. Nayraqatajja, judionakaruw jawsasïna, cheqpachansa judionakan religionap pʼeqtʼirinakaruw jawsasïna. Ukampis Jesusan yatiyataparojja waljanejj janiw istʼañ munapkänti. Ukatwa Jesusajj yaqhanakaruw jawsasini sasin säna, humilde chuyman judionakaru, prosélito jaqenakaruw jawsasiñapäna. Uka qhepatsti, judionakajj jiskʼachapkäna, Diosatakejj janis walïpkaspa ukham uñjapkäna ukanakaruw jawsasiñaparakïna (Hechos 10:28-48).

Amtañäni, “khititï Diosan Reinopan manqʼki ukajj kusispan” sasaw Jesusamp chika invitatäkäna uka jaqejj säna. Jesusajj parlkäna uka uñachtʼäwirjamajj ukham kusisiñapuniw utjaskani.