Jesusajja Jerusalén markar sarasajj Perea cheqnamwa pasaskäna. Ukhamaruw mä qamir waynajj jupan ukar tʼijunïna, nayraqataparuw killptʼasirakïna. Uka waynajj “marka apnaqerinakat” maynïrïnwa, jupajj inas sinagogan pʼeqtʼchïna jan ukajj Sanedrinankirinakat maynïrïchïna. Uka waynajj akham sasaw Jesusar jisktʼäna: “Suma Yatichiri, ¿wiñay jakañ katoqañatakejj kun lurañajas wakisi?” sasa (Lucas 8:41; 18:18; 24:20).

Jesusasti sarakïnwa: “¿Kunatsa suma Yatichiri sista? Janiw khiti jaqes sumäkaspati, jan ukasti Diosakiw sumajja” sasa. “Suma” sasajj rabinonakaw jachʼañchasipjjerïna, ukatwa uka waynajj ukham sispachäna. Jesusajj suma yatichirïkchïnsa, Jehová Diosarukiw “suma” sasispa sasaw juparojj qhanañchäna.

Jesusajj uka waynarojj sänwa: “Wiñay jakañ katoqañ munsta ukhajja, Diosan mandamientonakap phoqaskakim” sasa. Uka waynajj sarakïnwa: “¿Kawkïr mandamientonak phoqañajas wakisi?” sasa. Jesusasti Tunka Mandamientonakatjja, phesqa mandamientonakwa akham sasin arsüna: “Janiw jaqe masimar jiwayätati, janiw adulterio jucha lurätati, janiw lunthatasïtati, janiw falso testigot saytʼätati, awkimarus taykamarus respetam” sasa. Ukjjarojja, wali wakiskir mä mandamiento arsurakïna akham sasa: “Jaqe masimarus juma kikparjam munasirakim” sasa (Mateo 19:17-19).

Uka waynajj sarakïnwa: “Nayajj taqe ukanakwa phoqta. Ukhamajj ¿kunamp lurañajas wakisispa?” sasa (Mateo 19:20). Wiñay jakañ katoqañatakejja, uka waynajj inas mä suma musparkañ luräwi lurañapas wakiskaspa ukham amuychïna. Taqe chuyma ukham jisktʼasitap amuyasajja, Jesusajj ‘munasiñampiw uñkatäna’ (Marcos 10:21). Ukampis Jesusar arkañapatakejj ¿kunas jarkʼpachäna?

Uka waynajj kunatï jupan utjkäna ukanakarojj wal munasïna. Jesusajj sänwa: “Ak phoqañamaw wakisi, kunatejj utjktam ukanak aljir saram, pobrenakar churanjjam, ukhamatwa alajjpachan suma imatanakamajj utjani. Ukatjja  jutam, nayar arkita” sasa. Uka waynajja pobrenakaruw qollqep churaspäna, pobrenakajj janiw uk kuttʼayapkaspänti, ukhamatwa Jesusan arkiripar tukuspäna. Ukampis wali llaktʼataw sarawayjjäna, uk uñjasajja Jesusajj jupat wal sinttʼaspachäna. Walja utjirinïtap laykojj uka waynajj janiw kunatï cheqpachapun valoranïki uk amuykänti (Marcos 10:21, 22). Ukatwa Jesusajj akham säna: “¡Qollqeninakatakejj Diosan Reinopar mantañajj kunja chʼamakïkani!” sasa (Lucas 18:24).

Jesusajj saskakïnwa: “Cheqansa mä camellotakis chʼukuñ aguj nayra pasañajj faciläspawa, ukampis mä qamir jaqetakejj Diosan Reinopar mantañajj jukʼamp chʼamäniwa” sasa. Ukanak istʼasajja discipulonakajj wal musparapjjäna. Akham jisktʼapjjarakïna: “Ukhamächi ukhajja, ¿khitipunirak salvatänisti?” sasa. ¿Mä jaqen salvasiñapajj wali chʼamapunïspati? Jesusajj jupanakar uñkatasajj akham sänwa: “Jaqenakatakejj jan lurañjamäki ukanakajja, Diosatakejj lurasikispawa” sasa (Lucas 18:25-27).

Pedrosti akham sarakïnwa: “Nanakajj taqe kun jaytasaw jumar arkapjjsma, ukhamajj ¿kunas nanakatakejj utjani?” sasa. Ukhamatwa qamir waynat sipansa, suma amtar puripjjatap uñachtʼayäna. Jesusasti suma amtar puripjjatapatjja, akham sänwa: “Taqe kunas machaqat luraskani, jaqen Yoqapas kʼajkir jachʼa tronopan qontʼaskani ukhajja, jumanakajj tunka payani trononakaruw qontʼasipjjäta, nayar arkapjjatam layku. Israelankir tunka payani tribunakaruw juzgapjjarakïta” sasa (Mateo 19:27, 28).

Ukham sasajja Jesusajj kunjamsa jutïrin aka oraqejj Edén jardinjam tukuyatäni uka toqetwa parlaskäna. Pedrosa mayni discipulonakasa Jesusampi chikaw paraisoptayat aka oraqjjar apnaqanipjjani. ¡Suma amtar puripjjatapatjja jachʼa bendicionwa katoqapjjani!

Ukampis janiw jutïrinaki bendición katoqapjjañapäkänti, jan ukasti uka urunakansa bendicionanak katoqjjapjjänwa. Jesusajj sänwa: “Khititejj Diosan Reinop laykojj utsa, warmsa, jilanaksa, awk tayksa, jan ukajj wawanaksa jaytki ukajja, ukanakat sipansa jukʼamp walja jichha tiempon katoqani, jutir pachanjja wiñay jakañ katoqarakini” sasa (Lucas 18:29, 30).

Discipulonakajja, kawkir sarkasasa jilat kullakanakampiw familianakapat sipansa sum qamartʼasipjjäna, maynit maynikamas yanaptʼasipjjäna. Ukampis qamir waynajj janiw uka bendicionanak katoqkaniti, janirakiw Diosan Reinopan wiñay jakañsa katoqkaniti.

Jesusajj saskakïnwa: “Nayrankirinakatjja waljaniw qhepankapjjani, qhepankirinakasti nayrankapjjarakiniwa” sasa (Mateo 19:30). ¿Kamsañsa uka arunakampejj munäna?

Qamir waynajja, niyakejjay judionakan pʼeqtʼiripächïnjja ‘nayrankkaspas’ ukhamänwa. Jupajj Diosan leyinakap yatiri phoqeri jaqënwa, ukhamajj mayni judionakat sipansa, jankʼakiw arkañapäna. Ukampis jupatakejj qollqepampi utjirinakapampiw nayrankäna. Maysa toqetjja, mayni judionakajj Jesusan yatichatapatwa, cheqa arunak yateqapjjäna, Diosatakjam sarnaqañwa yateqapjjarakïna. Jupanakajj ‘qhepankapkaspas’ ukhamänwa, qhepatjja ‘nayrankapkaspas’ ukhamäjjänwa. Jupanakaw Jesusamp chikajja alajjpachan trononakar qontʼasipjjani, paraisoptayat oraqerus apnaqapjjani.