Supayax “aka uraqin jaqinakarux wali sallqjañanak luri” siw Bibliaxa (Apocalipsis 12:9). Supayampi saxranakapampixa kuntï Bibliax yatichki uk janiw yatiqañas munapkiti. Kawkhantï ajayunakax jakapki ukarus jiwatanakax sarapkaspa ukham amuyapxañasatakiw sarxanakax chʼamachasipxi. Kunjamatsa ukhamanak lurapxi, uka tuqit jichhax amuytʼañäni.

Kunapachatï jaqinakax aka Uraqin jakasax jiwxapxi ukhaxa, kawkhantï ajayunakax jakapki ukaruw sarxapxi sasaw walja yupaychäwinakax yatichapxi.

Ukampis Diosan Arupax janiw ukham yatichkiti. Amuytʼañataki, Diosax Adanar lurkäna ukat parlkasaxa, Bibliax akham siwa: “Ukxarusti Diosax jaqirux laqʼatwa luräna, nasapat phustʼasinwa jakaña churarakïna. Ukhamatwa jaqix jakxäna” sasa (Génesis 2:7). Ukhamasti, Diosax Adanan cuerpoparux jiwatat jakaskakiñapatakix janiw kuns uchkänti.

Kunapachatï mä jaqix jiwxi ukhaxa janiw kunas jakxiti siw Bibliaxa. Jiwatäxatap laykux janiw jakirinakarux jan waltʼaykaspati ni yanaptʼkarakispasa. Bibliax akham siwa:

•  “Jiwxapxi ukapachaxa, laqʼaruw tukxapxi, ukürpachaw amtanakapax tukusxi.” (Salmos 146:4.)

• “Ukxarusti, khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti, janirakiw kunsa jikxatapkarakiti, jupanakax armatäxatap layku. Kuna lurañatix jumataki utjkani ukxa chʼamamarjam luram, jumax sepulcror sarkätas ukanxa janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti.” (Eclesiastés 9:5, 10.)

Kunjamatix animalanakax jiwapkixa uka kikparakiw jaqinakax jiwapxi sasaw Bibliat apstʼat yaqha jiskʼa tʼaqanakax qhanañcharakistu (Eclesiastés 3:19, 20). Jiwatanakax janiw kunsa yatipkiti, maynix jiwxi ukhax janipuniw kunas jupat jakxiti.

Jumatï qalltat tukuykam Biblia liytʼasmaxa, jiwatanakax yaqha chiqan jakapxi siski uka yatichäwi janiw jikxatkätati. Uka yatichäwisti Supayampin saxranakapampin yatichäwipakiwa. Jehová Diosax taqi kʼari yatichäwinakxa uñisiwa (Proverbios 6:16-19; 1 Timoteo 4:1, 2).

Supayaxa, chʼamakaninakampiw jaqinakarux sallqjaraki. Mä chʼamakanixa ñanqha ajayunakampi parlir jaqiwa. Walja jaqinakasa, chʼamakaninakasa uka arunak istʼasax jiwatanakan ajayunakapas parlanipkaspa ukham amuyapxi. Ukampis kunjamtï Bibliax siskixa, taqi ukanakax janipuniw chiqäkiti (Eclesiastés 9:5, 6, 10).

Ukhamaxa, ¿khitinakatsa uka arunakax jutpacha? ¡Jïsa saxranakan arunakapawa! Saxranakaxa jaqinakan jakäwipat sum yatikipapxi, kunjam parlirïnsa, kunjam jaqïnsa, kunjam uñnaqanïnsa, ukhamarak kunanaks yatïna ukat kuns lurirïna taqi ukanaka. Ukatwa sarxanakatakix jiwir jaqinakax kunjamäpkäntix ukhamar tukuñax jan chʼamäkiti (1 Samuel 28:3-19).

Supayaxa jiwatanak tuqit kʼari cuentonakampirakiw sallqjaraki. Uka kʼari cuentonakaxa Biblian chiqpach yatichäwinakatwa jaqinakarux jithiqtayi (2 Timoteo 4:4).

África uksanxa akham cuentonakaw istʼasi, maynin jiwatapatxa wasitat sarnaqaskir uñjapxiritayna. Khawkhantï jakasirïnxa  ukkhat wali jaya chiqan sarnaqaskir uñjapxiritayna, ukham cuentox wali uñtʼatawa. Ukampisa, aka jisktʼat amuytʼma: ‘jakaskchispa ukhaxa, ¿kunatarak munat masinakapatsa familiapatsa wali jaya chiqar jakir sarxaspasti?’

Ukatxa, jiwkäna uka kikpa jaqir uñjasaxa, ¿janit jiwirijaw sasax pantjasipkaspa? Amuytʼañataki, mä kutixa, Jehová Diosan pä Qhanañchirinakapaw mä comunidadan yatiyasipkäna, ukat uka jilatanakax mä chuymankipstat jaqin arknaqatäpxatap amuyasipxäna. ¿Kunatsa arknaqpachäna? Uka jaqin mayni jilapaw jiwxatayna, ukat uka Qhanañchirinakatxa maynix jilapäkaspas ukham amuyatayna. Chiqas uka chuymankipstat jaqix pantjasiskänwa, ukampis janiw pantjastwa siskänti. Uka jaqix qhipatxa, ¡muspharkañanakwa amigonakaparusa uta jakʼankir masinakaparus yatiyxpachäna!

Jumax inas istʼirïsta samkanakat parlirsa uñstäwinakatsa ukhamarak arunak istʼas parlirinakarusa. Chiqasa khitinakatix ukhamanakan uñjasipxi ukanakax sutjasipxiwa. Inti jalant tuqinkir África uksan  jakasir Marien sat warmirux arumanakaw jiwat awichapan arup arnaqasiniskir istʼirïna. Ukham istʼasax wali sustjataw arnaqasirïna ukat taqpach familiapar ikit sarthapiyarakirïna. Tiempompix luqhïxänwa.

Jiwatanakax jakasipkaspa ukhaxa, ¿familiapar sustjas tʼaqhisiyapxaspati? Chiqas janiw ukham lurapkaspati. Saxranakaw jan wali luririnakaxa jupanakaw jaqinakar ukham tʼaqhisiyapxi.

Ukampisa, yaqhipanakax wakiskir suma arunakwa istʼapxi, ¿kamssnas ukatxa? Mä kutixa, Gbassay sat Sierra Leonan jakasir warmix usuntatänwa. Ukat samkanwa jiwat awkipax uñstatayna. Akham sataynawa, mä quqat mä laphi apaqtʼasïta ukat umamp waktʼayasax uka um umtʼäta. Janïr uk lurkasax janiw khitimpis parlañamäkiti sasa. Uka warmixa, kunjamtï jiwat awkipax siskatayna ukham lurasax usupat walirtxänwa.

Ukat mä warmirux jiwkäna uka chachapaw mä arumax uñstarakitayna. Suma uñnaqtʼani ukat suma isimp isthaptʼata ukham uñjta sarakïnwa.

Chiqasa uka uñstäwinakarusa uka arunakarusa maynix wali askitwa uñjarakispa. Ukampisa, ¿Diosatti jutpacha? Janiwa, janiw Diosat jutkiti. Jehová Diosax  ‘chiqa Diosawa’ siw Bibliaxa (Salmo 31:5). Jehová Diosaxa janipuniw jiwasar sallqantkistaspati. Saxranakakiw uk lurixa.

¿Aski lurir saxranakax utjpachati? Janiwa. Saxranakax inas yanapirïpkaspas ukham tukupxchispa. Kunapachatï Supayax Evampi parlkäna ukhaxa wali munasirïkaspas ukham arxayäna (Génesis 3:1). Ukampisa, Evax Supayan arunakapar istʼäna ukhaxa, ¿kunas pasäna? Jiwañaruw purïna.

Chiqasa mä uñisirix janiw chiqpach amigükaspati, jan ukasti sallqjañataki jan ukax tʼaqhisiyañatakiw suma amigükaspas ukham tukuspa. Diosan Arupaxa Supayat akham siwa: “Pachpa Supayapuniw ukham mä qhana angeläkaspas ukham tukuxa” sasa (2 Corintios 11:14).

Jichhürunakanxa Jehová Diosax janiw samkanak tuqi, uñstäwinak tuqi ni ajayunak tuqisa jaqinakarux yatiykiti. Diosaxa Biblian qillqatäki uka arunakapampiw jaqinakarux yatiyi, ukat irpanaqasirakisa “ukhamat Diosankirinakax wali yatiñanïpxañapataki, taqi casta suma luräwinakatak suma wakichatäpxañapataki” (2 Timoteo 3:17).

Ukhamaxa, Jehová Diosax jiwasar munasitap laykuwa Supayan sipitanakapat qhanañchistu. Supayasa saxranakapasa kunja ñanqhanakäpxis ukxa Diosax sum yati.