Supayasa saxranakapasa, ¿kunatsa jaqinakar sallqjañatakix chʼamachasipxi? Jupanakamp chika Diosar kutkatasirïñaswa munapxi. Jupanakaw yupaychayasiñ munapxi, kʼarinakapar iyawsna ukat kunanakatï Diosan nayraqatapan jan walïki ukanak lursna uk munapxi. Uka luräwinakatxa jiwatanakat amtañäki uka jan wali costumbrenakawa.

Kunapachatï maynix familiasan jiwxi ukhaxa chiqas wali llakinwa uñjastanxa ukat llaktʼataw sarnaqaraktanxa, jachañas janiw jan walïkarakiti. Lazaron jiwatap yatisax “Jesusasti jachänwa” siw Bibliaxa (Juan 11:35).

Jiwatanakar amtañataki costumbrenakax aka uraqpachanxa waljapuniwa ukat mayj mayjarakiwa. Uka costumbrenakatxa, yaqhipanakax Bibliarjamax janiw juchäkiti. Ukampis yaqhip costumbrenakaxa, jiwatanakax jakasipkaspasa ukat jaqinakarux uñjapkistaspasa, ukham amuyunakar uttʼayatawa. Velorionaka, llakimp sinti atipjayasiñanaka, jiwatar imxañataki wali suma kʼachachtʼas waktʼayañanakasa, jiwatan ajayupar jan colerayañataki amtampi uñstayatawa. Ukampisa, “jiwatanakax janiw kunsa yatipkiti”. Ukhamax khitinakatï ukanak lurapkixa, Supayan kʼari  arunakaparuw yanaptʼasipkaraki (Eclesiastés 9:5).

Ukat jiwatanakax jan yanaptʼataxa jan walinwa maynir uñjasiyaspa, uka amtampi uñstayataw mayni costumbrenakaxa. Mayni jiwxi ukhaxa 8 urunakatsa, mä phaxsitsa ukat mara phuqatarusa jiwatataki mä misa lurayarapipxi ukaxa jiwirin ajayupar ajayunakax jakapki ukar ‘makhatañapatakiw’ yanaptʼi sapxiwa. Ukat mayax jiwatanakar manqʼañanaka umañanak churañawa, ukax wali uñtʼat costumbrerakiwa.

Ukham costumbrenakax janipuniw walïkiti kunalaykutix Supayan kʼari arunakaparjamaw uka luräwinakaxa. Jiwasatï saxranakan wiytat costumbrenakarjam sarnaqsna ukhaxa, ¿Jehová Diosatakix walikïskaspati? ¡Janipuniw walïkaspati! (2 Corintios 6:14-18.)

Jehová Diosan Qhanañchirinakapaxa janipuniw Supayan uñstayata kʼari costumbrenakaparjam sarnaqapkiti. Jan ukasti jakkir jaqinakar chʼamañchtʼañataki ukat yanaptʼañatakiw chʼamachasipxi. Ukat khitinakatix jiwxapxi ukanakarux Jehová Diosakiw yanaptʼaspa uk sum yatipxaraki (Job 14:14, 15).

Yaqhip jaqinakax saxranakampiw parlapxi jan ukax chʼamakaninak taypiw saxranakamp parlapxaraki. Taqi ukanakax layqasiñanaka satawa. Jaqi masipar layqjayañanaka, cocata, naipet suerte uñxatayasiñanaka, jiwatanakar jisktʼasiñanaka taqi ukanakas layqasiñanakarakiwa.

Uka luräwinakatxa Bibliax akham qhanañchi: “Jan jumanakat kawkïris [...] yatiri jaqis tukupxamti, janiraki jutkan uka urunakat yatxatañanakarusa uchasipxamti, janiraki layqanakasa tukupxamti. Janiraki kʼarimpi lunthatirinakarus jisktʼasipxamti, ni yatir layqa jaqirusa, janiraki chʼamakani ajayunakarus mayisipxamti, ni jiwatanakan ajayunakaparus thaqapxamti. [Jehová] Diosamarusti, kawkïri jaqinakatix ukham lurapki ukanakax axtasiyapxiwa.” sasa (Deuteronomio 18:10-12).

¿Kunatsa Jehová Diosax ukham arunakamp iwxtʼistu?

 Jiwasan askisatakiw Jehová Diosax layqasiñanakat jithiqtañasatakix ukham iwxtʼistu. Khitinakatix layqasiñanakar mitisipki ukanakax kunjsa tʼaqhisipxi uk yatisaw Diosax jaqinakat llakisa wali munasiñampi sum iwxtʼistu.

Brasilan jakasir Nilda warmix chʼamakanïnwa, saxranakax juparux wal tʼaqhisiyatayna. Jupax akham siwa: “Saxranakan [...] mantatayätwa katuntasas jan walinak munkir jan munkir lurayapkitaspa ukhamänwa. Awisax amuyuni awisax jan amuyunïkiristsa ukhamayätwa, ukat pʼiqit usutäpanwa hospitalar apxapxitu. Saxranakax wal arknaqapxirïtu jan amuyunjamäxayätwa. Qullanak umasa, machjasisa, cigarro pitasa ukhamaw sarnaqayäta. Walja maranakaw ukham lurayäta” sasa.

Ukatxa, Jehová Diosana ukat Qhanañchirinakapan yanaptʼapampiw Nildax saxranakat qhispiyasïna, jichhax mä suytʼäwini ukat kʼumara ukhamaw jakasiskaraki. Ukat saskakiwa: “Janipun saxranakampix mitisipxamti ni mä ratukisa, kunattix jupanakax wali ñanqhanakäpxiwa” sasa.