1, 2. ¿Kunatsa Diosat mayisiñxa jachʼa churäwjama uñjañasaxa, ukatxa Bibliax yatichki uka mayisïwit kunatsa yatxatañax wakisi?

 ALAXPACHANAKAT sipansa aka Uraqixa wali jiskʼakiwa. Ukhamasti, “alaxpach akapach [uraqi] Lurir” Jehová Diosatakixa, yuruna mä uma chʼaqäkaspasa ukhamaw markanakaxa (Salmo 115:15; Isaías 40:15). Ukampisa, “[Jehová] Tatitux artʼasirinakapan jakʼapankaskiwa, taqpach chuymamp jupat artʼasirinakan jakʼapankiwa. Jupar arkirinakan munataparjamaw phuqhi, arnaqasitanakap istʼi, qhispiyaraki” siw Bibliaxa (Salmo 145:18, 19). Aka arunakaxa kamsañsa munpacha uka tuqit amuytʼma. Taqi chʼaman Inuqirixa jakʼasankiwa, ‘taqpach chuymampitix artʼasiñänixa’ istʼistaniwa. ¡Wali jachʼa churäwiwa taqi chʼaman Diosar jakʼachasiñaxa!

² Ukhamasti, Jehová Diosampi istʼatäñ munasaxa, munañaparjamawa mayisiñasa. Ukampisa, Bibliana mayisïwi tuqita qillqatäki uk jan yatisaxa, ¿kunjamsa Diosat mayisipxsna? Wali wakisiriw uka tuqit yatiñaxa, kunattix mayisisawa Jehová Diosar jakʼachastanxa.

3. Kunatsa Jehová Diosarux mayisiñasa uka tuqit arstʼma.

³ Jehová Diosaw mayisipxita sistuxa ukatwa juparu mayisipxañasaxa.  Arupanxa akham siwa: “Jan jumanakax kunats llakisipxamti, taqi kunsa Diosar sapxam oracionana, mayipxam yuspagarapxarakim. Diosax jumanakarux churapxarakïtamwa samarañapa, ukasti taqi kuntix jaqix amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpxatam layku” (Filipenses 4:6, 7). Jïsa, taqi kunxaru Munañan jachʼa Diosan aruparuxa janipï janiw sisksnatixa.

4. Jehová Diosarupunitï mayisiñänixa jukʼampiw jupar jakʼachasiñäni, ¿kunatsa ukhamaw sasmaxa?

⁴ ¿Kunatsa Diosatxa mayisiñasaraki? Mayisiskakipuniñänixa jukʼampiw Jehová Diosaruxa jakʼachasiñäni jupampi sum sarnaqasiñatakixa. Wali munata masinakaxa, janiw llakinkkasaki parlasipkiti, jan ukasti kunapachasa parlasipxapuniwa, kunjamasipkisa ukanak yatiñataki. Amuytʼanakapata, llakinakapata, sum parltʼasisaw jukʼampi jakʼachasipxaraki. Niya ukhamjamarakiw Jehová Diosampi jiwasanakampixa. Aka libron yanaptʼapampiwa, yatxatawayxta kuntï Bibliax Jehová Diosata yatichki, kunjam Diosasa ukat kuna amtanisa ukxa. Jumax Diosar sum uñtʼxtaxa.  Ukhamasti, alaxpachankir Awkimaru mayisïta ukhawa chuymamatpacha lupʼiwinakama ukat kunjamsa jikxatasta ukanak säta. Ukhamatwa juparux jukʼampi jakʼachasïta (Santiago 4:8).

5. Jehová Diosax janiw taqinin mayisïwiparuxa istʼkiti, ¿kunjamatsa uk yattanxa?

⁵ ¿Jehová Diosax taqi mayisitanakti istʼpacha? Yatiñatakixa, Isaías profetan urunakapanxa kamsataynasa kutkatasir israelitanakarux uk uñxatañäni. Akham sänwa: “Oracionanaka walja lurasipkäta ukapachax, janiw nayax istʼapkämati. Amparanakamax wilararkamakiwa” sasa (Isaías 1:15). Ukhamasti, janiti Diosatakjama sarnaqkañänixa, jupax janiw mayisïwinakasaruxa istʼkistaniti. Ukatwa, Diosampi istʼatäñatakixa, mä qhawqha mayitanakaru phuqañasawa.

6. Diosax mayisïwinakasaru istʼañapatakixa, ¿kunas wakisi, ukat kunjamatsa ukxa uñachtʼaysna?

⁶ Mayasti akawa, iyawsäwinïñasawa (Marcos 11:24). “Janiw Diosarux jan iyawsañampix kunapachas kusisiyksnati, jupar jakʼachasiñatakixa maynix iyawsañapawa Diosax utjatapa, ukhamaraki jupar thaqirinakarux bendecirïtapa” sasaw Pablox qillqatayna (Hebreos 11:6). Ukampisa, chiqpach iyawsäwiniñatakixa, janiw Diosax utjiw sañakïkiti, ni istʼistaniwa, mayisitanakasarusa jaysistaniwa sañakïkarakisa. Iyawsäwixa suma luräwinakampiwa uñachtʼayasi. Iyawsäwinitasaxa sarnaqäwisanwa qhanäñapa (Santiago 2:26).

7. 1) ¿Kunatsa Jehová Diosaru respetompi jakʼachasiñasaxa? 2) ¿Kunjamatsa altʼat chuymampi, taqi chuymampi mayisitasxa uñachtʼaysna?

⁷ Yaqhax akarakiwa: Jehová Diosarux altʼat chuymampi, taqi chuymampi mayisiñasawa. Kunatsa Diosaru altʼata chuymampipuni mayisiñasa uks yatxaraktanwa. Kunapachatï presidentempi parlapxi ukhaxa wali respetompiw parlapxi, kunattix yatipxiw marka apnaqirïtapa. Chiqasa,  Jehová Diosampi parlañatakixa, jukʼamp respetompiwa jakʼachasiñasa (Salmo 138:6). Kunattixa, jupaw “Taqi chʼamani Diosaxa” (Génesis 17:1). Kunjamtï Diosaru mayiskañäni ukampiwa jaqikïtasxa altʼata chuymampi uñachtʼayañäni. Ukham altʼat chuymanïsawa, taqi chuyma Diosarux mayisiñäni, janiw inamay arunak arsusati, ni pachpa arunak kutin kutin arsusasa (Mateo 6:7, 8).

8. ¿Kunjamsa mayisitanakasarjamax sarnaqsna?

⁸ Yaqhasti akarakiwa: Diosampi istʼayasiñatakixa mayitanakasarjama sarnaqañasarakiwa. Amuytʼañataki, Jehová Diosarutix “sapürutak manqʼañ churanipxita” sasa mayisiñänixa, kuna irnaqäwinsa waliskani ukhaxa irnaqtʼaskakiñasawa (Mateo 6:11; 2 Tesalonicenses 3:10). Ukhamarakiwa, juchanakar jan puriñataki mayisisaxa, janiw juchar purirjam sarnaqañasäkiti (Colosenses 3:5). Ukampisa Diosar mayisiñataki mayitanaka yatxasaxa, wakisiwa Diosar jakʼachasiñxata mä qhawqha jisktʼanakata yatiña.

9. ¿Khitirus mayisiñasa, ukat khitin sutipxarusa?

⁹ ¿Khitirus mayisiñasaxa? Jesusaxa arkirinakaparuxa akham sasaw mayisiñ yatichäna: ‘Alaxpachankir nanakan Awkija’ (Mateo 6:9). Ukhamasti Jehová Dios saparukiwa mayisiñasaxa. Ukampisa, Jesucriston sutipxaru mayisiñaswa Diosax muni. ¿Kunatsa? Kunjamtï 5 jaljan uñjaniwayktanxa, Jehová Diosax Jesusaruw aka Uraqir khitanitayna juchampit jiwañampit qhispiyañataki (Juan 3:16; Romanos 5:12). Ukhamaraki, Jilïr Sacerdotjama ukat Taripirjama uttʼayi (Juan 5:22; Hebreos 6:20). Ukatwa Qillqatanakaxa Jesusan sutipxaru mayisipxam sistuxa. “Nayätwa thakixa, chiqasa, jakañasa. Naya tuqikiw Awkin ukar puriñax utji” sasaw Jesusax sarakïna (Juan 14:6). Mayisitanakasa istʼatäñapatakixa, Jehová Diosarukiwa mayisiñasa Yuqapan sutipxaru.

10. ¿Kunjamsa Diosar mayisna?

 ¹⁰ ¿Diosar killptʼatapunit mayisiñasa? Janiwa. Kunaymanitwa Diosarux respetompi mayisna, ukwa Bibliax yatichi. Sañäni, maynix uttʼatasa jan ukax quntʼatasa, altʼatasa mayisispawa, killptʼatasa, saytʼatasa mayisirakispawa (1 Reyes 8:22; Nehemías 8:6; Daniel 6:10). Janiw jaqimpi uñjayasiñataki mayisiñasäkiti, jan ukasti kunjam chuymampisa mayistan ukaw wali wakisirixa. Chuyma manqhasansa, kawkjansa mayisiskaksnawa, kuna luräwinakansa irnaqäskañäni, jan waltʼäwisa utjani ukhasa Diosat mayisiskaksnawa. Inasa mayisitasxa jaqinakax jan amuyapchiniti, ukampisa Jehová Diosax istʼaskistuwa (Nehemías 2:1-6).

11. ¿Kuna tuqinakatsa Diosar mayisna?

¹¹ ¿Kuna tuqinakatsa Diosat mayisipxsna? Bibliax akham siwa: “Kuntix Diosarux mayiñäni munañaparjama ukxa [Jehová Diosax] istʼistuwa” sasa (1 Juan 5:14). Ukhamasti munañaparjamaxa kuna tuqitsa mayisiskaksnawa. Sañäni, ¿Diosax llakinakasata yatiñ munpachati? Jïsa. Mä wali munat masimpi parlastanxa ukhamwa Diosampi parlañasaxa. ‘Chuymanakasxa juparuw jistʼarsnaʼ, mä arunxa, kunatï chuymasanki ukxa jan imtʼasaw jupar yatiysna (Salmo 62:8). Ukhamaraki Diosarux mayiraksnawa qullan ajayupan yanaptʼäwipa suma luräwinak lurañataki (Lucas 11:13). Ukhamarusa, suma amtäwinak amtañataki yanapsa mayiraksnawa, jan waltʼäwinakar saykatañatakisa chʼamsa mayiraksnawa (Santiago 1:5). Juchachastan ukhaxa, Criston luqtasïwipxaru pampachäwi mayisiñasawa (Efesios 1:3, 7). Ukampisa janiw jiwasatakiki mayisiñasäkiti, jan ukasti yaqhanakatakis mayiñasarakiwa, familiaranakasatakisa cristiano jilat kullanakasatakisa (Hechos 12:5; Colosenses 4:12).

12. ¿Alaxpach Awkisan amtanakap phuqasiñapatakixa kunjam mayisiñasasa?

¹² Mayisïwinakasanxa Jehová Diosan amtanakap phuqasiñapatakiwa  mayiñasa, ukaw jukʼampi wakisirixa. Ukhamasti taqi kunatwa jachʼañchañasa, ukham wali suma Diosätapatwa taqi chuyma yuspärañasaraki (1 Crónicas 29:10-13). Mateo 6:9-13 qillqatanwa Jesusax yatichawaykäna uka mayïsiwix jikxatasi. Ukansti Diosan sutip jachʼañchapxam sasaw yatichäna, mä arunxa, qullanjama uñjatäñapawa uka sutixa. Ukxaruxa munañamampisti apnaqapxita, mä arunxa, Apnaqäwimax jutpan sasarakiw mayisiñ yatichi, ukatxa, alaxpachanjam munañamax aka Uraqi luraspan sarakïnwa. Amuytʼañäni, Jesusax mayisïwipanxa nayraqatxa wali wakiskirinakwa arstʼäna, ukxaruwa jupatak mayisirakïna. Jiwasanakatï ukham Diosan amtanakap phuqasiñapataki nayraqat mayisiñänixa, uñachtʼayañäniwa, jan jiwas sapatak amtasitasa.

13. ¿Qhawqha tiemposa Diosat mayisiñasa uka tuqitxa kamsis Qillqatanakaxa?

¹³ ¿Qhawqha tiemposa Diosat mayisiñasa? Sapakisa jan ukax yaqhanakamp chikasa, janiw qhawqha tiempüñapaw siskiti Biblianxa. Janïra manqʼaskasin jukʼa tiempok mayistan ukhamas walikiwa, jan ukaxa, sapaki Jehová Diosaru chuym jistʼarasin wali jaya mayistan ukas walikirakiwa (1 Samuel 1:12, 15). Ukampisa, kʼari chuyman jaqinakaruxa Jesusax juchañchänwa, kunattix jupanakaxa wali jaya mayisiripxänwa jaqinakan uñjatäñataki (Lucas 20:46, 47). Ukham mayisïwixa Jehová Diosatakix janiw walïkiti. Taqi chuyma mayisiñawa wali wakisirixa. Ukhamasti kunjamxay uñjaschïta kunanak mayisiñaxay wakischini ukarjamaw Diosar mayisïtaxa.

14. ¿Kamsañsa muni “jan inaktʼas orapxam” siski uka arunakaxa, ukat kunatsa wali askipunix jiwasanakatakixa?

¹⁴ ¿Qhawqha kutisa mayisiñasa? Bibliax akham sistuwa: “Janirak Diosat oracionan mayisiñxa armasipxamti”, “jan inaktʼas orapxam” ukatxa ‘uruy aruma oracionxa lurapxarakim’ sasa (Romanos 12:12; 1 Tesalonicenses 5:17;  1 Timoteo 5:5). Ukax janiw sañ munkiti jurnälpacha, paqarpacha mayisiña. Jan ukasti, sapüru Jehová Diosaru munasiñapat yuspäraña sañ muni, yanaptʼapa, chuymachtʼäwipa, chʼamapa mayiña sañwa munaraki. ¡Ukaxa wali askipuniw jiwasanakatakixa! Qhawqha kutisa, qhawqha tiemposa mayisisksnawa, Jehová Diosatakixa walikiwa. Jiwasanakatï wali suma churäwjam mayisiñar uñjañänixa alaxpach Awkisarux kunapachasa jakʼachasiskakiñäniwa.

15. Tantachäwinakansa sapakisa, ¿kunatsa mayisïw tukuyasax “ukhamäpan” sañasaxa?

¹⁵ ¿Kunatsa mayisïw tukuyataruxa “amén” sañäpacha? Uka arusti “ukhamäpan” sañ muni. Wali wakisiriw “ukhamäpan” sasa mayisïwinaka tukuyañaxa, sasaw Bibliax yatichi, sapaki mayisïwinsa jan ukax waljanitak mayisïwinsa (1 Crónicas 16:36; Salmo 41:13). Kunapachatï sapak mayisisin “ukhamäpan” sasa tukuyxta ukapachaxa, chuymatpach arunakampi satamwa uñachtʼaytaxa. Kunapachatix tantachäwinakan “ukhamäpan” sas tuktʼayxtanxa (jiskʼataksa jan ukax jachʼatsa), ukampixa, ukhamaw sataswa uñachtʼayaraktanxa (1 Corintios 14:16).

16. ¿Diosat mayistan ukhaxa kunatsa atinissna?

¹⁶ ¿Jehová Diosax chiqpachapuniti mayisitanakasarux jayspacha? Jïsa. Jiwasarusa, millón millón jaqinakarusa ‘mayisitanak Istʼirixa’ istʼistaniwa sas atinisiñasawa (Salmo 65:2). Ukatxa kunayman tuqinakatwa jaysistaspa.

17. Diosaxa angelanakapampiwa yanaptʼayistaspa, ukhamaraki jupar yupaychiri jaqinakampiw yanaptʼayistaspa, ¿kunatsa ukham sisna?

¹⁷ Sañäni, Jehová Diosaxa angelanakapampiwa yanaptʼayistaspa, ukatxa jupar yupaychiri jaqinakampiwa yanaptʼayarakistaspa, ukhamanakatwa mayisitanakasaruxa jaysaspa (Hebreos 1:13, 14). Walja jaqinakawa Bibliat yatxatañatakixa Diosat mayisipxatayna, uka qhipatxa chiqapuniw Jehová Diosan mä yupaychiripax yatiyir saratayna. Ukasti  uñachtʼayiwa kunjamsa angelanakax pʼiqtʼasipki Diosan Apnaqäwipata yatiyañatakixa (Apocalipsis 14:6). Maysa tuqitxa, kunapachatix jan waltʼäwinkkañäni ukapachaxa, mayni jilatasaru jan ukax kullakasaru chuyma unxtayasawa yanaptʼayistaspa ukhamatwa Jehová Diosax mayisitasarux jaysaspa (Proverbios 12:25; Santiago 2:16).

18. ¿Kunjamatsa Jehová Diosaxa qullan ajayupampi Qillqatanakapampixa yupaychirinakapan mayisitanakaparux istʼaspa?

¹⁸ Jehová Diosax qullan ajayupampi, Bibliankir Arupampiw jaysistaspa mayisitanakasaruxa. Kunapachatï kuna jan  waltʼäwinkkasin mayisiñäni ukapachaxa, jupaw qullan ajayupampi yanapistaspa uka jan waltʼäwit mistuñatakixa, ukhamarakiw chʼamañchistaspaxa (2 Corintios 4:7). Ukatxa, kunapachatï suma amtanakar puriñatakis mayisiñäni ukapachaxa, jupax Qullan Qillqatanakapampirakiwa jaysistaspa. Inas Bibliata sapak yatxatasaxa yanaptʼasiri qillqatanaksa jikxatsna, jan ukaxa, aka librjama qillqatanaka liyisasa wali wakisir yatichäwinak jikxatsna. Ukhamarusa, amtayarakistaspawa Biblian qillqat suma arunakapa, tantachäwinakana jan ukax taman irpir chuymaninakawa jiwasat llakisa iwxtʼasin amtayistaspa (Gálatas 6:1).

19. Mayisitanakasarux Jehová Diosaxa awispax janis jankʼaki jaysankaspa ukham amuyasaxa, ¿kun amtañas wakisispa?

¹⁹ Mayisitanakasarux Jehová Diosaxa awisax janis jankʼaki jaysankistaspa ukhamwa amuysna, ukampisa, ¿janipunit jaysankistaspa? Jaysanistaniwa. Amtañäni, Jehová Diosax mayisitanakasaruxa jaysistaniwa amtaparjama, ukhamaraki kunapachatï jiwasatakix askïkani ukapachaw jaysistani. Kunanaksa muntan ukxa Jehová Diosax sum yati, ukhamarusa, jiwasat jukʼampi sumanak churañwa yatiraki. Awispax suyaskiwa ‘mayisipkakiñasaʼ, ‘thaqhasipkakiñasa’ ‘liqtʼasipkakiñasa’ (Lucas 11:5-10). Ukhama lurañäni  ukhaxa, taqi chuyma mayisitaswa ukat iyawsäwisaxa chiqapätapwa uñachtʼayañäni. Jehová Diosax jaysistaspawa, ukampisa jiwasaw jan amuyksnati. Sañäni, jan waltʼäwin uñjasisaxa Diosat mayisiñäni, ¿kunjamsa jaysistani? Uka jan waltʼäwiru chhaqtayañat sipansa inas saykatañatakix chʼam churistaspa, ukhamatwa jaysistani (Filipenses 4:13).

20. ¿Kunatsa Diosat mayisiñ suma churäwi katuqasaxa mayisipxapuniñasaxa?

²⁰ Uraqi, alaxpacha, taqi kuna Inuqirirux walpunwa yuspärtanxa, kunattix mayitanakaparjam Juparu mayistan ukhaxa istʼistuwa (Salmo 145:18). Ukhamasti Diosata mayisiñ suma churäwi katuqasaxa mayisipxapuniñäni. Ukham lurañäni ukhaxa, ‘mayisitanakar Istʼiri’ Jehová Diosarux sapürutjamwa jukʼamp jakʼachasipxarakiñäni.