1, 2. 1) Mä mintat jaqita istʼañaxa, janiw uka jaqiru sum uñtʼañ sañ munkiti, ¿kunatsa ukham sisna? 2) ¿Jesusax khitiw sapxisa?

 AKAPACHANXA mintat jaqinakax walipuniwa. Yaqhipanakax comunidadapansa markapansa wali uñtʼatäpxiwa, yaqhanakasti uraqpachansa uñtʼatäpxarakiwa. Ukampisa, uka jaqinakan sutip yatiñaxa janiw jupanakar sum uñtʼañ sañ munkiti, mä arunxa, janiw sarnaqäwipxa yatktanti, kunjam jaqinakätapsa yatkaraktanti.

² Jesucriston aka Uraqiru jutatapatxa niya pä waranq maranakäxaniwa, ukat jaqinakaxa jupxat taqi chiqansa parlasipkakiwa. Ukampisa, jupax khitïpachänsa uka tuqitxa kunayman parlapxi. Yaqhipanakasti, mä suma jaqikïnwa sasaw sapxi. Yaqhanakasti mä profetakïnwa sapxiwa. Mayninakasti, Jesusax Diosaw ukat yupaychañasawa sasaw sapxaraki. ¿Ukax chiqäpachati?

3. Jesusat chiqa yatiñaxa, ¿kunatsa jumatakix wali wakisirixa?

³ Jumatakix Jesusxat chiqa yatiñax wali wakisiriwa. ¿Kunatsa? Bibliax akham siwa: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3). Ukhamasti, Jehová Diosampita Jesucristompita chiqa yatiñaxa, kusipachaptayat uraqin wiñay jakañaruw apiristamxa (Juan 14:6). Ukatsti, Jesusax uñachayistuwa kunjamsa sum jakassna ukat kunjamsa jaqi masisampis sum apassna  ukanakxata (Juan 13:34, 35). Kawkïrisa Diosat chiqa yatichäwixa, ukwa nayrïri jaljanxa uñjawaytanxa. Ukat kunsa Bibliax Jesucristot yatichi, ukwa jichhax yatiqañäni.

4. ¿Mesías ukat Cristo sutinchanakax kamsañsa munpacha?

⁴ Janïra Jesusax yurkipanwa, Mesiasan jan ukax Criston jutañapat Bibliax qhanañchatayna. Mesías (hebreo aru) ukhamaraki Cristo (griego aru) sutinchanakaxa “Jawtʼata” sañ muni. Ukhamaxa uka jutaniw sat khitanitaxa  jawtʼatänwa, mä arunxa, Diosan uttʼayatänwa mä amtäwitaki. Aka libronwa jukʼampi yatxataskakiñäni, kunatsa jutaniw sata Mesiasax wali wakisirïnxa Diosan arsutanakap phuqasiñapatakixa. Yatiqarakiñäniwa, kunjamsa Jesusax jichhürunakansa bendicionanak churistaspa. Janïr Jesusax yurkäna ukhaxa waljaniw akham jisktʼasipxpachäna: “¿Khitïpachänisa Mesiasaxa?” sasa.

5. ¿Jesusarux khitiw sapxänsa arkirinakapaxa?

⁵ Nayra patak maranakanxa, Jesusan arkirinakapaxa, jupäskapuniw Mesiasax sasaw sapxäna (Juan 1:41). Simón Pedro sata arkiripaxa jan payachasisaw akham satayna: ‘Jumax Cristütawa’ sasa (Mateo 16:16). Ukhamasti, ¿kunataraki uka arkirinakapasti, Jesusapuniwa Mesiasax sapxpachänsti? ¿Kunatsa jiwasanakax ukhamaw saraksnaxa?

6. ¿Kunjamsa Diosax yanaptʼatayna suma chuyman jaqinakaru Mesías uñtʼañxa? Uk qhanañchtʼma.

⁶ Janïra Jesusax aka Uraqiru jutkäna ukhawa Diosan profetanakapax Mesiasaru uñtʼañataki profecianak qillqapxatayna. Amuytʼañäni: jumatï qhatur sarasma mä jan uñtʼat jaqi thaqhiri, ¿janit wakiskaspa kunjamas uka jaqixa uk yatiñaxa? Niya ukhamjamarakiwa, kunsa Mesiasax lurañapäna ukat kunanakasa jupar pasañapäna ukanakwa Jehová Diosaxa profetanakapampi sum qillqayatayna. Kunapachatï profecianakax phuqasxäna ukhaxa, chiqa chuymani jaqinakax jan payachasisaw Mesiasarux uñtʼapxasapäna.

7. Jesusar phuqasiri pä profecianak arstʼma.

⁷ Uka tuqit pä profecianak uñjañäni. Maynïrix akawa: paqallq patak maranak nayrawa, Miqueas profetaxa, Belén markanwa Mesiasax yurini sas satayna, ukasti Judá markankiri mä jiskʼa markakïnwa (Miqueas 5:2). Ukhamasti, ¿kawkinsa Jesusax yuritayna? Uka Belén markanwa (Mateo 2:1, 3-9). Payïr profeciasti Daniel 9:25 jiskʼa tʼaqankiwa, 29 jichha pacha maranwa Mesiasaxa uñstaniñapäna, janïräkipan uka mar tantiyañatakiwa aka profeciax  qillqasitayna. a Aka pä profecianakana ukat yaqha profecianakana phuqasitapaxa uñachtʼayistuwa Jesusax Mesiasätapa.

8, 9. Jesusax bautisaskäna ukhaxa, ¿kunjamsa qhanpach Mesiasätapxa uñachtʼayasïna?

⁸ Jesusan Mesiasätapax 29 maranwa sum qhanstxäna. Ukhaw Jesusaxa Bautisir Juanaru Jordán jawiran bautisit satayna. Mesiasaru uñtʼañamatakixa mä uñtäwi churäma sasaw Jehová Diosax Bautisir Juanaruxa satayna, Jesusax bautisaskän ukhaw uka uñtäw churatayna. Bibliax akham siwa: “Kunapachatix Jesusax bautisatäxän ukkhaxa, umatwa mistunxäna, ukatsti mayakwa alaxpachax jistʼartäna, Jesusasti uñjarakïnwa Qullan Ajayurux palomar uñtat jupxar saraqasinkiri. Alaxpachatsti istʼasirakïnwa mä aru akham siri: ‘Akawa munat Wawaxaxa, kawkïrirutix nayax ajllista ukaxa’ sasa” (Mateo 3:16, 17). Kunapachatï Juanax ukanak uñjäna ukat istʼarakïna ukhaxa, janiw payachaskänti Jesusax Diosan khitanitätapxa (Juan 1:32-34). Kunapachatï qullan ajayux —mä arunxa, Diosan chʼamapaxa— Jesusxaru jutkatayna, ukhawa Jesusax Mesías, jan ukax Cristoru tukutayna, Jupawa Jilïr pʼiqtʼirïñapataki ukat Apnaqirïñapataki ajllitätayna (Isaías 55:4).

⁹ Jesusan phuqasir profecianakasa, Jehová Diosan arunakapasa qhanañchistuwa Jesusax Mesiasätapa. Ukatxa, Jesucristot wakiskir aka pä jisktʼäwinakaruwa Bibliax qhanañchistu: ¿Kawkits Jesusax jutäna? ¿Kunjam jaqïnsa Jesusaxa?

10. Jesusax janïr aka Uraqiru jutkasaxa, ¿kawkinsa jakasïnxa, kamsis Bibliaxa?

¹⁰ Jesusaxa janïra aka Uraqiru jutkasaxa alaxpachanwa  jakasïna sasaw Bibliax yatichi. Bibliaxa janiw Mesiasax Belenan yurin sasaki siskataynati jan ukasti, “janira aka uraqi lurkäna” ukhawa Jesusax alaxpachan utjxäna siwa (Proverbios 8:22, 23). Ukatxa, janïra jaqjam yurisasti alaxpachankayätwa sasaw Jesusax walja kuti satayna (Juan 3:13; 6:38, 62; 17:4, 5). Ukanxa mä ajayjamawa jakasïna, Jehová Diosampix wali sum apasipxäna.

11. ¿Kunjamsa Bibliaxa uñachtʼayi, Jesusax Jehová Diosan wali munat yuqapätapxa?

¹¹ Jesusaxa, Jehová Diosan wali munata yuqapawa. Bibliax akham siwa: “Taqi kunatix utjki ukatxa nayririwa” sasa, ukhamasti juparuwa Diosax nayraqat luratayna (Colosenses 1:15). b Ukatsti, jupaxa Diosan ‘sapa Yuqapa’ satarakiwa, ukatwa wali munatarakixa (Juan 3:16). Ukax sañ muniwa, Dios pachpawa jupar luratayna jan khitimpi yanapayasisa. Ukat jupakirakiw Jehová Diosarux taqi lurañanakan yanaptʼatayna (Colosenses 1:16). Ukhamarusa, ‘Aru’ satarakiwa (Juan 1:14). Awkipan sutipxaruwa jupax arsuritayna ukwa uka sutinchasti sañ muni. Angelanakarusa jaqinakarusa Jupawa Diosan yatiyäwinakap churpachänxa.

12. ¿Kunatsa jilïr Yuqaxa janiw Diosjamäkiti sisna?

¹² Yaqhipanakatakix Diosan jilïr Yuqapax Diosäkaspasa ukhamawa, ¿ukhamäpachati? Janiw Bibliax ukham yatichkiti. Kunjamtï 11 tʼaqan yatiqtanxa, Yuqax luratawa. Ukhamax jupan jakäwipax qalltäwiniwa, ukat Jehová Diosax janiw qalltäwinïkisa ni tukuyanïkisa (Salmo 90:2). Uka sapa Yuqaxa janipuniw Awkiparu igualasiñ munkänti. Yuqat sipansa Awkix jukʼamp jilïriw sasaw Bibliax qhan yatichi (Juan 14:28; 1 Corintios 11:3). Jehová sapakiw “taqi  chʼamani Diosaxa” (Génesis 17:1). Ukhamaxa, janipuniw khitisa Diosjamäkiti. c

13. ¿Bibliax kamsañsa muni kunapachatï Yuqax ‘jan uñjkañ Diosan uñnaqapawa’ siski ukhaxa?

¹³ Millón millón maranakawa, janïra warawaranakasa Uraqisa utjkäna ukhatpachaw Jehová Diosax jilïr sapa Yuqapampi wali munasiñampi sum jakasipxäna. ¡Jupanak puraxa wal munasipxpachäna! (Juan 3:35; 14:31.) Uka munat Yuqaxa Awkipjamänwa. Ukatwa, Bibliax ‘jan uñjkañ Diosan uñnaqapawa’ sistuxa (Colosenses 1:15, MT). Kunjamtï mä wawax awkipjamäki, ukhamarakiwa Diosan Yuqapaxa Awkipan kankañanakapa ukat kunjam Diosasa ukanakxa uñachtʼayi.

14. Jehová Diosan sapa Yuqapaxa, ¿kunjamatsa mä jaqjam yuritayna?

¹⁴ Jehová Diosan sapa Yuqapaxa iyaw sasawa alaxpachat aka Uraqiru jutatayna mä jaqir tukusa. Ukat inas jumax akham jisktʼasiraksta: “¿Kunjamataraki mä ajayusti jaqjam yurispasti?” sasa. Ukasti Jehová Diosan milagropawa. Alaxpachankiri jilïri Yuqapan jakäwipwa, Judá markankiri María sata mä virgen tawaqun purakaparu uchatayna. Awkipasti janiw mä jaqïkänti, ukhamasti uka warmixa jan juchani wawanïnwa, Jesús sasaw sutiyapxatayna (Lucas 1:30-35).

15. Jesusat yatxatasaxa, ¿kunjamatsa Jehová Diosarux jukʼamp sum uñtʼsna?

¹⁵ Kunanaktï Jesusax lurkatayna kunanaktï parlkatayna uraqinkasaxa, ukanakaw juparu sum uñtʼañxa yanapistu. Ukatsti, jupat yatiqasawa Jehová Diosarux jukʼamp sum uñtʼsna. ¿Kunjamatsa? Amtañäni, uka Yuqasti, jan uñjkañ Diosan uñnaqapawa. Ukatpï mä arkiriparux akham sataynaxa:  “Khititix nayar uñjkitu ukax Awkirux uñjarakiwa” sasa (Juan 14:9). Mateo, Marcos, Lucas ukat Juan sata Bibliankiri pusi libronakanxa, Jesucristoxa kunjam sarnaqasirïnsa, kunsa lurirïna ukat kunjam jaqïnsa ukanakatwa yatxattanxa.

16. ¿Kunsa Jesusax yatiyäna, ukat khitinkänsa uka yatichäwixa?

¹⁶ “Yatichiri” sasaw Jesusaruxa sapxirïna (Juan 1:38; 13:13). ¿Kunsa jupax yatichirïnxa? “Diosan reinopat” suma yatiyäwinakwa yatichirïna. Uka Apnaqäwiwa alaxpachat aka Uraqiru apnaqani, ukatsti walja bendicionanakwa chiqa chuymani jaqinakaru churanini (Lucas 9:11). ¿Khitinkänsa uka yatiyäwixa? Jesús pachpaw akham säna: “Yatichäwixax janiw nayankkiti, jan ukasti khitankitu ukankiwa” sasa, ukhamasti Jehová Diosankiwa (Juan 7:16). Jehová Diosaxa Apnaqäwipat jaqinakax yatipxañapwa munäna, uksti Yuqapax sum yatïna. Kunjamasa uka apnaqäwixa ukat kunsa lurani, ukanakxata 8 jaljanwa jukʼampi yatxatañäni.

17. ¿Kawkhanakansa Jesusax yatichäna, ukat kunatsa wal chʼamachasïna uk lurañatakixa?

¹⁷ ¿Kawkhanakansa Jesusax yatichäna? Kawkhantï jaqix utjkäna: markanakansa, pampansa, qhatunakansa, utanakansa yatichapunirïnwa. Jesusax janiw mäwjanaki jaqinakaru suyirïkänti, jan ukasti jupaw jaqinak thaqhir sarirïnxa (Marcos 6:56; Lucas 19:5, 6). ¿Kunatsa Jesusax yatiyir sarañatakisa, yatichañatakisa wal chʼamachasïna, ukat tiempsa apstʼasirakïnxa? Ukwa Awkipax munäna ukatwa Jesusax phuqañkama ukxa luräna (Juan 8:28, 29). Ukatsti wali khuyaptʼayasirïnwa, ukatwa jaqinakar yaticharakïna (Mateo 9:35, 36). Kunatï Diosat chiqäki ukat Diosan amtanakapäki ukanakwa judionakan pʼiqiñchirinakapaxa yatichapxañapäna, janiw uk phuqapkänti. Ukampisa, Jesusax yatïnwa kunja wakisirïnsa jupanakatakixa Diosan Apnaqäwipxat istʼañaxa.

18. ¿Jesusat kun yatiqasiñsa munasma?

 ¹⁸ Jesusax wali suma jaqïnwa, jachʼa chuymanïnwa ukat wali munasirirakïnwa. Munasiñampiw jaqinakarux uñjirïna, wawanakas jupampïñ wal munapxirïna (Marcos 10:13-16). Jan yaqhachasawa taqinirus sum uñjäna. Taqi jan wali luräwinakarusa uñisirïnwa (Mateo 21:12, 13). Jaqinakaxa uka urunakanxa janiw warminakarux respetapxirïkänti, ukampisa Jesusax wali respetompiw warminakarux uñjirïna (Juan 4:9, 27). Jesusaxa wali altʼat chuymanïnwa. Mä uruxa apostolanakaparusa kayunakap jariqatayna, ukxa uywatanakakiw lurapxirïna.

19. ¿Kuna uñachtʼäwisa Jesusax jaqinakat wali khuyaptʼayasirïtap uñachtʼayistu?

¹⁹ Jesusax tʼaqhisit jaqinakarux wal khuyapayäna, usutanakarusa Diosan ajayupampi qullasaw khuyapayasiñapxa uñachtʼayäna (Mateo 14:14). Mä urusti, lepra usuni mä jaqiw jupar akham satayna: “Munsta ukax, aka usuxat kʼumaraptayitasmawa”  sasa. Jesusaxa, jupas ukham tʼaqhiskaspa ukhamwa uka jaqitxa wal sinttʼasïna. Wali khuyaptʼayasawa luqxatäna, ukatsti sänwa: “Muntwa, kʼumaräxaraktawa” sasa. ¡Uka usutasti waliptxänwa! (Marcos 1:40-42.) ¿Kunjamakisa uka jaqix jikxataspachäna?

20, 21. Diosar taqi chuyma luqtañansa, Diosar jaysañansa, ¿kunatsa Jesusat yatiqasiñasaw sisna?

²⁰ Jesusatwa yatiqasiñasaxa Diosaru taqi chuyma luqtañansa, Diosaru jaysañansa. Kunayman tʼaqhisisasa, wali uñisitasa Awkiparux jaysaskakipunïnwa. Satanasan yantʼanakaparusa janiw jalantkänti (Mateo 4:1-11). Mä tiempoxa, familiaranakapasa janiw juparu iyawsañ munapkänati. “Luqhiptxataynawa” sasaw sapxäna (Marcos 3:21). Ukham satpachasa Jesusax Diosan munañapxa luraskakïnwa. Kunapachatï uñisirinakapax sutichjapxäna ukat  nuwapxäna ukhaxa janiw kutkatasirïkänti janirakiw nuwasirïkänsa (1 Pedro 2:21-23).

²¹ Jan sinttʼasiri uñisirinakampi khuyañ jiwayataw uñjasïna, ukampisa Jesusax jiwañapkamaw Awkiparux iyawsaskakïna (Filipenses 2:8). Amuytʼañäni, wal tʼaqhispachänxa jiwxän uka uruxa. Autoridadanakansa katuntata, qhanañchirinakampisa kʼarintata, jan wali chuymani juesanakampisa juchañchata, jaqinakansa larchʼukita, soldadonakansa wali nuwjata, ukhamaw tʼaqhisiwayi. Mä lawaru chʼakkatatäxasinxa, akham sasaw jiwañataki satayna: “Taqi kunaw phuqhasxi” sasa (Juan 19:30; Hechos 5:30, MT). Kimsürutxa, Awkipax mä ajayjamwa jaktayäna (1 Pedro 3:18). Pusi tunk urunakatxa alaxpacharuwa kuttʼxäna, ukansti “Diosan kupïxapan quntʼasiraki” apnaqäwi katuqañataki suytʼasa (Hebreos 10:12, 13).

22. ¿Kunsa Jesusax jiwañkam Diosar iyawsasaxa jaytawarapistu?

²² ¿Kunsa Jesusax jiwañkam iyawsasaxa jaytawarapistu? Jiwäwipaxa kusipach uraqina wiñay jakasiñatakiwa mä thakjama jistʼararapistu, kunjamtï Jehová Diosax qalltatpacha munkäna ukhama. Jutïr jaljanxa kunjamsa uka arunakaxa phuqasini ukanakxatwa yatxataskañäni.