TRINIDAD sata yatichäwiru iyawsirinakaxa, Awkisa, Yuqasa, Qullan Ajayusa, mayakïpxaspasa ukat kipkakïpxaspasa, wiñayatpachasa utjasipxaspa, kimspachasa taqi kunsa lurapxaspa ukham sasaw sapxi. Ukatwa, Trinidad yatichirinakaxa akham sapxi: Dios Awki, Dios Yuqa, Dios Qullan Ajayu sasa, kimspachanisti mä Diosakïkaspas ukhama.

 Uka yatichäwiru walja iyawsirinakaxa janiw uka tuqit sum qhanañchañjamäkit sapxiwa. Biblian ukham yatichpach sapxarakiwa. Ukampisa, Diosan Arupanxa janipuniwa Trinidad arux mä kutis uñstkiti. ¿Biblianxa Trinidad tuqit yatichiri mä jiskʼa tʼaqasa utjpachati? Ukatakixa, Trinidad yatichañataki aytasit mä jiskʼa tʼaqa uñjañäni.

Juan 1:1 siwa: “Kunapachatix taqi kuna qalltkäna ukkhaxa, Arux utjapunïnwa; khä Arusti Diosampïnwa, uka Arusti Diosänwa.” sasa. Ukat 14 jiskʼa tʼaqanxa, apóstol Juanax “uka Arusti” Jesusaw sasaw sum qhanañchi (Juan 1:14). Ukhamasti, niyakixaya uka jiskʼa tʼaqanxa “uka Arusti Diosänwa” sischixa, ukatwa yaqhip Biblia liytʼirinakaxa, Awkisa Yuqasa mä Diosakïkaspasa ukham amuyapxi.

Yatiñasarakiwa, uka qillqatanakasti griego arutwa nayraqatxa qillqasïna, ukat qhiparuw yaqha arunakarux jaqukipasiski. Yaqhip yatxatata Biblia jaqukipirinakaxa “uka Arusti Diosänwa” sasaw ukäwjarux uchapxi, ukampisa yaqhipanakax mayjwa ukawjar uchapxi. ¿Kunatsa? Bibliax qillqaskän uka griego arut yatxatasaw yaqha arunakampi jaqukipapxi, ukatwa ukawjarux akham uchapxi: “Amtax [jan ukax Arux] mä diosänawa ”, ukat “uka Arusti diosänwa” sasa (Juan. Texto y Comentario, de J. Mateos y J. Barreto, lectura alternativa; Cuarto Evangelio. Cartas de Juan, de J. J. Bartolomé). Aka qillqatanak uñxatasaxa, uka Arux janiw Dios pachpäkapuniti. a Jan ukasti, uka jiskʼa tʼaqanxa uñachayistuwa, Jehová Diosan wawanakap taypinxa uka Arux jilïrïtapa, ukatwa “dios” sataxa. Akanxa “dios” arux jiskʼa “d” qillqampi qillqatawa, ukax “chʼamani” sañ muni.

Bibliax qillqaskäna uka griego arxa janiw taqinis yatktanti. Ukhamasti, ¿kuntï apóstol Juanax sañ munkäna ukxa kunjamatarak yatsnasti? Uk amuytʼañäni, mä yatichirix yatiqirinakaparu  sum yatichaspa. Ukatsti mä jukʼarux yatiqirinakaxa uka yatiqatatxa may may amuyxapxaspa. ¿Kuns kamachapxañapa? Jukʼampi yatxatañatakix yatichiriruw jisktʼasipxañapa. Ukhamatwa sum yatxatapxaspa kuntï yatichirix siskän ukxa. Ukhamarakiwa, Juan 1:1 jiskʼa tʼaqat sum yatxatañatakix apóstol Juanan libropwa uñxatañasa. Jukʼampi yatxatañatakixa, uka libron Jesusxat yatichäwinakapa thaqtañäni. Uk uñxatasawa yatiñäni kunsa apóstol Juanax sañ munäna.

Kunsa apóstol Juanax qillqatayna Juan 1:18 uk uñjarakiñäni: “Janiw kunapachas [Taqi chʼamani] Diosarux khitis uñjkiti” sänwa. Ukampisa, Diosan Yuqapa, Jesusarux jaqinakax uñjapxänwa, apóstol Juanax siwa: “Khä [Jesús] Arusti janchiruw tuku, jiwasanak taypinwa jakarakïna. Jiwasanakax uñjtanwa jachʼa kankañapa” sasa (Juan 1:14). Ukhamasti, ¿kunjamaraki Diosan Yuqapaxa taqi chʼamani Dios taypinkiw sisnasti? Ukxarux Juanax “uka Arusti Diosampïnwa” sasaw qhanañchi. ¿Kunjamarak maynix jupäskaspa ukat jupampiskarakispasti? Ukxarusti, alaxpachankiri Awkita Jesusaxa yaqhätapwa Juan 17:3 sum qhanañchistu, Jesusax awkiparuxa ‘sapa chiqpach Dios’ sasaw säna. Juanax qillqatap niya tukuykasaxa akham sänwa: “Ukampis akanakax qillqatawa Jesusax Cristötap iyawsapxañamataki ukhamarak Diosan Yuqapätapsa” sasa (Juan 20:31). Uka qillqatanxa janiw siskiti Jesusax Diosaw sasa, jan ukasti Diosan Yuqapaw siwa. Juan 1:1 ukxa kunjamsa amuyañasa ukwa Juanan taqi qillqatanakapaxa qhanañchistu. “Uka Arusti” jan ukax Jesusasti mä “diosawa”, Diosan wawanakap taypinxa jilïriwa, ukampisa janiw taqi chʼaman Diosjamäkiti.

Yatichirxat amuytʼaskakiñäni. Yatichiriru istʼkasasa yaqhip yatiqirinakax payachasisipkakispaxa, ¿kunsa lurapxañapa? Yaqha yatichiriruw jisktʼasipxaspa. Uka yaqha yatichirixa nayrïr yatichirin yatichäwinakaparux ukhamäskapuniw saspaxa, niya taqiniw sum amuyxapxaspa. Ukhamarakiwa, Jesusampi taqi chʼaman Diosampixa janiw kikpäpkiti, apóstol Juanan uka tuqit qhanañchkatasa payachasiskañänixa, yaqha qillqirin arunakap uñxatañasawa. Ukhamax Mateon qillqatanakap  uñxatañäni. Jupax Jesusan arunakapwa akham sas qillqatayna: “[Aka urunakan tukusiñapax] kuna horasäkanitix jan ukax kuna urükanitix ukxa janiw khitis yatkiti, ni alaxpachankir angelanakasa ni Diosan Yuqapasa, jan ukasti Dios Awki sapakiw yati” sasa (Mateo 24:36). ¿Kunjamsa ukax uñachayistu Jesusax jan taqi chʼamani Diosätapxa?

Awkixa jukʼampwa Yuqat sipansa yati sasaw Jesusax satayna. Ukampisa, Jesusatï taqi chʼamani Diosäspaxa, Awkipjamwa yatirakispaxa. Ukhamatwa yattanxa Yuqampi Awkimpixa jan kikpätapa. Ukampisa, yaqhipanakaxa inas akham sasipkakchispa: “Jesusax pä jakawinïnwa: mayax alaxpachana ukat mayax aka uraqina, ukat aka uraqinkäna ukhawa ukham parlawayi” sasa. Ukax chiqäkaspas ukham sañäni. Jichhasti, ¿qullan ajayux kawkinkiw sisnasa? Qullan ajayutï Awkjama taqi chʼamani Diosäspänxa, ¿kunatsa Jesusaxa Dios awki sapakiw ukx yati saspänxa? Janiw qullan ajayutxa aytaskänti.

Bibliat jukʼampi yatxataskakïtaxa yaqha qhanañchir jiskʼa tʼaqanakwa jikxatäta. Taqi uka yatichäwinakaxa: Awkita, Yuqata, qullan ajayumpita kunatix chiqäki ukanakwa qhanañchätamxa (Salmo 90:2; Hechos 7:55; Colosenses 1:15).