1. ¿Kunatsa Etiopía markana, gobiernon mä irnaqirixa bautisasxirista sataynaxa?

 “AKAXAY umaxa. ¿Janit nayax bautisatäkiristxa?”, sasaw Etiopía markankiri, gobiernon mä irnaqirix nayra patak maranakanxa satayna. Felipe sat mä cristianowa, Jesusaw Mesiasax sasa qillqatanakampi uka jaqirux yatichatayna.  Chuymaru purtʼkirpunwa uka jaqirux qhanañchatayna, ukatwa bautisasxä sataynaxa (Hechos 8:26-36).

2. ¿Kunatsa bautisasiñ tuqit sum amuytʼasiñamaxa?

² Jumatix Jehová Diosan Qhanañchiripampi akhakam aka librota sum yatiqstaxa, inasa akham jisktʼasiraksta: “¿Janit nayax bautisatäkiristxa?” sasa. Jaqinakaxa wiñayaw kusipachan jakasipxani siw Bibliaxa, uksa yatxaraktawa (Apocalipsis 21:3, 4). Jiwatanakan jaktaniñapatsa ukat jichhax kunjamäsipkisa ukanakatsa yatxaraktawa (Eclesiastés 9:5; Juan 5:28, 29). Jehová Diosan Qhanañchirinakapamp chikaxa niyawa mä qhawqha tiempo tantachasxarakpachätaxa, ukat chiqa yupaychirinakätapsa amuyxarakpachätawa (Juan 13:35). Ukatxa, inasa Jehová Diosampi suma sarnaqañ qalltxaraksta, ukawa taqi kunat sipansa wali askixa.

3. 1) ¿Jesusax kamsataynasa arkirinakaparuxa? 2) ¿Kunjamsa cristianonakax bautisasipxi?

³ ¿Kunjamatsa Diosar yupaychañ munatamxa uñachtʼayasma? Jesusax akham sasaw arkirinakaparux säna: “Taqi akapachankir jaqinakar yatiyir sarapxam, nayar arkir tukuyapxam; bautisapxam” sasa (Mateo 28:19). Jesusax bautisasisawa mä uñachtʼäwi jaytawayistu. Janiwa umampi aliq chʼalltʼataki bautisaskänti, janirakiwa mä jukʼa umampi pʼiqit warxatapkänti (Mateo 3:16). Bautisasiñ aruxa griego arutwa juti, ukax “umar chhaqtayañ” sañ muni. Ukhamasti, kunapachatï cristianüñatak bautisasipxi ukhaxa umaru qʼal chhaqantayatäpxiwa.

4. ¿Bautisasxi ukhaxa kunanaksa maynix uñachtʼayi?

⁴ Jehová Diosampi sarnaqañ munirinakaxa bautisasipxañapawa. Kunapachatï maynix bautisasxi ukhaxa, taqinina uñjkatawa Diosar yupaychañ munatapxa uñachtʼayi, ukatxa Diosan munañapa kusisit luratapsa uñachtʼayarakiwa (Salmo 40:7, 8). Ukampisa, bautisasiñatakix mayitanak phuqañawa.

5. 1) ¿Kawkïrisa bautisasiñataki nayrïr mayitaxa? 2) ¿Kunatsa cristiano tantachäwinakaru sarañaxa wakisi?

⁵ Nayrïr mayiwxa phuqxtawa. ¿Kunjamsa? Jehová Diosampiru Jesucristompiru uñtʼasawa phuqxtaxa, ukxa Bibliata yatichayasisawa yatiqtaxa (Juan 17:3). Ukampisa, jukʼampi yatiqaskakismawa. ‘Diosaru jukʼampi sum uñtʼañamwa’ cristianonakaxa munapxi (Colosenses 1:10). Ukatakixa, Jehová Diosan Qhanañchirinakapan tantachäwinakaparu sarasawa jukʼampi yatiqäta. Ukhamaxa uka tantachäwinakaruxa jan jaytasa sarañamapuniwa (Hebreos 10:24, 25). Ukhamatwa Diosarux jukʼamp sum uñtʼäta.

6. ¿Bibliat qhawqha yatiñamasa bautisasiñatakixa?

⁶ Chiqasa, bautisasiñatakix janiw Bibliatxa taqpach yatiñäkiti. Ak amtma, Etiopía markankir jaqixa Bibliat mä jukʼakwa yatïna, ukampis Qillqatanaka sum yatxatañatakixa yanaptʼayasïnwa (Hechos 8:30, 31). Ukhamarakiwa, yatiqañax jumatakix utjaskakiwa. Chiqasa, Diosat yatiqañax janiw tukuskaspati (Eclesiastés 3:11). Ukampisa, bautisasiñatakixa Biblian qallta yatichäwinakap sum yatiqañamawa, ukat uka yatichäwinakaru iyawsañamarakiwa (Hebreos 5:12). Kunjamäsipkis jiwatanakaxa, kunatsa Diosan sutipasa Apnaqäwipasa wali wakiskirix ukanaksa yatiñamarakiwa.

7. Bibliat yatiqasaxa, ¿kunanïñamasa?

⁷ Ukampisa, janiwa yatiñakïkiti, “janiw Diosarux jan iyawsañampix kunapachas kusisiyksnati” (Hebreos 11:6). Nayra Corinto markankiri yaqhip jaqinakaxa, cristianonakana yatichäwip “istʼasinxa iyawsapxäna, ukat bautisasipxarakïn[w]a” siw Bibliaxa (Hechos 18:8). Jumax ukhamwa lurarakisma. Bibliat yatiqasaxa, Bibliax Diosan amuytʼayata Arupätapwa iyawsañama. Diosan amtanakapaxa phuqasipuniniwa ukatxa Jesusan jiwatap laykux qhispirakiñäniwa, ukanakaru iyawsäwinïñamarakiwa (Josué 23:14; Hechos 4:12; 2 Timoteo 3:16, 17).

8. ¿Kunasa yatiqatanakamatxa yaqhanakaru yatiyañ yanaptʼätamxa?

⁸ Jukʼamp iyawsäwinïxätaxa, janiw yatiqatanakamxa imtʼañ munkätati, jan ukasti yatiyätawa (Jeremías 20:9). Diosatsa ukhamaraki amtanakapatsa taqi chuymawa yaqhanakaru qhananchäta (2 Corintios 4:13).

9, 10. 1) ¿Khitinakarusa Bibliat yatiyañ qalltasmaxa? 2) ¿Kun lurañamasa Jehová Diosan Qhanañchirinakapamp chika utat uta yatiyir sarañamatakixa?

⁹ Qalltañatakixa, familiaranakamaru ukat uñtʼatanakamaruwa suma arunakampi Biblian chiqa yatichäwinakapxa qhanañchasma, ukat jumamp chika irnaqirinakarusa, utam jakʼankirinakarusa qhanañcharakismawa. Tiempompixa, inasa Jehová Diosan Qhanañchirinakamp chika utat uta yatiyir sarañ munchïta. Ukhamäni ukhaxa, Bibliat yatichirimaruwa sañama. Jupatï yatiyir sarasmaw sätam ukhaxa, tama taypin pä irpir chuymaninakampi parltʼapxañamatakiwa arxayani.

¹⁰ Ukhamatwa jukʼampi sum uñtʼäta irpir chuyman cristianonakaruxa, Diosan tamap awatirinakaruxa (Hechos 20:28; 1 Pedro 5:2, 3). Biblian qallta yatichäwinakapxa yatxtati, uka yatichäwinakaru iyawsäwinïxtati, ukwa jupanakax amuyapxani, Diosan yatichäwinakaparjamati sarnaqaskta, ukat chiqapuniti Jehová Diosan Qhanañchiripäñ munta ukwa amuyapxarakini. Uka mayitanaka phuqäta ukhaxa: walikiwa, suma yatiyäwinakata jan bautisata yatiyirïxtawa sapxätamwa, ukatxa suma yatiyäwinakxa taqiniruw yatiyxasma.

11. ¿Janïra taqi jaqinakaru yatiyir sarasaxa kuna jan walinaksa yaqhipanakaxa apanukupxañapa?

¹¹ Jan ukhamäkanixa, jan wali luräwinakxa apanukuskakiñapawa sapxaspawa irpir chuymaninakaxa. Ukatakixa, inas jamasata lurkäna uka jan walinak apanukxañapächispa. Ukhamaxa, janir bautisaskasin yatiyir mistuñatakixa,  jan wali sarnaqäwinakxa apanukxañamawa, akïr jan wali luräwinakjama: qʼañu lurañanaka, machantasiñanaka ukat jan wali qullanakampi qulljasiñanaka (1 Corintios 6:9, 10; Gálatas 5:19-21).

12. ¿Kunatsa arrepentisiñasaxa?

¹² Bautisasiñatakixa, aka mayitanakampi phuqañamarakiwa. Apóstol Pedroxa akham sänwa: “Arrepientisipxam” ukat “jan wali lurañanakxa apanukupxam” sasa (Hechos 3:19). Kunapachatï maynix chiqapuni arrepentiski ukhaxa, wal llakisi jucha luratapatxa. Ukatxa, janiwa qʼañu lurir jaqinakaki arrepentisipxañapäkiti, jan ukasti waljam sarnaqasipki ukanakasa arrepentisipxañapawa. ¿Kunatsa? Kunattixa taqiniwa juchachasirïtanxa, Diosampi juchanaka pampachayasiñasawa (Romanos 3:23; 5:12). Janïra Bibliata yatiqkasaxa, jumaxa janiw yatkayätati kawkïrisa Diosan munañapaxa. Ukhamaxa, Diosan munañapa jan yatisaxa janiwa Diosan munañaparjam jumax sarnaqkayätati, ¿janich ukhamäkixa? Ukhamaxa, arrepentisiñasawa.

13. ¿Kun sañs muni jan wali luräwinak apanukuñaxa?

¹³ Arrepentisitatxa jan wali luräwinak apanukuñasarakiwa. Kunapachatï jumaxa uka jan wali luräwinak apanukxta ukhaxa, jan wali thakimatsa kuttʼankasma ukhamawa. Mä arunxa, uka jan walinak luratamatxa janiwa aliqaki llakisktati, jan ukasti nayra sarnaqäwimxa apanukxtawa. Ukat aksaruxa kunatï askïki uka lurañwa amtañamaxa. Maynixa janïra bautisaskasawa arrepentisiñapaxa ukatxa jan wali luräwinaksa apanukuñaparakiwa.

14. ¿Kunampsa janïra bautisaskasaxa lurañama?

¹⁴ Janïra bautisaskasaxa Jehová Diosar katuyasxañamawa, ukarakiw yaqha mayitaxa.

15, 16. ¿Diosar katuyasiñax kamsañs muni, ukat kunasa ukaru nuktʼistani?

 ¹⁵ Jehová Diosaruw taqi chuyma mä mayisïwin jakʼachasiñama: Juma saparukipuniwa yupaychañ munsma sasa, ukawa Diosar katuyasiñaxa (Deuteronomio 6:15). Ukatxa, ¿kunatsa maynix Diosaru ukham katuyasiñ munaspa? Uk amuytʼañataki akham sañäni, mä waynax mä tawaquru uñtʼañ munsma saspa. Uka tawaquru sum uñtʼanixa, kuna kasta tawaqütapsa sumwa yatinixa, ukatxa jupampikïskañwa munanixa. Tiempompixa jaqichasxañäni saspawa. Chiqasa, jaqichatäxani ukhaxa kunayman lurañanakawa utjani. Ukampisa uka tawaqur munatap laykuxa jupampiw jaqichasini.

¹⁶ Kunapachatï Jehová Diosaru uñtʼxtan ukat munasxaraktan ukhaxa, taqi chuymawa juparu yupaychañ muntanxa, janiwa yupaychäwisanxa ukhakamakïniw sisktanti. Diosan Yuqap Jesucristoru arkañ munirixa, ‘jupa pachax armtʼasiñapawa’ (Marcos 8:34). Kunapachatï munañanakasxa jan ukax amtanakasxa Diosar istʼañataki apanuktan ukhawa jiwaspachax armtʼastanxa. Ukhamaxa, janïra bautisaskasaxa, Jehová Diosan munañapa lurañwa jakäwiman nayraqat amtañamaxa (1 Pedro 4:2).

17. ¿Kunatsa yaqhipanakaxa Diosar jan katuyasipki?

¹⁷ Yaqhipanakaxa Jehová Diosaru katuyasiñxa axsarayasipxiwa. Diosar katuyat cristianjamaxa juparu cuenta churañäspawa sasaw axsarapxi. Inas akham amuyapxchi, pantjasiristwa, Diosar inamayakiw jakʼachasirista, ukhamaki sarnaqasiskä sasa.

18. ¿Kunas Diosar katuyasiñamataki nuktʼiristamxa?

¹⁸ Jehová Diosaru munasiñamaxa jukʼampi jilxattani ukhaxa, juparu katuyasxañwa munätaxa, ukatxa ukarjam sarnaqañatakisa wal chʼamachasirakïta (Eclesiastés 5:4). Diosar katuyasxasaxa, Jehová Diosatakjam “sarnaqañwa,  ukhamarak kunatix jupatakix askïki ukanak lurañwa” munätaxa (Colosenses 1:10). Diosar munasïtaxa, Diosan munañap phuqañax janiw jumatakix chʼamäkaniti. Ukatxa apóstol Juanan akïr arunakaparuxa ukhamäskapuniw sätawa, jupaxa akham sänwa: “Diosar munañaxa mandamientonakar phuqhañawa; mandamientonakapasti janirakiw jan phuqhañjamäkiti” sasa (1 Juan 5:3).

19. ¿Kunatsa Diosar katuyasiñxa jan axsarañamäkixa?

¹⁹ Jehová Diosax jupar katuyasirinakaruxa janiw jan juchanipxañap maykiti. Jupaw sum uñtʼistu, kuntï jan lurirjamäktan ukxa janipuniw waytʼkistuti (Salmo 103:14). Diosaw jumampiskani, jupaxa sum sarnaqasiñamwa muni (Isaías 41:10). Jan payachasimti, Jehová Diosaruti taqi  chuyma atinisïta ukhaxa ‘chiqa thakinwa irpasïtamxa’ (Proverbios 3:5, 6).

20. Jehová Diosar katuyasxasaxa, ¿kunatsa uk jan imxasiñamäki?

²⁰ Kuntï yatiqxtan uka tuqit wal amuytʼasisaxa inas sapaki Jehová Diosaru mayisisa katuyasiñ amtchïta. Ukampisa, chiqpachapuni Diosar munasirinakax aka mä mayïwimpwa phuqapxañapa: ‘lakampi arsupxañapaw qhispiyatañatakixa’ (Romanos 10:10). ¿Kunjamsa ukax luraña?

21, 22. ¿Kunjamanakatsa jumaxa iyawsäwimata ‘arsusmaxaʼ?

 ²¹ Tama taypin irpir chuymaninakan pʼiqiñchiriparuwa, bautisasiñ muntxa sasaw säta. Jupaw mayni irpir chuymaninakaru arxayani, jumamp chika, Biblian qallta yatichäwinakata jisktʼanak uñakipapxañamataki. Jupanakatï bautisasiñataki mayitanak phuqtaw sapxätam ukhaxa, jutïr jachʼa tantachäwinwa bautisasïta sapxarakïtamwa. a Bautisasipxi ukhaxa, mä arstʼäwiw utji, ukanxa kun sañs muni bautisasiñaxa uka tuqitwa qhanañchasi. Uka arstʼäwi tukuyxaruxa, arstʼirixa pä jisktʼanakwa bautisasirinakaruxa jisktʼi, ukat bautisasirinakaxa jachʼatwa arsupxi. Ukhamatwa iyawsäwinïtasxa ‘lakampi arsusa’ uñachtʼaytanxa.

²² Bautisasxäta ukhawa yaqhanakaxa Diosar katuyasxatamxa yatxapxani, ukatxa Jehová Diosan Qhanañchiripäxätawa. Bautisasirinakaruxa qʼalwa umaru chhaqantayapxi, ukhamatwa Diosaru katuyasitanakapxa uñachtʼayapxi.

23. ¿‘Awkina, Yuqana, Qullan Ajayumpina sutiparu’ bautisasiñax kamsañs muni?

²³ Arkirinakajaxa ‘Awkina, Yuqana, qullan ajayumpina sutiparuwa’ bautisasipxani sasaw Jesusax satayna (Mateo 28:19, MT). Ukhamasti, bautisasirinakax Jehová Diosaruw Apnaqirirjam iyawsapxi ukat Jesucriston luräwinakaparusa iyawsapxarakiwa uk sañ muni (Salmo 83:18; Mateo 28:18). Ukatxa, qullan ajayun jan ukax Diosan chʼamapan luratanakapsa iyawsapxarakiwa (Gálatas 5:22, 23; 2 Pedro 1:21).

24, 25. 1) ¿Bautisasiñax kamsañ muni? 2) ¿Kuna jisktʼasa jaysañaxa?

²⁴ Bautisasiñaxa janiw umar wayuntayasiñakïkiti. Jan ukasti wali wakiskir uñachtʼäwiwa. Umaru chhaqantkäta ukhaxa “jiwkasmasa” ukhamawa, mä arunxa, nayra sarnaqäwimsa jan ukax jan wali luräwinakamsa apanukkasma  ukhamawa. Ukat umat waysxapxätamxa Diosan munañapa lurañatakiwa jakxtaxa uk sañ munaraki. Janiw kuna uttʼawirusa, amtarusa, jaqinakarusa jan ukax luräwinakarusa katuyasktati, jan ukasti, pachpa Jehová Diosaruwa katuyasxtaxa, janipuniwa ukxa armañamäkiti. Diosar katuyasitamasa bautisasitamasa Jupampi suma parlasiñataki jan ukax suma apasiñamataki qalltäwiwa (Salmo 25:14).

²⁵ Ukampisa, qhispiyasiñatakixa janiw bautisasiñasakïkiti. Apóstol Pabloxa akham sasawa qillqatayna: “Qhispiyasiñanakamat[akisti], altʼat chuymampi axsarañampirak phuqhapxam” sasa (Filipenses 2:12). Bautisasiñaxa qalltakiwa. Jichhaxa aka mä jisktʼaw utji: ¿kunjamsa Diosampikïsksna ukat jupan munasiñapan jakasiskaraksnaxa? Tukuy jaljaw uka tuqitxa qhanañchaski.