1, 2. Kʼari yupaychäwiru jaytxasaxa, ¿kun jisktʼasiñamasa ukat kunatsa wakisispa uk jisktʼasiñaxa?

 AMUYTʼAÑATAKI, phujumaru mä jaqixa jamasat qʼañunakampi warantaspa, uk yatisaxa, ¿kamachasmasa? Jan jiwañatakixa yaqha phujutwa um waytasinxasmaxa. Ukampisa, jisktʼasiñamawa: “¿Uka qʼañu uma umasax usutäpachätti?” sasa.

² Niya ukhamjamarakiwa, kʼari yupaychäwinakaxa jan wali yatichäwinakampi, qʼañu luräwinakampi phuqantatäpxiwa siw Bibliaxa (2 Corintios 6:17). Ukatwa wali wakisirixa uraqpach apnaqiri kʼari yupaychäwi “jachʼa Babiloniata” mistxañaxa (Apocalipsis 18:2, 4). ¿Jumax mistxtati? Ukhamächixa, walik mistxtaxa. Jichhaxa, janiw kʼari yupaychäwi jaytañakïkiti, janirakiw uka yupaychäwit sarxäw sañakïkisa. Jan ukasti akham jisktʼasiñamawa: “Uka kʼari yupaychäwin luräwinakapaxa jan ukax yatichäwinakapasa, ¿jakäwijan utjaskakpachati?” sasa. Uka tuqit mä qhawqha uñachtʼäwinak uñjañäni.

3. 1) ¿Bibliax santonak tuqitxa kamsisa, ukat yaqhipanakatakix kunatsa santonak jaytañax chʼamäpacha? 2) Kʼari yupaychäwin apnaqapki ukanakax utjstamxa, ¿kamachañamasa?

³ Santonaka jan ukax lurat diosanakwa yaqhipanakaxa utanakaparu nayratpach uchasipxi. ¿Juman utjaraktamti? Utjstamxa, inas jumatakix ukanakampipuni Diosar mayisiñjamächi, ukat inas wali munatächi. Ukampisa, kunjamsa Diosar yupaychañasa ukxa jupa pachpaw sañapa. Ukhamasti, Diosax janiw munkiti kuna kasta diosanaka apnaqañassa siw Bibliaxa (Éxodo 20:4, 5; Salmo 115:4-8; Isaías 42:8; 1 Juan 5:21). Ukatwa, chiqa yupaychäwiru makatañatakixa, tʼunjxañamawa taqi kunanakatï kʼari yupaychäwinki ukanakxa. Jehová Diosaruxa “axtasiyiwa” ukanakaxa, ukhamarakiw jumax uñjañama (Deuteronomio 27:15).

4. 1) ¿Kunatsa inamayakïpacha jiwatanakaru yupaychañaxa? 2) Israel markarux Jehová Diosax janiw kuna kasta layqasiñanaksa lurapxätati sänwa, ¿kunatsa ukham sispachänxa?

⁴ Yaqhip kʼari yupaychäwinakanxa jiwatanakaruwa jachʼañchapxaraki. Janir Bibliat chiqa yatiqkasaxa yaqhipax  akhamwa amuyapxäna: jiwatanakaxa nayra jiwatanakamp chikasa jakasipkaspa, jakaskirinakarux yanaptʼankistaspasa jan ukax ñanqhachkistaspasa ukhama. Inas jumax jiwatanakaru sumachañataki chʼamachasirïsta. Ukampisa, kunjamtï 6 jaljan yatiqaniwayktanxa, jiwatanakax janiw kawkins jakapkiti. Ukatwa, jiwatanakampi parlañ munañaxa inamayaspaxa. Kuna arutï jiwat familiaramatjama istʼasinixa, janiw uka jiwat familiaraman arupäkiti, jan ukasti saxranakan arupawa. Ukatwa, Jehová Diosax Israel markaruxa iwxatayna, jan jiwatanakampi parlañ yanapxañapataki, jan kuna kasta layqasiñanaksa lurapxañapataki (Deuteronomio 18:10-12).

5. Santonakaru jan ukax jiwatanakaru yupaychirïstaxa, ¿kamachañamasa?

⁵ Kawkïri yupaychäwirutix jumax saraskayäta ukanxa santonakaru, jiwatanakaru yupaychapxchixa, ¿kamachasmasa? Uka tuqit Diosax kamsisa uka arunakapwa Bibliat sum liytʼañama. Jehová Diosarux sapürupuniw mayisiñama; chiqa yupaychäwinkañwa munta, jumjam amuyañwa munta sañamarakiwa (Isaías 55:9).

6, 7. 1) ¿Navidadanxa khitiruw uruyasi sapxisa, ukat Jesusan arkirinakapax amtapxirïnti? 2) ¿Nayra patak maranakanxa uruyasiñat kamsapxirïnsa?

⁶ Jiwasanakatï uñtʼat fiestanaka amtaskakiñänixa kʼari yupaychäwinakampiwa yupaychäwisaru qʼañuchsna. Navidadat parltʼañäni. Jesucriston yurit urupaw amtasi sapxiwa, niya taqpach cristianopxtwa siri yupaychäwinakawa Navidad amtapxi. Ukampisa, janiw kuna qillqatasa utjkiti Jesusan nayrïr arkirinakapaxa yurïwip amtapxirïnti uka tuqitxa. Los orígenes sagrados de las cosas profundas sat libroxa siwa: “Criston yurïwipata pä patak maranak saraqataruxa, janiw khitis yatkänti, ni yäqapkarakïnsa kunapachasa chiqpachapuni Jesusax yuritayna ukxa”.

 ⁷ Arkirinakapaxa Jesusan yurïw urupata yatkasinsa, janiw amtapkasapänti. ¿Kunatsa? Kunattix nayrïr cristianonakatakixa “uka fiestanakaxa [...] Diosar jan yupaychiri jaqinakan luräwinakapänwa” (Las cosas nuestras de cada día). Biblianxa, Jehová Diosar jan yupaychiri pä apnaqirinakan uruyäwitakwa qillqataxa (Génesis 40:20; Marcos 6:21). Kʼari diosanakarurakiwa ukham uruyapxirïna. Sañäni, Roma markan utjasirinakaxa mayo phaxsit 24 urunak saraqataruw Diana sat diosaparuxa uruyapxirïna, ukat qhipürusti Intin Apolo diosaparurakiw uruyapxirïna. Ukhamasti, chiqa cristianonakax mara uruyasiñxa janiw amtapkänti, kunattix kʼari diosanakar yupaychañänwa.

8. Kunatsa mara phuqäwip amtapxirïpachäna uka tuqit arstʼma.

⁸ Nayrir cristianonakaxa Jesusan yuriw urupxa, ak yatisarakiw jan amtapxirïkpachänti: nayra Greciankirinaka, Romankirinakawa uka mara uruyasiñanakxa yaqha amuyumpi amtapxirïna. Akham sapxirïnwa, sapa jaqixa jarkʼir ajayuniwa, uka jaqi yurki uka uruwa uka ajayux ukankirïna ukat jakäwipansa uñjarakïnwa, sasa. Uka ajayusti mä diosampi mayachatänwa, uka diosaxa mara phuqir jaqin urupanwa mara phuqarakïna siw mä libroxa (The Lore of Birthdays). Ukham uruyasiñanakaxa janipuniw Jehová Diosatakix walïkaspati (Isaías 65:11, 12). Ukhamasti, ¿kunatsa walja jaqinakaxa Navidad amtapxpacha?

9. Diciembre phaxsit 25 urunak saraqataruxa, ¿kunatsa Jesusan yurïwipa amtañataki ajllipxatayna?

⁹ Jesusax aka Uraqiru jutkäna uka maranakatxa walja maranakaw pasxatayna, ukhaw diciembre phaxsit 25 urunak saraqat uru ajllipxatayna Jesusan yurïwipa amtañatakixa. Ukampisa Jesusax janiw diciembre phaxsinxa yurkänti. a Ukhamasti, ¿kunatsa uka uru ajllipxpachänxa?  Cristianopxtwa sirinakaxa inas munapxchïna “uka markanakan fiestanakapa, cristiano fiestanakaru tukuyaña. [...] Diciembre phaxsit 25 urunak saraqataruxa, Diosar jan yupaychir Roma markankirinakaxa [...] ‘jachʼa chʼaman Intin’ mistsunïwipwa uruyapxirïna” (Enciclopedia de la Religión Católica). Khaysa, Europa, inti jals tuqi markanakanxa, thaya pachanxa, kunapachatï Intis jayankxi ukapachaxa, uka markan utjasirinakaxa Intiruw uruyapxirïna saräwipat kuttʼanxañapataki, ukhamat wasitat sum luptʼanxañapataki, juntʼutatayanxañapataki. Diciembre phaxsit 25 urunak saraqatarusa Intis kuttʼanxaspa ukhamwa amuyapxäna. Uka jaqinakaru cristianoptayañatakiwa uka fiestanakxa “cristianonakankaspasa” ukham tukuyapxatayna uka kʼari cristianonakan irpirinakapaxa. b

10. ¿Kunatsa nayrax yaqhip jaqinakaxa Navidadxa jan amtapxirïkäna?

¹⁰ Navidadaxa Diosar jan yupaychirinakan fiestapawa ukax jaya maranakatpachwa yatisxi. Uka uruchäwixa janixay Bibliankchitixa, ukatwa 1600 maranakanxa Inglaterra markansa, Estados Unidos jachʼa markan markanakapansa jarkʼatänxa. Navidad urun jan irnaqañ munirinakaxa multa apsutapxänwa. Uka qhipatwa, wasitata uka nayra costumbrenakaxa amtasxarakïna, ukat yaqha fiestanakampwa uñstayxapxarakïna. Navidadasti jachʼa fiestjama uñjatäxarakiwa, ukat yaqha markanakansa  ukhamarakiwa. Ukampisa Diosar kusisiyasa sarnaqañ munirinakaxa amuyasipxiwa, uka fiestanakaxa kʼari yupaychäwita jutatapa, ukatwa jan amtapkiti, ni ukham uñstayat yaqha fiestanaksa uruyapkarakiti. c

11. Kunatsa yaqhip jaqinakaxa fiestanakxa amtapxi, ukat jiwasanakatakixa kunas wali wakisirixa uka tuqit arstʼma.

¹¹ Navidadasa ukat yaqha fiestanakasa janiw chiqap cristianonakan uñstayatäkiti, ukxa yaqhipanakax yatisipkiwa, ukampisa jupanakax walikïskaspasa ukhamwa amuyapxi. Jupanakax akham sapxiwa: janiw khitis kʼari yupaychäwin uñstayatjam uñjxiti, ukampisa familiampiw uka urux sum qamartʼastanxa sasa. ¿Jumax ukhamarakti amuyta? Ukhamasti chiqa yupaychäwiru makatañxa familiamar munasiñawa jarkʼtamxa, janiw kʼari yupaychäwiru munasiñäkiti. Ukatxa ak yatiñamarakiwa, familia Inuqiri, Jehová Diosaxa, familiamampi kusisita sarnaqasiñamwa munaraki (Efesios 3:14, 15, MT). Yaqha tuqinakatwa familiasaru kusisiysna, ukat Diosan chuymaparusa kusisiyaraksnawa. Apóstol Pablowa kunas wali wakisirix jiwasanakatakixa uk akham sas arsutayna: “Kunatix Diosatakix askïki uk [...] munapxapunim” sasa (Efesios 5:10).

12. Qʼañu tuqit jutiri costumbrenaka fiestanaka apanukuñatakixa, ¿kuna amuytʼäwisa sum uñachtʼayistaspa?

¹² Inas jumax akham amuyaraksta, uka fiestanakax janiw nayra amtampix uruyasxiti sasa. ¿Chiqpachansa qalltap yatiñaxa wakisiti? Wakisiwa. Sañäni, mä dulce axtkañ qʼañu ñiqʼin jaquntat uñjasma. ¿Aptasisin chʼamuntasmati? Janiwa; axtkañ qʼañüchixaya. Uka dulcer uñtasita fiestanakaw utji, amuyataxa sumjamaspawa, ukampisa axtkañ qʼañutwa uka fiestanakax juti. Chiqa yupaychäwiru makatañ munasaxa, Isaías profetjamawa amuyañasa.  Taqi chuyma Diosar yupaychirinakaruxa sänwa: “Jan kuna qʼañurus llamktʼapxamti” sasa (Isaías 52:11).

13. ¿Kunatsa chʼamäspaxa fiestanak jaytxañaxa?

¹³ Inas uka costumbrenak jaytañax chʼamächini. Sañäni: irnaqir masinakamaxa, kunatsa uka fiestanakar jan sarkta sapxiristam ukhaxa, ¿kamachasmasa? ¿Navidad fiestan mä waxtʼa churiristamsti? ¿Katuqañax waliskaspati? ¿Kamachasmasa chachamasa jan ukax warmimasa jan Bibliat jumjam yatkaspa ukhaxa? Uka fiestanakan yaqha wawanakaxa churäwinak katuqapxi, ¿wawanakamaxa uk jan uñchʼukipxañapatakixa kuns lurasma?

14, 15. ¿Kamachasmasa maynitix ¡feliz navidad! ¡Suma machaq maräpana! siristam ukhaxa, jan ukax kuns churiristam ukhaxa?

¹⁴ Ukhamanakan uñjasisaxa sum amuytʼasawa kuns säta kuns lurärakita. Amuytʼañataki, maynitix ¡feliz navidad! ¡Suma machaq maräpana! siristamxa, yuspärañamakiwa. Sapa kutitï jikisipxätaxa, inas irnaqir masimächisa, wakisispawa jukʼampi qhanañchtʼaña. Suma arunakampiw qhanañchañama. Bibliaxa akhamwa iwxi: “Parlatanakamasti sumäñapapuniwa jan khitirus coler churirjama, sapa mayniru kunjam arusxatañsa yatipxañamarakiwa” sasa (Colosenses 4:6). Ukhamasti, chuymar jan usuyir arunakampiwa qhanañchañama kunjamsa uka costumbre tuqinakatxa amuyxta ukanaka. Waliskiw waxtʼasiñasa, qamartʼasiñasa, ukampisa yaqhüruw walispa, sasaw qhanañchañama.

¹⁵ ¿Maynitix uka fiestanakan waxtʼaña muniristamsti? ¿Kamachasmasa? Inas akham sapxiristma: “Nayasti, juman aka fiesta jan fiestachirïtamxa yattwa, ukatpï aka waxtʼa apanirapsmaxa” sasa. Inas jumatakixa uka waxtʼa katuqañaxa walïskchispa, ukaxa janiw fiestar sarañ sañ munkiti. Ukampisa Bibliat yatiqatama jan yatkchixa, uka fiesta jan uruchxatamatxa wakisispawa yatiyañama. Ukawa sum  qhanañchaspa kunatsa jumax waxtʼa katuqasisaxa jan yaqha kuttʼayktaxa. Mä tuqitxa, inas khitis yantʼañatakiki waxtʼa apanirapiristam akham sasa: waxtʼa mayisiñ laykuxa, Bibliat yatiqatanakapsa pʼakintaspawa sasa. Ukham jaqinakat katuqañax janipuniw walïkaspati.

16. Fiesta tuqinakatxa, ¿familiaranakamaru jan chuyma usuyañatakixa kamachañamasa?

¹⁶ ¿Familiaranakamaxa Biblian yatichäwinakaparjam jan sarnaqapkchixa kamachasmasa? Wasitata, suma arunakampiwa parltʼañama, janiw chuym usuyañamäkiti. Janiw wakiskiti sapa costumbrenakapata jiskhisiskañaxa. Arsüwiparuxa respetañamawa, kunjamtï jumax yatiqatanakamaru respetatäñ munktaxa ukhama (Mateo 7:12). Ukampisa, amuyasiñamawa janiw kunjamatsa uka fiestanakaru yanaptʼañamäkiti. Maysa tuqitxa, amuyasiñamarakiwa, uka fiestar jan yanaptʼirjamäkchi uka lurañanakxa luraskarakismawa. Kunjamtï yatktanxa, chuymamax sumäskañapatakipuniw sarnaqañamaxa (1 Timoteo 1:18, 19).

17. ¿Kuns lurasma wawanakamaxa fiestanakan yaqha wawanakaru jan uñchʼukipxañapatakixa?

¹⁷ Fiestanakan yaqha wawanakaxa churäwinak katuqapxi, ¿wawanakamaxa uk jan uñchʼukipxañapatakixa kuns lurasma? Yaqhip awkinakaxa yaqha urunakawa wawanakaparuxa kunanaks churapxi. Ukhamatwa wawanakamaxa yaqha wawanakaru jan uñchʼukipkaniti. ¿Wawanakamataki wali suma churäwixa kunäspasa? Jupanakampïñataki tiempo apstʼasiña, munasiñ uñachtʼayaña, ukanakawa.

18. ¿Kunjamsa cristianonakan tantachäwinakapaxa yanaptʼaspa chiqa yupaychäwiru makatañxa?

¹⁸ Diosar kusisiyañatakixa, kʼari yupaychäwitxa mistxañamawa, chiqa yupaychäwiruwa makatxañama. ¿Kunjamsa uk lurasma? Bibliax siwa: “Uñjasipxarakiñäni purapata  wiytasiñasataki munasiñaru aski lurawinakampiru; tantachasiwisxa jan jaytanukusa, kamisatï yaqhipanakax ukaru yatitäpxi, ukatsipana purapat chʼamañchtʼasisa, ukat jukʼampi, khä uru jakʼachasisinkiri uñjasina” sasa (Hebreos 10:24, 25, MT). Diosax kunjamtï munki ukhamaruwa uka tantachäwinakanxa yupaychapxi, kusiskañ tantachäwinakawa (Salmo 22:22; 122:1). Chiqa chuymampi Jesusar arkirinakaxa, uka tantachäwinakanxa ‘maynit maynikamaw yanaptʼasipxi’ (Romanos 1:12).

19. ¿Kunatsa wakisix Bibliat yatiqatanakam yatiyañamaxa?

¹⁹ Chiqa yupaychäwi tuqitxa saytʼasirakismawa: Jehová Diosan Qhanañchirinakapampi kuntï Bibliat yatiqaskta uka tuqit yaqhanakaru parlasa. Chiqasa, walja jaqinakawa “llaktʼatäsipki” akapachan jan wali luräwinaka uñjasinxa (Ezequiel 9:4). Inas jumax ukham jaqinaka uñtʼsta. Bibliax kuntï jutïrpachataki siski uka tuqinakat yatiyma. Jan armasimti Bibliat yatiqkta uka yatichäwinakata yatichañxa, janirak armasimti chiqap cristianonakampi tantachasiñsa. Ukhamti lurätaxa, sapürutjamwa kʼari yupaychäwin costumbrenakapa armxätaxa. Jan payachasimti: chiqa yupaychäwiruti makatätaxa, wali kusisitaw sarnaqasïta, walja bendicionanakarakwa katuqäta (Malaquías 3:10).