CRISTIANONAKAXA Jesucriston jiwäwipa amtapxäta satäpxiwa, ukasti “Santa Cena” satarakiwa (1 Corintios 11:20). Uk amtañaxa, ¿kunatsa wali wakisirixa? ¿Kunapachasa amtasiñapa? Ukatxa, ¿kunjam amtasiñapasa?

33 j.p. maranwa judionakax Pascua amtasipkäna, uka arumaw Jesucristox uka cena uttʼayatayna. Pascua fiestxa maran mä kutikwa amtapxirïna, nisán (judionakan calendariopa) phaxsita 14 urunak saraqataru. Judionakaxa uka uru tantiyañatakixa suyapxirïnwa panqarir phaxsinakana kunapachatï urumpi arumampixa chik chikaru jaljaski uka uru. Uka uru jakʼankiri wawa phaxsitwa, nisán phaxsix jakhusiñ qalltäna. Pascua uruxa 14 urunak nisán phaxsita saraqataruw waktʼirïna, Inti jalantxaru.

Uka arumawa, Jesusax apostolanakapampi Pascua amtapxatayna. Judas Iscariote chacharu khitanukxasawa Jesusax Santa Cena uttʼayäna. Judionakan Pascuap lantiwa uka cenax uñstayatäxäna, ukatwa maran mä kuti amtasiñapäna.

Kunanakas lurasitayna, uka tuqitxa Mateow akham sasa qillqatayna: “Jesusax tʼantʼa irtasinwa yuspagaräna. Pachjasinsti discipulonakaparurakiw churäna: ‘Manqʼapxam; akax nayan janchixawa’ sasa. Ukxarusti mä copa astaraki. Diosar yuspagarasinsti jupanakaruw churaraki, akham sasa: ‘Jumanakasti taqini  aka copat umtʼapxarakim. Akasti nayan wilaxarakiwa. Ukasti [machaq] arustʼäwiwa, kawkïritix wartatäkani walja jaqinakar juchanakapata qhispiyañatakiʼ” sasa (Mateo 26:26-28).

Chiqapuniw Jesusax tʼantʼxa jañchiparu tukuyän ukat vinsa wilaptayäna sasaw yaqhipanakax sapxi. Ukampisa, Jesusan jañchipax janiw kuna kamachtʼatäkänsa kunapachatix tʼantʼa churkän ukhaxa. Ukhamasti, ¿chiqapuniw apostolanakax Jesusan jañchipsa wilapsa manqʼapxän sisnati? Janiwa, ukax jaqir manqʼantañamp sasispawa, ukax wali jachʼa juchawa, Diosan kamachipa pʼakintañawa (Génesis 9:3, 4; Levítico 17:10). Lucas 22:20 jiskʼa tʼaqansti Jesusax sänwa: “Aka copax machaq arustʼäwiwa wilax tuqi, akasti jumanakan askimatakiw wartasi” sasa. ¿Chiqapuniti uka copax ‘machaq arustʼäwiru’ tuküna? Janiwa, mä arustʼäwixa mä amtäwiwa, janiw uñjksnati.

Ukhamax tʼantʼas vinosa ak amuyañatakiwa: tʼantʼaxa Criston jan juchani jañchip sañ muni. Jesusax Pascuat jiltʼir jan levaduran tʼantʼa irtäna (Éxodo 12:8). Jila partix Biblian levadurax juchampi, jan wali luräwinakampi sasiwa. Ukhamax Jesusax jan juchan cuerpopwa luqtäna, ukwa tʼantʼax sañ munäna (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vinosti Jesusan wilap sañ muni, ukampiw machaq arustʼäwixa uttʼayasïna. Jesusaxa “jaqinakar juchanakapata qhispiyañataki[wa]” wilaj wartasïxa sasaw satayna. Ukhamïpanwa, yaqhip jaqinakaxa Jehová Diosan nayraqatapanxa qʼumäpxi, ukhamaraki Diosampis machaq arustʼäwirux mantapxi (Hebreos 9:14; 10:16, 17). Uka arustʼäwi utjatapatwa 144.000 jaqinakaxa alaxpacharu sarapxi. Ukanxa apnaqirinakäpxaniwa ukat sacerdotenakjam luqtirïpxarakiniwa, taqi jaqinakan askipataki (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Khitinakas Criston jiwatapat sapa mara amtaski uka tantachäwinxa tʼantʼa manqʼapxaspa ukat vinsa umtʼapxaspaxa? Kunjamtï yatiqktanxa, khitinakatix machaq arustʼäwir mantapki, mä arunxa, alaxpacharu sarapkani ukanakakiw tʼantʼa manqʼapxaspa ukat vinsa umtʼapxaspa. Diosan qullan ajayupaw alaxpachan apnaqirinakjam ajllitätapxa jupanakaru sum  qhanañchi (Romanos 8:16). Uka jaqinakaxa Jesusamp chika Apnaqañatakiwa mä arustʼäwiru mantapxi (Lucas 22:29).

Ukhamasti, ¿khitinakatix kusipach Uraqin jakasipkani ukanakax kuns lurapxi? Kunjamtï, Jesusax siskänxa, Santa Cenaruw sarapxi, janis vino umapkchisa tʼantʼa manqʼapkchisa ukar sarasax respetwa uñachtʼayapxi. Jehová Diosan Qhanañchirinakapax sapa maraw Santa Cena amtapxi, inti jalantxaru, uka jaypʼutwa nisán phaxsin 14 urupax qallti. Uraqpachanxa mä qhawqhanikiw alaxpachar saririnakaxa, ukampisa uka amtäwix wali wakisiriw Jesusan taqi arkirinakapatakixa. Jehová Diosampi Jesucristompixa walpunwa munasipxistu, uka tuqita lupʼiñ urasawa ukapachaxa (Juan 3:16).