APOCALIPSIS libroxa walja uñachtʼäwinakatwa parli (Apocalipsis 1:1). Mä qʼañu lurir warmitwa parli, paraparusti “Jachʼa Babilonia” sas qillqxatatawa siwa. Ukatxa ‘akapacha markanakxaru, ukhamarak taqi casta parlani markanakxaru’ qunxatataw sarakiwa (Apocalipsis 17:1, 5, 15). Janiw mä chiqpach warmix ukham lurkaspati, ukhamasti Jachʼa Babiloniaxa mä uñachtʼäwiwa. ¿Ukhamax kun sañs munpacha?

Apocalipsis 17:18 qillqatanxa “kawkïri markatï aka uraqina taqi reyinakaru apnaqkis uka markawa” sasaw qhanañchi.  “Marka” aruxa amuytʼayistuwa jaqinakani mä uttʼayat markätapa. Ukatxa, uka ‘markaxa aka uraqina taqi reyinakaruw apnaqi’. Ukhamasti, Jachʼa Babiloniaxa Uraqpachxaru mä jachʼa apnaqäwiwa. Ukampisa, ¿kuna kasta apnaqirïpachasa? Yupaychäwinak tuqit apnaqiriwa. Kunatsa ukhamaw sistanxa, ukatakixa Apocalipsis librota mä qhawqha jiskʼa tʼaqanaka uñxatañäni.

Jachʼa apnaqäwinakaxa: política tuqita, alakipanak tuqita jan ukax yupaychäw tuqitäspawa. Jachʼa Babiloniax janiw política tuqitäkaspati, kunattixa, “akapachankir reyinakasti”, ‘jupampiw juch lurapxi’ siw Diosan Arupanxa. Jachʼa Babiloniax akapachankir apnaqirinakampiw jucha luri siski ukaxa, amtanakapsa mayachtʼasipkaspa ukham sañ muni. Ukatwa ‘qʼañu warmi’ sataxa (Apocalipsis 17:1, 2; Santiago 4:4).

Kunapachatï uka warmixa tukjatäkani ukhaxa “khitinakatix uka markampi alakipa lurapkäna”, ukanakaxa jakhusipxarakiniw jan ukax jachapxaniw siw Bibliaxa. Ukhamasti, Jachʼa Babiloniaxa janiw alakipa lurañ tuqit mä jachʼa apnaqäwikiti. Ukatsti, akapachankir apnaqirinakasa, alakipirinakasa ‘jayatakwa’ uñchʼukipxani siw Bibliaxa (Apocalipsis 18:3, 9, 10, 15-17). Ukhamaxa Jachʼa Babiloniaxa janiw akapacha político apnaqirïkisa ni alakipa lurirïkisa, jan ukasti yupaychäwi tuqit mä jachʼa apnaqäwiwa.

Yupaychäw tuqita jachʼa apnaqirïtapxa janiw ukhamatak yatktanti, jan ukasti, qhanpunwa akham sarakixa: ‘Taqi markanakarusti layqasitanakampirakiw sallqji’ sasa (Apocalipsis 18:23). Taqi layqasiñanakaxa kʼari yupaychäwinakata, saxranakatwa juti. Ukatwa Bibliaxa uka Jachʼa Babiloniaruxa akham sas sutichi: “Supayanakan utjäwipa” sasa (Apocalipsis 18:2; Deuteronomio 18:10-12). Ukatsti, uka jachʼa apnaqäwixa chiqa yupaychäwiruxa uñisiwa, “Diosat parlirinakarux” wal arknaqaraki (Apocalipsis 18:24). Walpunwa chiqa yupaychäwiruxa uñisi, “Jesucristot qhanañchirinaka[ruxa]” awisax jiwayiwa (Apocalipsis 17:6). Ukhamaxa, Jachʼa Babiloniaxa, Jehová Diosar kutkatasiri uraqpachan apnaqri taqi kʼari yupaychäwinakawa.