1. ¿Kunjamatsa familiaxa kusisit jakasispa?

 FAMILIANAKAX wali kusisit jakasipxañapwa Jehová Diosax muni. Ukatwa Arupanxa, familiankiri sapa maynirux yatichi, ukat sapa maynit kunsa Jupax mayi uksa qhanañcharakiwa. Uka iwxanakarjam sarnaqañaxa familiatakix kusisiñwa apani. Kunjamtï Jesusax siskäna: “¡Jukʼamp kusisiñanïpxiwa khitinakatix Diosan arunakap istʼapki, ukhamarak jaysapxi ukanakaxa!” (Lucas 11:28).

2. ¿Kusisita familianïñatakixa kun yatiñasasa wakisi?

² Familiaxa Jehová Diosan uttʼayatawa, uk yatiñasawa kusisita familianïñasatakixa. Ukatwa Jesusaxa ‘Awkisaw’ sataynaxa (Mateo 6:9). Chiqasa, taqpach familianakaxa alaxpachankir Awkisampi uttʼayatawa, ukat jupax yatiwa kunanakasa familiaru kusisiyi (Efesios 3:14, 15, MT). Ukhamasti, Bibliarjamaxa, ¿kunsa Diosax sapa maynit maypacha?

3. ¿Familian qalltapatxa kamsis Bibliaxa, ukat kunjamsa chiqätap yattanxa?

³ Jehová Diosawa, Adanampi Evampiru lurasaxa jaqichatayna. Utjasipxañapatakix Edén sata mä suma huertwa churatayna ukat wawanakanïpxätaw sarakitaynawa. Jupanakarux akham sänwa: “Jichhax wali mirantapxam, aka uraqirusti  phuqhantapxarakim” sasa (Génesis 1:26-28; 2:18, 21-24). Uka arunakax janiw mä cuentokïkiti ni mä säwikïkisa. Familian qalltäwipat Génesis libron qhanañchaski ukaruxa Jesusax chiqaw sataynawa (Mateo 19:4, 5). Jichhürunakanxa llakinakakiw utjaski, janiw kunjamtï Diosax qalltan munkäna ukhamäxiti. Ukampisa, jichha tiemponsa familianakaxa kusisitawa jakasipxaspa. Uk uñjañäni.

4. 1) ¿Familiasax kusisita jakasiñapatakixa kunjamsa taqinis yanaptʼsna? 2) Familianakaxa kusisita jakasipxañapatakixa, ¿kunatsa Jesusan jakäwipat yatiqasiñax wakisi?

⁴ Familiasax kusisit jakasiñapatakixa taqiniw yanaptʼsna. Ukatakixa Diosat yatiqasiñasawa, munasiñ uñachtʼayañasarakiwa (Efesios 5:1, 2). Ukampisa janiw Diosarux uñjktanti, ¿kunjamaraki jupatxa yatiqassnasti? Janis uñjkstanxa, yatsnaw kunanaksa luri. Uk yatiñasatakiw jilïr Yuqaparux khitanitayna (Juan 1:14, 18). Jesucristox alaxpachankir Awkipjamapuniw sarnaqäna, ukat jupar uñjañas istʼañasa, Awkiparu uñjañäkaspasa istʼañäkaspasa ukhamänwa (Juan 14:9). Ukhamasti, Jesusan munasiñapat yatiqasawa, jupjam sarnaqasawa taqinis familiasan kusisit jakasiñapatakix yanapsna.

5, 6. 1) ¿Kunsa Jesusax chachanakaru yatichi tamapankirinakaru uñjasaxa? 2) ¿Diosampi juchanak pampachayasiñatakix kun lurañasasa?

⁵ Kunjamtï Jesusax arkirinakapar uñjkänxa ukhamrakwa chachax warmiparu uñjañapa siw Bibliaxa. Aka jiskʼa tʼaqanakan iwxap uñjañäni: “Chachanaka, munasipxam warminakamaru, kunjamtix Cristox iglesiaru munasi [jan ukax tamaru], ukhamarak jakañapsa jupa layku aptʼasiwayi ukhama. Chachax ukhamwa warmiparux munasiñapa, pachpa janchiparjama. Khititix warmiparux munaski ukax jupa pachpaw munasi. Janiw khitis pachpa janchiparux uñiskiti, jan ukasti manqʼayiwa ukhamarak imaraki. Cristox uka pachparakiw iglesiampix luri” (Efesios 5:23, 25-29).

⁶ Jesusax arkirinakaparux munasïnwa, ukwa chachanakax yatiqasipxañapa. Arkirinakapax juchararäpxchïnsa,  Jesusax “munasiñapsti qhipakamarakiw uñachtʼayäna”, jupanak laykuw jakañaps aptʼasïna (Juan 13:1; 15:13). Ukatwa chachanakarux sasixa: “Warminakamarux munapxarakim, janiraki jupanakatakix qhurüpxamti” sasa (Colosenses 3:19). ¿Kunas chacharux uka arunakarjam sarnaqañapatakix yanaptʼani, warmix pantjaschi ukhasa? Pantjasirïtapwa amtasiñapa, ukat Diosampi juchanak pampachayasiñatakixa, yaqhanakan juchanakap nayraqat pampachañapawa, ukax sañ muniwa, warmipan juchanakapamppacha. Maysa tuqitxa warmixa ukham lurañaparakiwa (Mateo 6:12, 14, 15). Ukatpï sapxixa, juchanak pampachasir chacha warmin jaqichasïwipaxa kusisiñaniw sasa.

7. ¿Kunanaksa Jesusaxa arkirinakapat amuyirïna, ukat kunatsa chachanakaxa yatiqasipxañapaxa?

⁷ Arkirinakapax kunjamäsipkänsa ukxa Jesusax sum amuyarakïna, uka tuqitsa chachanakax yatiqasipxañaparakiwa. Qhawqhakamxay arkirinakapax lurirjamapxchïna ukat kunanakxay munapxchïna ukanaksa Jesusax sum amuyirïna. Amuytʼañäni, kunapachatï wali qaritapkäna ukhaxa, akham sataynaw Jesusaxa: “Jutapxam, mä wasar chiqar samartʼir sarapxañäni” sasa (Marcos 6:30-32). Warmix ukham uñjatäñaparakiwa. Warmix [‘pʼakisiri vasoru uñtatatawʼ, MT] siw Bibliaxa —ukaxa pisi chʼamanïkaspasa ukham sañ muni— ukatsti chachax warmiparux “jachʼaru” aptañapaw siwa. ¿Kunatsa? Kunattix, “Diosax munasiñapanxa [chacharusa warmirusa] mayakwa jakañx churapxtam” siw Bibliaxa (1 Pedro 3:7). Jaqichasitanakax ak amtapxañapawa, Diosatakix taqi chuyma yupaychirinakapaw wali askixa. Dios nayraqatanxa chachas warmis mayakïtanwa (Salmo 101:6).

8. 1) ¿Kunatsa “khititix warmiparux munaski ukax jupa pachpaw munasi” sisnaxa? 2) ¿Kamsañs munpacha jaqichasitanakaxa “mayakïxapxiwa” siski uka arunakaxa?

⁸ “Khititix warmiparux munaski ukax jupa pachpaw munasi” siw Bibliaxa. Kunattix “janiw paninïkxapxiti jan ukasti mayakïxapxiwa” sasaw Jesusax satayna (Mateo 19:6). Ukhamasti, chachaxa warmipampikiw sarnaqasiñapa, janiw yaqhampi  ikintasiñapäkiti (Proverbios 5:15-21; Hebreos 13:4). Ukatakixa, chachas warmipatakix chachjamaw phuqañapa, warmis chachapatakix warmjamarakiwa phuqañapa, janiw maynix jupan munañapaki phuqañapäkiti (1 Corintios 7:3-5). Ukatxa akham sasirakiwa: “Janiw khitis pachpa janchiparux uñiskiti, jan ukasti manqʼayiwa ukhamarak imaraki”. Chachax kunjamtï jupa pachpa munaskixa ukhamwa warmiparux munasiñaparaki, ukatxa ak amtañaparakiwa, Jesucristoruwa cuenta churani (Efesios 5:29; 1 Corintios 11:3).

9. ¿Kunjamänaw Jesusax sisa Filipenses 1:8 qillqataxa, ukat kunatsa chachaxa ukhamäñaparakixa?

⁹ Apóstol Pabloxa “Jesucriston munasiñap[atwa]” parlarakïna (Filipenses 1:8). Jesusampi munatäsinxa arkirinakapaxa wali sum jikxatasipxäna. Uka arkirinakap taypinxa warminakaw utjarakïna, ukat jupanakarusa wali sumwa uñjäna (Juan 20:1, 11-13, 16). Ukhamarakiwa, warmix chachapampi munasitäñwa qʼayachtʼatäñwa munaraki.

10. ¿Kunsa warminakax Jesusat yatiqasipxaspa?

¹⁰ Mä institucionanjamarakiwa, familianxa mä pʼiqtʼirix munasi suma irpatäñapatakixa. Jesusasa pʼiqtʼiriniwa, ukat juparuw istʼi. “Chachasti warmin pʼiqiparakiwa, kunjamatix Diosax Criston pʼiqipäki ukhama” (1 Corintios 11:3). Jesusaxa pʼiqtʼiriparuxa, mä arunxa, Diosaruxa istʼapuniwa. Ukaxa yatiqasiñasatakiwa, kunattixa taqiniwa pʼiqtʼirinïtanxa ukat istʼasirïñasawa.

11. ¿Kunjamsa warmix chachaparu uñjañapa, ukat kunsa ukampix jikxataspa?

¹¹ Chachanakax juchararätapatxa pantjasipxapuniwa, ukat janiw suma pʼiqtʼirïpkapuniti. ¿Ukhamäkipansa kamachañapas warmixa? Janiw chachapar jiskʼachas yaqhanakar parlasiñapäkiti, ni familiansa pʼiqtʼañ munañapäkarakiti. Ak amtañapawa, suma chuymanïñas llampʼu chuymanïñas Diosatakix wali askiwa (1 Pedro 3:4). Ukham amuyätaxa, chachamar istʼañax janiw chʼamäkaniti, jan waltʼäwinkkäta  ukhasa. Ukat Bibliax akham siwa: ‘Warmisti chachaparux istʼañapapuniwa’ sasa (Efesios 5:33). Ukatxa, ¿kamachaspasa chachatï Cristoru pʼiqtʼiriparjam jan iyawskani ukhaxa? Bibliax akham siwa chachaninakaruxa: “Chachanakamar istʼasa sarnaqapxam, ukhamata inas kawkïri chachas jan Tatitur iyawskchi ukax jumanakan sarnaqawinakam tuqi Tatitutaki jikxatatäñapataki jan kuna arumpisa, jan ukasti jumanakan suma sarnaqatam uñjasaki” sasa (1 Pedro 3:1, 2).

12. ¿Warmitï chachaparu respetompi suma arunakampi iwxtʼani ukhaxa walikïskaspati?

¹² Chachax cristianüskpansa janisa, awisaxa warmix janiw chachapampi kikp amtanïkapuniti. Ukat suma arunakampi chachaparu amtanakap sani ukhaxa, janiw respet faltkaniti. Warmixa chiqankaspawa, ukat chachatix warmin arupa istʼani ukhaxa familiapatakix askïspawa. Bibliax Sara warmitwa parli, familiapan jan waltʼañ askichañatakiwa Abraham chachaparux suma arunakampi iwxtʼatayna. Ukat Abrahamax warmiparux janiw istʼkänti, ukatpi Diosax satayna: “Kuntix Sara warmimax mayktam ukanakxa phuqhaskakim” sasa (Génesis 21:9-12). Ukampisa chachatix kuns amtani ukat uka amtapaxa janiraki Diosan kamachinakap pʼakintkaniti ukhaxa warmixa chachaparu istʼañapawa ukatsti yanaptʼañaparakiwa (Hechos 5:29; Efesios 5:24).

13. 1) ¿Kun lurapxañapaw chachan warminakax sisa Tito 2:4, 5 qillqataxa? 2) ¿Jaljtañampit divorciasiñampit kamsis Bibliaxa?

¹³ Warmin luräwinakapax wali askiw familian kusisit jakasiñapatakixa. Bibliax siwa: ‘Warminakax chachanakapar munapxpan ukhamarak wawanakaparusaʼ. “Suma amuyunipxañapawa, qʼuma chuymaninaka, ukhamarak utapsa sum apnaqirinaka, suma chuymaninaka, chachanakaparus istʼirinaka” sasa (Tito 2:4, 5). Ukham sarnaqir warmisa taykasa familiapan wali munatäniwa respetatarakïniwa (Proverbios 31:10, 28). Ukampisa, taqi jaqichasitanakaw pantjasirïpxi. Ukatwa, sinti jan waltʼañanakanxa jaljtañaru jan ukax divorcioru puripxaspa. Diosan Arupax jaljtapxaspaw  siwa, ukampis janiw khitisa ukhamaki jaljtkaspati, “warmix jan chachaparux apanukpati. [...] Ukhamaraki chachax janiw warmipampix jaljtañapäkiti” siwa (1 Corintios 7:10, 11). Ukatxa, chachas jan ukax warmis yaqhampi ikintaschi ukhakiw divorciasipxaspa siw Bibliaxa (Mateo 19:9).

14. ¿Kunjamsa Jesusaxa wawanakaru uñjäna, ukat wawanakaxa awk taykapata kunsa munapxi?

¹⁴ Kunjamsa wawanakaru uñjaña uka tuqitwa Jesusax sarnaqäwipampi awkinakarux yatichäna. Kunapachatï wawanakax Jesusar jakʼachasipxän ukhaxa yaqhipanakax jarkʼapxataynawa, ukatwa Jesusax säna: “Wawanakax nayan ukar jutasipkpan sam, jan jarkʼapxamti” sasa. Ukxarusti Bibliax sarakiwa “wawanakar ichxarusinsti, amparapamp luqxatasaw jupanakarux bendecirakïna” sasa (Marcos 10:13-16). Jesusax wawanakatakix tiempo apstʼasirïnwa, ¿janiti jumax awkjamaxa wawanakamataki tiempo apstʼasirakisma? Wawanakamatakix walja tiempo apstʼasiñamawa, ukwa wawanakax munapxi, janiw jukʼa tiempokïñapäkiti. Jupanakaru yatichañatakixa tiempo apstʼasiñamapuniwa, ukham sasawa Jehová Diosaxa awkinakaru iwxi (Deuteronomio 6:4-9).

15. ¿Wawanakar jarkʼaqañatakixa kuns lurapxaspa awkinakaxa?

 ¹⁵ Sapürutjam ñanqhaptaskir pachanwa jakastanxa. Ukatwa, awkinakax wawanakaparu jarkʼaqapxañapaxa jan walinakatxa, sañäni, jan wali amtani qʼañu jaqinakaw wawanakaru jan walinak lurapxaspa. Jesusax arkirinakaparux sum uñjäna, ukat ‘munat wawanakaja’ sasaw jupanakarux säna. Jiwayañataki katuntapkäna ukhasa, arkirinakaparu qhispiyañwa munäna (Juan 13:33; 18:7-9). Awkjamaxa jan ukax taykjamasa wal amuyasipxañamawa, Supayax jan waliruwa wawamaruxa purtʼayaspa. Ukatxa, uka jan walinakatxa iwxtʼañamapuniwa (1 Pedro 5:8). a Wawanakaru ajayu tuqita,  jañchi tuqita, amuy tuqita jan waltʼayañanakaxa añchäxapuniw jichhürunakanxa, janiw nayrax ukhamirïkänti.

16. ¿Kunsa awkinakax yatiqasipxaspa kunjamtï Jesusax jucharar arkirinakaparu uñjkatayna ukatxa?

¹⁶ Janir Jesusar jiwayapkäna uka arumaxa, khitis jilïrinxa uka tuqitwa arkirinakapax jiskhisisipkäna. Ukat Jesusax janiw jupanakataki thitkänti, jan ukasti suma arunakapampi ukat uñachtʼäwimpiwa jupanakarux chiqañchäna (Lucas 22:24-27; Juan 13:3-8). Wawanïstaxa, ¿kunjamsa Jesusat yatiqasisma wawamaru chiqañchañatakixa? Wawanakatakix chiqañchäwix munasipuniwa, ukampisa janipuniw thithita chiqañchañasäkiti jan ukasti ‘juchapatjamakwa chiqañchañasaʼ. Janïr arxaykasax amuytʼasipunma, parlatanakamampi jan ‘usuchjañamataki’ (Jeremías 30:11; Proverbios 12:18). Wawax chiqañchataxa yatiñapaw kunatsa uka chiqañchäwix jupataki wali askixa (Efesios 6:4; Hebreos 12:9-11).

17. ¿Kunatsa wawanakaxa Jesusat yatiqasipxañapa?

¹⁷ ¿Wawanakax Jesusat yatiqasipxarakispati? Jïsa. Wawanakax awkinakaparu istʼapxañapapuniwa, ukwa Jesusax sarnaqäwipampix uñachtʼayäna. Ukatxa sänwa: “Nayax arstwa kuntix Awkix yatichkitu uka [...]. Nayax jupar kusisiykirpun kuns lur[txa]” sasa (Juan 8:28, 29). Kunjamtï Jesusax alaxpachankir Awkiparu istʼkänxa, ukhamwa wawanakax awkinakaparu istʼapxañapa. Ukham siw Bibliaxa (Efesios 6:1-3). Jesusax jan juchan wawänwa, ukat José awkipasa María taykapasa juchararapxänwa, ukhamäkipansa Jesusax jupanakarux istʼapunïnwa. Ukat, ukham sarnaqatapatxa Jesusan familiapaxa kusisitapxänwa (Lucas 2:4, 5, 51, 52).

18. Kunatsa Jesusax alaxpachankir Awkiparu istʼapuniritayna, ukat wawanakaxa awkinakaparu istʼasaxa khitirus kusisiyi uk arstʼma.

¹⁸ ¿Kunjamsa wawanakax Jesusjamäpxarakispa awkinakapar kusisiyañataki? Istʼasirïpxañapawa. Chiqasa, wayn tawaqunakatakixa awk taykaru istʼañax chʼamäspawa, ukampis uk lurañaswa Diosax muni (Proverbios 1:8; 6:20). Jesusaxa  Awkiparuxa istʼapunirïnwa, sinti jan waltʼañankkäna ukhasa istʼaskakïnwa. Diosax wali tʼaqhiskañ lurañwa Jesusarux churatayna, uk phuqaskäna ukhaxa akham sänwa: “Aka tʼaqhisiñatxa qhispiyita” sasa. Mä arunxa, uka luräwit qhispiyit sänwa. Ukhampachasa, Diosan munañapxa phuqaskakïnwa. Kunatï wakiski ukxa Diosaw yati, ukwa Jesusax amuyasïna (Lucas 22:42). Kawkïr wawanakatï istʼasiñ yatiqapki ukanakaxa awkinakaparusa ukat alaxpachankir Awkiparusa wal kusisiyapxarakini (Proverbios 23:22-25). b

19. 1) ¿Kunjamsa waynanakaru Supayax yantʼi? 2) ¿Wawanakana jan wali sarnaqatapaxa kunjamtʼayisa awkinakaruxa?

¹⁹ Supayax Jesusaruw yantʼäna, jichhax ukhamarakiw jan walinakampi waynanakarux yantʼi (Mateo 4:1-10). Sañäni, jan walinak lurañatakiw wayna masinakapampi yantʼayaspa, ukat janiw sañax chʼamäspawa ukxa yatiw Supayaxa. Ukhamasti waynanakax janiw jan wali jaqinakampi sarnaqapxañapäkiti (1 Corintios 15:33). Jacobon Dina phuchapat parltʼañäni: Jehová Diosar jan yupaychirinakampiw mayachasitayna, ukax jan waltʼañanakaruw aptʼäna (Génesis 34:1, 2). Kunapachatï familiata maynix jan walinakar purtʼaski jan ukax qʼañu lurañanakar purtʼaski ukhaxa taqiniw familianxa jachañan uñjasipxi, wayn tawaqu uk amuytʼasiñamawa (Proverbios 17:21, 25).

20. Familian kusisit jakasiñatakixa, ¿kunsa sapa maynix lurapxañapa?

²⁰ Familian jan waltʼañax utjki ukhaxa, Biblian iwxanakaparjam askichañax janiw chʼamäkiti. Kunjamtï yatiqktanxa, uka kamachinakarjam sarnaqañax wali askiwa familian kusisit jakasiñatakixa. Ukhamax warmininaka, kunjamtï Jesucristox tamaparu uñjkän ukham warmimarux munasipxarakma. Chachaninaka, chacharuxa istʼapxapunim ukat Proverbios 31:10-31 aytat warmitsa yatiqasipxarakma. Awkinaka, wawanakamarux yatichapxapunma (Proverbios 22:6). Familia pʼiqtʼirinaka, ‘utamxa sum apnaqapxma’ (1 Timoteo 3:4, 5; 5:8). Wawanaka, awkinakamar istʼapxapunma (Colosenses 3:20). Janiw familianxa khitis chiqapäktanti; pantjasirïtanwa. Ukhamax altʼat chuymanipxañäni, yaqhanakarus juch pampachita sas mayisipxapuniñäni.

21. ¿Kuna wali suma suytʼäwisa utjixa, ukat kunjamsa jichhasa wali kusisit familian jakassnaxa?

²¹ Jïsa, Bibliax walja iwxanakaniwa familian sum jakasiñasatakixa. Ukatxa jutïrpachatwa parlaraki, kunjamas kusipach uraqix Jehová Diosar taqi chuyma yupaychirinakampi phuqantayatäni ukampita (Apocalipsis 21:3, 4). ¡Wali suma suytʼäwiw ukaxa! Ukatxa, Diosan iwxanakaparjamatï sarnaqañänixa, jichhürunakansa wali kusisit familianïñäniwa.