BIBLIANXA, Abrahamax wali iyawsäwin chachjam uñt’atawa, jupaw Ur sat qamir markan wali suman utjasiñ apanukuwayäna. Ukat Harán markan mä qhawqha tiempo jakawayasïnxa, mä chiqat yaqha chiqar sarir jaqjamaw carpanakan jiwañapkam jakasiwayäna (Génesis 12:1-3; Hechos 7:2-7; Hebreos 11:8-10). Ukhaman jakasiwaykchïnsa, jupat Bibliax akham siwa: “kunapachatix sinti chuymanïxän ukkhaw [wali kusisita, NM] jiwawayxarakïna” sasa (Génesis 25:8). ¿Kunas ukham wali kusisit jakasiypachäna? Chiqpachansa, janiw taqi kuna yänak jikxatatapat wali kusisit niya jiwañampïki ukham mä chuymankipstat awkit parlktanti. Jan ukasti jupax Diosatak wali jach’a iyawsäwinïtapatxa, “[Jehová] Diosan amigopa” satänwa (Santiago 2:23; Isaías 41:8). Ukat Luriripampixa Abrahamax wali sum apasïna, ukatwa jupax ukham wali kusisit jakasiwayäna.

² Kunjamtï Abrahamax khä pusi waranq maranakan lurkänxa, ukhamarakiw jumax Diosamp wali sum apasisma, wali suma ukat kusisit jakasirakisma. Ukat inas jumatakix Luririn amigopäñax wali muspharañjamächi, ukampis jumax amigopäsmawa. Ukatakixa jupar uñt’añamawa ukat munasiñamarakiwa (1 Corintios 8:3; Gálatas 4:9). Ukham Luririmp wali  sum apasisaxa, jakäwimanxa wali sum jakasiñaw utjarakini.

³ Ukat khitinakatï Jesusan luqtasitapar iyawsapki ukanakaruxa, Jehová Diosaw wali kusisit jakasipxañapatakix amuyt’ayi (Isaías 48:17). Amtañäni, Adanaxa kunatï walïki jan walïki uk amtapat lurasawa Diosaru kutkatasiwayäna. Jehová Diosaw Yuqapan luqtasitapampix taqi jaqinakaru alawayi ukhamatwa jiwañampin juchampin esclavoñat qhispiyasipxaspa, ukampis sapa mayniw uka luqtasitaparux iyawsapxañapa ukat kunatï walïki jan walïki uksa janirakiw munañapar lurapxañapäkiti. Jan ukax kuna kamachinaktï Jesusan luqtasitapar iyawsirinakar Diosax churki ukar ist’añasawa.

⁴ Ukat Biblian yatichäwinakap juk’at juk’at yatiqasa ukat yatichäwinakaparjam sarnaqasaxa, kunatï walïki jan walïki uka tuqit Diosax kamspachas ukxa wali askïtapwa yatiqäta (Salmo 19:7-9). Ukat Jehová Diosan Moisés profetapjamarakiw akham sas arsuta: “Arsutanakamatix chiqächi ukaxa uñacht’ayitaya amtäwinakamxa ukhamata nayan confiansa utjañapataki” sasa (Éxodo 33:13; Salmo 25:4). Ukat aka ‘jan wali tiemponakan’ utjki uka jan walt’äwinakar saykatañatakixa Bibliax wali aski yatichäwinakaniwa (2 Timoteo 3:1). Ukat Jehová Diosar munasiñamas juk’ampirakiw jilxattani, ukat juk’amp sum uñt’añatakisa, wali sum apasiñamatakis yanapt’arakïtamwa.

⁵ Abrahamaxa ‘chuymant’ata kusisita’ ukhamaw jiwawayxäna, ukampis jiwasax jiwir jaqjamaxa janiw wiñayatak jakktanti. Ukat taqinis chuymankipstañar purkstanxa, ukampis yurktan ukhatpachaw wal jakañ muntanxa. ¿Kunatsa? Kunattix Diosaw “jaqin chuymaparu” uchatayna “kunatï wiñayäki” uka (Eclesiastés 3:11). Wiñayatakis jakkchiñänixa, Jehová Diosan taqi luratanakapatxa janiw sumpachpun amuyt’kañäniti. Ukhamax muspharkañ luratanakap uñch’ukiñasa, yatxatañasa ukat luratanakapat askinak apsuñasa janipuniw tukuskaniti (Salmo 19:1-4; 104:24; 139:14).

⁶ Ukampis Uraqitï jichhürunakjam jan walt’äwinakamp phuqantatakïskaspa ukhaxa, inas jumax wiñayatak jan jakañ munkchismati. Ukampis janiw llakisiñamäkiti, kunattix Bibliax akham siwa: “Jiwasax arsutaparjamaw suyt’asktan mä machaq uraqi, mä machaq alaxpachampi, kuntix Diosax: ‘Churapxämaw’ siskistu  uka” sasa (2 Pedro 3:13). “Machaq alaxpacha” siski uka arunakaxa, alaxpachankir apnaqäwiwa mä arunxa Diosan Apnaqäwipawa ukat uka apnaqäwiw taqi aka Uraqpachar apnaqani. Ukat “Machaq uraqi” siski uka arunakaxa, Diosan Apnaqäwipar ist’apki uka jaqinakawa. Uka amtap phuqasiñapatakixa, Diosax niyaw ‘aka Uraqi t’unjirinakarux’ tukjani (Apocalipsis 11:18; 2 Pedro 3:10).

⁷ ¿“Niyaw” siski uka arux kamsañs muni? ‘Akapach tukuskani uka urun chimpunakapata’ parlkasinxa markanakpur ch’axwañanakaw utjani sasaw Jesusax sawayäna, ukat “manq’at pist’añax utjani [...], uraq khatatinakas walja chiqanakana”, “usunaka” ukat ‘t’aqhisiñanakas’ jilxattarakiniwa sasa (Mateo 24:3-13; Lucas 21:10, 11; 2 Timoteo 3:1-5). Ukat akham sasarakiw arsuwayäna: “Akanak pasir uñjapkäta ukkhaxa, yatipxam Diosan reinopax jak’ankatapa” sasa (Lucas 21:31). Chiqpachansa, kunapachatï Jehová Diosax jan wali luräwinakan sarnaqir jaqinakar tukjkani uka urux wali jak’ankxiwa. *

⁸ Ukat “Taqi ch’aman Diosan jach’a urupana”, mä arunxa kuna urutï Jehová Diosax aka Uraqit taqi jan walinak tukjkani uka qhipatxa aka Uraqisax mä paraisor tukuyatäxaniwa (Apocalipsis 16:14, 16; Isaías 51:3). Ukapachawa, “aski jaqinakax uraq katuqapxani, wiñayatakiw ukan jakapxarakini” (Salmo 37:29). Ukampis khitinakatï jiwatäxapxi ukanakatxa akham sasaw Jesusax säna: “Jan muspharapxamti ak arsutaxatxa, horasax purininiwa taqi jiwatanakasti arupx ist’apxaniwa. Ukatsti uka jiwatanakax jaktapxaniwa. Aski luririnakasti wiñay jakañatakiw jaktapxani, ñanqha luririnakasti juchañchatäñatakiw jaktapxani” sasa (Juan 5:28, 29). Jehová Diosaxa taqi jaqinakarux wal munasi, ukatwa jiwatanakarux jaktayani. Ciencia tuqit yatxatat jaqinakaxa, ingeniería genética satäkis ukampix inas jichhürun mä jaqi kikpa clonación tuqnam lurañ munapxchini, ukampis Luririxa janiw clonación tuqnam jiwatanakarux jaktaykaniti, kunattix mä jaqix kunjamasa ukxa wali sum jupax amti,  ukhamax khitinakatï qhispiyatäñ wakiski ukanakaruxa jakäwipxa kutt’ayxaniwa. Chiqpachansa, mä paraisonwa jumax jiwatäxapxi uka familiaranakamampis amigonakamampis aka Uraqin jikisxarakïta.

⁹ ¿Paraison jakasiñax kunjamänisa? Aka Uraqixa kusisit chachanaka ukat warminakamp phuqantatäniwa ukat mayachthapitaw Luririr jach’añchapxarakini. “Janiw khitis sis[xani]ti: ‘Usutätwa’ sasaxa.” (Isaías 33:24; 54:13.) Janirakiw khitis jach’a llakinakans ni kuna jan walt’äwinakans uñjasxaniti. Ukat Diosan amtaparjamaxa, taqpach jaqinakaw wali kusisiñamp irnaqapxani ukat manq’añanakapas jilarkirirakiw utjani (Salmo 72:16; Isaías 65:23). Animalanakampis sumankañan jakasipxarakini, taqpach jaqinakampis ukhamaraki, taqi ukanakat sipansa, ‘Diosampiw sum’ apasipxani (Romanos 5:1; Salmo 37:11; 72:7; Isaías 11:6-9).

¹⁰ Paraison wali kusisit jakasiñamatakixa, ¿kun lurañamasa? Uka tuqitxa Jesucristox akham sänwa: “Aka wiñay jakañax juma sapa chiqpach Diosar uñt’añanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3). Ukhamax Jehová Diosampiru Jesucristompiru uñt’añatakix yatiqaskakim ukhamarus kuntï Diosax jumarux mayktam uksa yatiqaskakiñamarakiwa. Ukhamatwa Jehová Diosarux kusisiyäta, jumas ukhamatarakiw jakäwimanxa wali kusisit jakasirakïta.