Oraqpachan Jilïr Irpirinakan qellqanitapa
‘Jumanakajj yatichirinakäpjjañamawa’ (Heb. 5:12). Jehová Diosakiwa aka oraqpachan wali suma Yatichirejja. Kuntï Jupat yatktan uk mayninakar yatichañasatakiw jiwasanakar invittʼistu. Familiaru, congregacionaru, jaqenakaru kunatï Jehová Diosat cheqäki uk yatichañajja, wali kusiskañawa ukat taqe chuymaw uk lurañasaraki. Ukampis ¿kunjamatsa suma yatichirïsna?
Apóstol Pablon arunakapaw uka jisktʼarojj qhanañchi, jupajj Timoteo waynarojj akham sasaw säna: “Mayninak nayraqatan sum liytʼañatakisa, mayninakar chʼamañchtʼañatakisa, yatichañatakisa chʼamachasiskakim” sasa. Ukat akham saskakïnwa: “Ukhamatwa juma pachpas salvasïta, ukhamaraki khitinakatï jumar istʼapktam ukanakas salvasipjjani” sasa (1 Tim. 4:13, 16). Kuntï yatiyktan ukajja, salvasipjjañapatakiw jaqenakarojj yanaptʼi. Ukatwa suma liytʼirïñataki, suma yatichirïñatak chʼamachasiñajj wali wakiskirejja. Aka folletojja, ukatakiw yanaptʼätam. Ukhamajj kunjam lurtʼatas uk uñjañäni.
Bibliat apstʼat textonakajja, mä suma yatichäwiniwa jan ukajj mä uñachtʼäwiw ukan utji, ukasti kuna toqettï uka yatichäwejj parlki ukaruw yanaptʼi.
Jehová Diosjamajja, janiw khiti Yatichirisa utjkiti (Job 36:22). Aka folletojja, sum liytʼañataki ukat sum yatichañatakiw yanaptʼätam. Kuntï yatichktan ukajj Jehová Diosankiwa, uk janipuniw armañamäkiti. Juparakiwa jaqenakarojj markapar irpani (Juan 6:44). Ukhamasti, espíritu santop Jehová Diosarojj mayiñamapuniwa. Diosan Arupampipuniw yatichañama. Janipuniw kuntï jumajj amuykta ukak sañamäkiti, jaqenakar yanaptʼañatakejj kuntï Jehová Diosajj amuyki ukwa sañama. Jehová Diosar taqe chuymampi munasipjjañapatakiw istʼirinakar yanaptʼañama.
Jehová Diosaw jumarojj wali wakiskir yatiyäwi jaqenakar yatiyañamatak invitʼtam. Uka yatiyäwejj janipuniw nayrajj yatiyaskänti. Jumatï ‘Diosajj churki uka chʼamar’ confiystajja, uka wali wakiskir yatiyäw yatiyätawa (1 Ped. 4:11).
Jumanakamp chika Diosan arunakap yatiyirinaka,
Jehová Diosan Testigonakapan Oraqpachan Jilïr Irpirinakapa
