1, 2. ¿Kunatsa jumajj Jehová Diosar munasta?

¿JUMAJJ Diosar munastati? Inas Diosar wal munasitamat jupar vidam katuyassta. Inas Diosajj juman wali munat Amigomarakïchi. Ukampis janïr jupar munaskayäta ukhaw Diosajj munasjjayätamjja. Biblian akham siwa: “Diosaw nayraqat munasistu, ukatwa jiwasajj munasiñ yatiraktanjja” sasa (1 Juan 4:19).

² Kunanaktï Jehová Diosajj jiwasar munasitap laykojj lurawayki ukanakat amuytʼañäni. Jupajj mä suma oraqe churistu, kunatï kusisit jakasiñatakejj wakiski ukanakwa churarakistu (Mateo 5:43-48; Apocalipsis 4:11). Diosajj amigopäsna ukwa muni, ukatwa kunatï jupar uñtʼañatakejj wakiski ukanak churistu. Biblia liytʼasajj Jehová Diosaruw istʼtanjja. Jupajj oración lurktan ukhaw jiwasar istʼarakistu (Salmo 65:2). Ukatjja espíritu santopampiw chʼam churistu, suma thakin irparakistu (Lucas 11:13). Munasiñapatjja wali munat Wawaparuw aka oraqer khitanïna, ukhamat juchampit jiwañampit jaqenakar salvañataki (Juan 3:16; Romanos 5:8 liytʼañataki).

3. ¿Kunjamatsa Jehová Diosan amigopäskaksna?

³ Jichhajj mä suma amigomat parltʼañäni. Jupajj  walinsa jan walinsa jan jaytjasiri suma amigomawa. Jumatï jupan amigopäskakiñ munsta ukhajj chʼamachasiñamawa. Ukhamarakiw Jehová Diosan amigopäskakiñ munstan ukhajj chʼamachasiñasa, jupjam suma amigojj janiw utjkiti. Jupajj wiñay amigosäspawa. Ukatwa Biblian akham sistu: “Jumanakajj Diosan wali munata jakasipkaki[m]” sasa (Judas 21). ¿Kunjamatsa Diosan wali munata jakasiskaksna, jan ukajj kunjamatsa janipun Diosat jitheqtksna? Biblian akham siwa: “Jiwasatejj Diosar munasstan ukhajja, mandamientonakap phoqarakiñäniwa, mandamientonakap phoqañajj janiw chʼamäkiti” sasa (1 Juan 5:3).

4, 5. ¿Kunjamatsa Jehová Diosar munasiñ qalltawayta?

⁴ Apóstol Juanajja, kunjamsa Diosar munasitas uñachtʼaysna uka toqetwa qellqäna. ¿Kunjamsa Diosar munasiñ qalltawayta uk amtasktati?

⁵ Jehová Diosajj machaq mundon wiñayatak jakasisma ukwa muni. Ukan jakasiñamatakejja Diosajj kunayman lurawayi. Wali munat Wawaparuw aka oraqer khitaniwayi, ukhamatwa mä suma regalo churawayistu, taqe ukanakat yateqasajj kunjamas chuymaman jikjjatasirïta uk amtañäni (Mateo 20:28; Juan 8:29; Romanos 5:12, 18). Jehová Diosajj qhawqsa munastam uk yatisajj wal kusisirïtajja, ukatwa Diosar munasiñ qalltawaytajja (1 Juan 4:9, 10 liytʼañataki).

6. 1) ¿Kunjamsa maynir munasitas uñachtʼaysna? 2)  ¿Kunanaksa Jehová Diosar munasitam laykojj lurawayta?

⁶ Diosar ukham munasitamajj qalltakïskänwa. Amuytʼañataki, maynir munastan ukhajja, juparojj janiw “munassmawa” sasakejj sisktanti, jan ukasti  kunatï jupar kusisiyki ukwa lurtanjja. Ukhamarakiw Jehová Diosar munasitam laykojj kunatï jupar kusisiyki ukanak lurpachätajja. Jupar jukʼamp munasitam laykojja, inas vidam katuyasjjsta, bautisasjjaraksta. Vidam katuyasisajja, wiñayatakiw servïma sasaw mä promesa Diosar lurarakpachätajja (Romanos 14:7, 8 liytʼañataki). ¿Kunas uk phoqañatakejj yanaptʼiristamjja?

7. 1) Jehová Diosarutï munasstanjja, ¿kunsa lurañäni? 2) ¿Kunanakas Diosatakejj jan walïki?

⁷ Jiwasatejj Diosar munasstanjja, ‘mandamientonakap phoqañasawa’. Kunjam jakasiñassa Diosajj muni ukajj Bibliankiwa. Diosatakejj machantasiñasa, lunthatasiñasa, kʼarisiñasa, qʼañu jucha lurañasa, idolonakaru jaqenakaru adorañasa janiw walïkiti (1 Corintios 5:11; 6:18; 10:14; Efesios 4:28; Colosenses 3:9).

8, 9. Biblian mä leyejj jan utjkani ukhajja, ¿kunjamatsa kun lurañassa Diosajj muni uk yatsna? Mä uñachtʼäwimp uk qhanañchtʼma.

⁸ Jehová Diosatakjam sarnaqañatakejja, janiw mandamientonak phoqañakejj wakiskiti. Diosajj janiw taqe kunatak leyinak churkistuti. Awisajja kun lurañas wakisi uka toqet parlir mä leyejj janiw Biblian utjkiti. Ukhamajj ¿kunjamatsa suma amtanakar pursna? (Efesios 5:17). Biblianjja, Diosan wiñay yatichäwinakapaw utji, ukanakaw kunjamsa Diosajj amuyi uk yatichistu. Uka yatichäwinakajj principios bíblicos sasin uñtʼatarakiwa. Uka yatichäwinakaw suma amtanakar puriñatak yanaptʼistaspa. Biblia liyisajja, Jehová Diosajj kunjam Diosasa ukwa yateqtanjja. Kunanaksa uñisi, kunas kusisiyi, kunjamsa amuyi taqe ukanakwa  Biblian yateqaraktanjja (Salmo 97:10 liytʼañataki; Proverbios 6:16-19; 1 qhanañchäwi uñjjattʼäta).

⁹ Amuytʼañataki, ¿televisionansa Internetansa kunanak uñtañas walikïski uk kunjamatsa yatsna? Jehová Diosajj janiw uka toqet leyinak churkistuti. Antisas suma amtanakar puriñasatakejja, wiñay yatichäwinakapwa (principios bíblicos) jupajj churistu. Jichhürunakanjja televisionansa Internetansa nuwasiñanaka qʼañu jucha lurañanakakiw utjaski. Ukampis Biblianjja, Jehová Diosajj ‘nuwasiñanak munirinakarojj walpun uñisi’ siwa, ‘qʼañu jucha luririnakarusa Diosaw juchañchani’ sarakiwa (Salmo 11:5, NM; Hebreos 13:4). ¿Kunjamsa uka yatichäwinakajj suma amtanakar puriñatak yanaptʼistaspa? Kunanaktï Jehová Diosajj uñiski ukanak apanukuñasawa, kawkïr juchanakatï Diosatakejj ajjtaskañäki ukanaksa janipuniw uñchʼukiñasäkiti.

10, 11. ¿Kunatsa Jehová Diosar istʼañasa?

¹⁰ ¿Kunatsa Jehová Diosar istʼtanjja? Janiw castigot salvasiñ laykukisa, ni jan walinakar jan purtʼasiñ laykukisa istʼktanti (Gálatas 6:7). Jan ukasti, Jehová Diosar munasitas laykuw istʼtanjja. Kunjamtï mä wawajj tatapan kusisitäñap munkejja, ukhamarakiw jiwasajj alajjpachankir Awkisan kusisitäñap muntanjja. Jehová Diosajj sum sarnaqer jaqet uñjistu ukhajj wal kusistanjja (Proverbios 12:2, NM; 2 qhanañchäwi uñjjattʼäta).

¹¹ Janiw phoqañajj faciläki uka leyinakak phoqktanti, ni obligatakis istʼktanti. Janirakiw kawkïr leyinaksa phoqañäni kawkïrinaksa jan phoqkañäni ukanaksa ajllisktanti (Deuteronomio 12:32). Jan ukasti  Jehová Diosarojj taqe kunanwa istʼtanjja. Kunjamtï Salmo qellqerejj siskäna ukhamarakiw akham sissna: “Arunakamarojj munastwa, arunakamampejj kusisitaw uñjasta” sasa (Salmo 119:47; Romanos 6:17). Noé chachatwa yateqasiñasaraki, jupajj Jehová Diosar munasiñatjja taqe kunan istʼäna. Diosan Arupan akham siwa: “Noesti kunjämtejj Diosajj siskatayna ukhamwa taqe kunsa luräna” sasa (Génesis 6:22). ¿Jehová Diosajj jumat ukham sarakispa uk janit munkasma?

12. ¿Kunjamatsa Jehová Diosar kusisiysna?

¹² Jehová Diosar istʼktan ukhajja, jupajj wal kusisi (Proverbios 11:20; 27:11). ¿Janit ukajj musparkañäki? Istʼtan ukhajja, alajjpacha, aka oraqe ukhamarak taqe kunatï utjki ukanak Luriri Diosaruw kusisiytanjja. Ukampis janipuniw jupar istʼañasatakejj obligkistuti, jan ukasti libre sarnaqeri lurawayistu. Ukhamajj jiwasaw kunatï walïki, kunatï jan walïki ukanakat kun lurañsa ajllsna. Jehová Diosajj jupar munasiñat suma amtanakar pursna, ukat sum jakassna ukwa muni (Deuteronomio 30:15, 16, 19, 20; 3 qhanañchäwi uñjjattʼäta).

13, 14. ¿Kunatsa Jehová Diosan mandamientonakap phoqañajj janiw chʼamäkiti sasajj sissna? Mä uñachtʼäwimp uk qhanañchtʼma.

¹³ ¿Jehová Diosan mandamientonakap phoqañajj wali chʼamäpachati? ¿Leyinakapajj libre sarnaqañti jarkʼistu? Biblianjja akham sasaw qhan sistu: “Mandamientonakap phoqañajj janiw chʼamäkiti” sasa (1 Juan 5:3). Machak Testamento Biblianjja akham sarakiwa: “Kamachinakapasti janiw chʼama tukuñäkiti”  sasa. Ukhamasti Jehová Diosan mandamientonakapajj janiw mä jathi qʼepir uñtatäkiti, mä arunjja leyinakapa phoqañajj janiw wali chʼamäkiti. Jehová Diosajj janiw jan phoqañjam mandamientonak churkistuti.

¹⁴ Mä amigomas mä utat yaqha utar jakir sarjjaspa ukham sañäni. Kunatï jupan utjki ukanakjja qʼepinakaruw apthapisi. Yaqhepanakajj janiw sinti jathïkiti, ukhamajj facilakiw apañajja. Ukampis yaqhep qʼepinakajj wali jathinakawa, panin aptkañarakiwa. ¿Amigomajj wali jathïki uka qʼepi sapamaruk aptayiristamti? Janiw jupajj uka qʼepi aptasin usuchjasiñam munkaspati. Jehová Diosajj uka amigor uñtasitarakiwa. Jupajj janipuniw wali chʼamäki ukanak lurañas maykistuti (Deuteronomio 30:11-14). Jehová Diosajj sum uñtʼistu, ‘laqʼätas yatiwa, ñeqʼet luratätassa yatirakiwa’ (Salmo 103:14).

15. ¿Kunatsa Jehová Diosan mandamientonakapajj jiwasan sum jakasiñasatakiw sissna?

¹⁵ Jehová Diosan mandamientonakapajj jiwasan wali suma jaya tiempo jakasiñasatakiwa sasaw Moisesajj israelitanakar sirïna (Deuteronomio 5:28-33; 6:24). Jichhürunakanjja ukhamarakiwa. Jehová Diosajj kunanaktï maykistu ukanakajj jiwasan sum jakasiñasatakiwa (Isaías 48:17 liytʼañataki). Jehová Dios Awkisajja, kunatï jiwasatak walïki uk sum yati (Romanos 11:33). Biblianjja “Diosajj munasiñawa” sistuwa (1 Juan 4:8). Ukhamajj Jehová Diosajj munasiñatwa taqe kuns luri, munasiñatwa ewjjarakistu.

16. Pantjasirïkstansa akapachansa jakstanjja, ¿kunas Diosar istʼañatak yanaptʼistu?

¹⁶ Awisajj Diosar istʼañajj chʼamakïspawa. Akapachajj  Supayan apnaqatawa, jupajj jan walinak lurapjjañapatakiw jaqenakar chʼamañchi. Uka taypinwa jiwasajj jakaraktanjja (1 Juan 5:19). Maysa toqetjja, pantjasir jaqëtas laykojj jan wali amuyunak apanukuñatakiw chʼamachasiñasa, uka jan wali amuyunakajj Diosatwa apaqestaspa, janirakiw Diosarus istʼjjsnati (Romanos 7:21-25). Ukampis Jehová Diosar munasitas laykuw kunatï walïki uk lurañatak chʼamachastanjja. Qhawqsa jupar istʼañatak chʼamachastan uk jupajj sum yati, ukatwa wali chʼamani espíritu santopampi yanaptʼistu (1 Samuel 15:22, 23; Hechos 5:32). Uka espíritu santopaw suma chuymani jaqer tukuyistu, ukhamatwa Diosar istʼañajj jan chʼamäjjeti (Gálatas 5:22, 23).

17, 18. 1) ¿Kunsa aka libron yateqañäni? 2) ¿Kuna toqetsa jutïr yatichäwin yateqañäni?

¹⁷ Aka libronjja, Diosajj kunjam jakasiñassa muni ukwa yateqañäni. Kunjamsa wiñay yatichäwinakaparjama ukhamarak sum sarnaqañatak utjki uka leyinakaparjam sarnaqsna taqe ukanakwa yateqañäni. Amtañäni, Jehová Diosajj janiw jupar istʼañasatakejj obligkistuti. Ukampis jiwasatï jupar istʼañäni ukhajja, wali kusisitaw jakasiñäni, jutïrin sum jakasiñwa suyarakiñäni. Diosar istʼasajja jupar wal munasitaswa uñachtʼayañäni, ukaw jukʼamp wakiskirejja (4 qhanañchäwi uñjjattʼäta).

¹⁸ Kun lurañas walïski, kun lurañas jan walïki uk yatiñasatakejja, Diosajj concienciani lurawayistu. Jiwasatï concienciasar sum yatichañänejja, Diosar istʼañatakiw yanaptʼistani. Jutïr yatichäwinwa kunas concienciajja, kunjamsa yatichsna ukanak yateqañäni.