1, 2. Israelitanakar juchachasiyañatakejj ¿kunsa Balaam chachajj luräna?

CHAWLLA katuri mä jaqet amuytʼañäni, jupajj munki uka kasta chawllanakajj kawkjantï utjki ukawjaruw sari. Kunsa chawllajj munaspa uk ajllisajja anzuelor uchasaw umar jaqonti, ukatsti pacienciampiw achthapiñap suyi. Chawllajj achthapjje ukhajja jankʼakiw waytʼi, ukhamat anzuelojj chawlla lakar sum achuntañapataki, ukatsti umatwa apsjjaraki.

² Uka chawllar uñtasitarakiw jaqenakajj yantʼar jaltʼapjjaspa. Amuytʼañataki, israelitanakajj Suma Oraqer niya mantañampïkasajja, Moab sat cheqar purisaw campamentonakap uttʼayapjjäna. Moab markankir reyejja, Balaam chacharuw israelitanakar maldisiñapatak mayïna, walja qollqe churäma sarakïnwa. Balaamajj israelitanakar juchar purtʼasiyañwa amtäna, ukhamat Jehová Dios pachpa jupanakar maldisiñapataki. Ukatakejj kunampis juchar purtʼasiyaspa ukwa wali amuyumpi ajllïna. Moabita tawaqonakwa israelitanakan campamentopar khitäna, ukhamat israelit chachanakar juchar purtʼasiyapjjañapataki (Números 22:1-7; 31:15, 16; Apocalipsis 2:14).

3. ¿Kunjamsa Balaam chachan amtaparjam juchar purtʼasipjjäna?

 ³ Balaam chachan amtapajj phoqasïnwa. Israelit ‘chachanakajj moabita warminakampiw qʼañu juchanak lurapjjäna’. Falso diosanakaruw adorapjjäna. Baal-peor sat diosarus adorapjjarakïnwa, uka diosajj ajjtaskañ qʼañu jucha lurañanakan diosapänwa. Ukatwa Suma Oraqer niya mantañampïkasajj 24.000 israelitanakajj jiwarapjjäna (Números 25:1-9).

4. ¿Kunatsa walja israelitanakajj qʼañu jucha lurañar purtʼasipjjäna?

⁴ ¿Kunatsa israelitanakajj juchar purtʼasipjjäna? Jupanak pachpatakwa llakisipjjäna, jañchin munañapampiw apayasipjjarakïna. Kuntï Jehová Diosajj jupanak layku lurkäna uksa armasipjjänwa. Cheqas Diosat janipun jitheqtañatakejj walja razonanakaw utjäna, sañäni: esclavöñatwa Diosajj Egipto markat apsunïna, wasar lugaransa janiw manqʼa faltaykänti, usunakatsa jan walinakatsa jarkʼaqarakïnwa. Suma Oraqer puripjjañapatakis jukʼakiw faltjjäna (Hebreos 3:12). Ukhampachas qʼañu jucha lurañaruw purtʼasipjjäna. Pablojj jupanakat akham sänwa: “Janiraki qʼañu jucha lurañäniti, kunjamtï jupanakat yaqhepajj qʼañu jucha lurapkäna ukhamjja” sasa (1 Corintios 10:8).

5, 6. Kunatï israelitanakar paskäna ukat ¿kunsa yateqsna?

⁵ Kunjamtï israelitanakajj Suma Oraqer niya mantañampïsipkänjja, ukhamarakiw jiwasajj paraisor niya mantañampïsktanjja (1 Corintios 10:11). Akapachanjja, moabitanakat sipansa jaqenakajj jukʼampiw qʼañu jucha lurañ munapjje. Ukajj Diosan servirinakaparus jan walinakar purtʼasiyarakispawa. Supayajj qʼañu jucha lurañanakampiw waljanir Diosat apaqe (Números 25:6, 14; 2 Corintios 2:11; Judas 4).

 ⁶ Ukatwa akham jisktʼasiñasa: “¿Jañchin munañapampi apayasisin mä jukʼa kusistʼañti muntjja, jan ukajj Paraison wiñay kusisit jakasiñcha muntjja? ¿‘Qʼañu juchat jitheqtapjjam’ siski uka arunakar istʼañataki chʼamachasiñajj nayatak wali wakiskiriti?” sasa (1 Corintios 6:18).

7, 8. 1) ¿Kunas qʼañu juchajja? 2) ¿Kunatsa qʼañu jucha lurañanakajj sinti jan walejja?

⁷ Jichhürunakanjja, walja jaqenakajj jan phenqʼaniw juchanak lurapjje, chacha warmi jakañat parlir leyinakarus jiskʼachapjjarakiwa. Jichhajja, kunarus Biblianjja “qʼañu jucha luraña” sasejja uk qhanañchtʼañäni. Aka toqet parlañajj phenqʼasiñjamäkchisa, wakisiw qhanañchañajja, ukhamat kuntï Jehová Diosajj uñiski ukanak janipun lurañataki. Uka “qʼañu jucha lurañajj” akanakawa: jan casaratäkasin maynimpi ikintasiña, chacha pura jan ukajj warmi pura ikintasiña, animalanakampi ajjtaskañ qʼañunak luraña. Lakampi qʼañunak luraña (sexo oral), qhepäjjat qʼañunak luraña (sexo anal), qʼañu amtampi maynin partenakap llamkhaña (23 qhanañchäwi uñjjattʼäta).

⁸ Maynejj qʼañu jucha luraskakini ukhajja, janiw Diosan markapankjjañapäkiti sasaw Biblian qhanañchi (1 Corintios 6:9; Apocalipsis 22:15). Qʼañu juchan sarnaqer jaqejja janiw jupa pachpajj respetasjjeti, mayninakas janiw jupar confiyjjapjjeti. Qʼañu juchan sarnaqerejj kunayman jan walinakaruw purtʼasiraki: concienciapajj janiw qʼomäjjeti, awisajj usuriw uñstapjje, chacha warmjamas janiw sum jakasjjapjjeti, kunayman usunakwa katupjje, jiwañar kunaw purtʼasipjje (Gálatas 6:7, 8 liytʼañataki). Qʼañu jucha  lurasajj kunarus purtʼasispa uk maynejj sum amuytʼasispa ukhajja, janiw qʼañu juchan sarnaqañ munkaspati. Ukampis waljaniw uka toqet jan amuytʼasipkiti, jan ukasti jañchin munañanakapak piensasipki, ukaw qʼañu jucha lurañar puriyi. Awisajj pornografía uñchʼukisaw qʼañu jucha lurañanakar purtʼasipjjaraki.

9. ¿Kunatsa pornografía uñchʼukiñajj janipun walïki?

⁹ Pornografiajj qʼañu juchanak lurañ wal munapjjañapatakiw chʼamañchi. Jichhürunakanjja, pornografiajj taqe cheqanwa utj-jje: libronakana, musicanakana, televisionana, Internetana. Ukanak uñchʼukiñajj walïskaspas ukhamwa waljanejj amuyapjje, ukampis janipuniw akchʼas walïkiti. Ukanak uñchʼukirejj warmi jan ukajj chacha sinti munañampiw apayasispa, chacha warmjam ikthapiñat sipansa ajjtaskañanak lurañwa munjjaspa. Ukatjja masturbación lurasiñaruw purispa, casaratächejja chacha warmis janiw sum apasipkaspati, yaqhepajj divorcioruw puripjjaspa (Romanos 1:24-27; Efesios 4:19; 24 qhanañchäwi uñjjattʼäta).

10. Santiago 1:14, 15 qellqatajj ¿kunjamsa qʼañu juchar jan purtʼasiñatak yanaptʼistu?

¹⁰ Kunanakas qʼañu juchar apistaspa uk amuyasiñasawa. Santiago 1:14, 15 qellqatan akham siwa: “Sapa mayniw munañapampi apayasisa munañapampi katuntayasisajj yantʼat uñjasi. Kunapachatï munañajj chuyman jilti ukhajja, juchaw utj-jje, juchajj luratäjje ukhajja, jiwañaw utj-jjaraki” sasa. Ukhamajj pʼeqesar jan wali amuyunak jutani ukhajj jankʼakiw apanukuñasa. Mä akatjamat jan walinak uñjasajj jankʼakiw maysar uñtañasa, computadorsa jiwayañasawa  jan ukajj televisionsa yaqha canalaruw cambiañasa. Janipuniw jan wali munañanakamp apayasiñasäkiti. Jan wali amuyunak jan jankʼak apanuksna ukhajja, jan wali munañanakaw apnaqestaspa, ukanak apanukuñas chʼamäjjarakispawa (Mateo 5:29, 30 liytʼañataki).

11. ¿Kunjamsa Diosajj qʼañu amuyunak apanukuñ yanaptʼistaspa?

¹¹ Jiwasat sipansa Jehová Diosajj wali sum uñtʼistu. Jucharar jaqëtassa yatiwa, jan wali munañanakar atipjsnawa uksa yatirakiwa. Ukatwa akham sistu: “Cuerponakamatjja akanak chhaqtayapjjam: qʼañu jucha luraña, ajjtaskañanak luraña, warmi jan ukajj chacha añcha munañampi atipayasiña, jan walinak lurañ munaña, maynitakik taqe kuns munaña, ukajj idolonakar adorañawa” sasa (Colosenses 3:5). Diosan uka mayitapar phoqañajj chʼamakïspawa, ukampis Diosajj pacienciampiw suyistu, jupajj yanaptʼarakistaniwa (Salmo 68:19).  Mä jilatajja, waynitükasaw pornografía uñchʼukiñaru, masturbación lurasiñaru yatintäna. Colegionkir masinakapajj ukanak lurañajj walikïskaspasa ukham amuyapjjäna. Jilatasti akham siwa: “Kuntï lurkayäta ukajja concienciajaruw jan waltʼayäna, qʼañu jucha lurañanakaruw aparakitäna” sasa. Qhepatjja uka jan walinak apanukuñajj kunja wakiskirisa ukwa amuyjjäna, Diosan yanaptʼapampejj apanukjjarakïnwa. Jumatï qʼañu amuyunakanïsta ukhajja, ‘jaqen chʼamapat jilankki uka chʼamap’ Jehová Diosar mayisim, ukaw amuyunakam qʼomachañ yanaptʼätam (2 Corintios 4:7; 1 Corintios 9:27).

12. ¿Kunatsa ‘chuymas’ jarkʼaqañasa?

¹² Salomonajj akham qellqäna: “Taqe kuna imatäki ukat sipansa chuymam imam, jakañamasti uka chuymamatwa juti” sasa (Proverbios 4:23). ‘Chuyma’ sasinjja kunjam jaqëtansa ukatwa parlaskäna, ukaw Jehová Diosatakejj wali wakiskirejja. Kuntï uñchʼukktan ukajj chuymasaruw jan waltʼayaspa. Job chachajj sänwa: “Nayajj maya amtasta, ukasti akawa: Janipuni soltera tawaqonakarusa munapayañajja” sasa (Job 31:1). Job chachjamarakiw kunsa piensasktan uñchʼukisktan ukanakat amuyasiñasa. Ukatjja, Salmo qellqerjamarakiw akham mayisiñasa: “Janikiy [jan walinakar] uñtayistati” sasa (Salmo 119:37).

13. ¿Kunjam amiganaksa Dinajj ajllïna?

¹³ Amigonakajj suma thakiru jan ukajj jan wali thakiruw apistaspa. Diosan leyinakaparjam sarnaqer amigonak ajlliñäni ukhajja, Diosar serviñatakiw yanaptʼistani (Proverbios 13:20; 1 Corintios 15:33 liytʼañataki). Dinan sarnaqäwipajja, kunatsa amigonakas wali  amuyumpi ajlliñasa ukwa yatichistu. Dinajj Jacobun phuchapänwa, Diosar serviri familianwa jilsurakïna. Jupajj janiw qʼañu juchan sarnaqerïkänti. Ukampis Canaán markankir tawaqonakan amigapänwa. Uka markankirinakajj janiw Jehová Diosar adorapkänti, chacha warmi sarnaqañ toqetsa janiw Diosan servirinakapjam amuyapkänti, qʼañu juchanakan sarnaqerit uñtʼatäpjjarakïnwa (Levítico 18:6-25). Dinajj uka markankir amiganakapampïskäna ukhajja, Siquem sat waynaruw uñtʼäna. Jupajj Dinampïñ wal munäna. Siquemajj ‘familiapan wali aytatänwa’, ukampis janiw Jehová Diosar sirvkänti (Génesis 34:18, 19).

14. ¿Kuna jan walirus Dinajj purtʼasïna?

¹⁴ Siquemajj Dinar wal munatap laykojj munkir jan munkir katuntasaw violäna, ukajj walïskaspas ukham amuyarakïna (Génesis 34:1-4 liytʼañataki). Ukham luratapajja, Dinarus familiaparus jan walinakan uñjasiyäna (Génesis 34:7, 25-31; Gálatas 6:7, 8).

15, 16. ¿Kunanakas yatiñan jaqëñatak yanaptʼistaspa?

¹⁵ Jehová Diosan mayitanakapajj sum jakasiñatak kunja wakiskirisa uk yatiñatakejja, janiw Dinjam jan walinakar purtʼasiñajj wakiskiti. Proverbios 13:20 textojj siwa: “Suma yatiñan jaqenakamp chika sarnaqerejja, suma yatiñanirakïniwa; jan amuytʼan jaqenakamp chika sarnaqeristi, jan waltʼañaruwa purirakini” sasa. Ukhamasti kunatï Diosatak walïki uk sum amuyañatak chʼamachasiñäni, ukhamatwa jan walinakar jan purtʼaskañäniti (Proverbios 2:6-9; Salmo 1:1-3).

¹⁶ Yatiñan jaqëñatakejja, Bibliat yatjjatañasawa, janïr kun amtkasaw orasiñasa, ukatsti suma phoqeri amuyasiri esclavon ewjjtʼaparuw istʼañasaraki (Mateo 24:45; Santiago 1:5). Pantjasir jaqëtasjja yatisktanwa  (Jeremías 17:9). Ukampis maynejj “qʼañu juchar purtʼasirjamaw sarnaqtajja” sasin ewjjtʼistaspa ukhajja, ¿kamsnasa? ¿Colerassnati, jan ukajj humilde chuymampich uka ewjjtʼa katoqassna? (2 Reyes 22:18, 19).

17. Kunjamsa mä cristianon ewjjtʼapajj yanaptʼistaspa uk mä uñachtʼäwimp qhanañchtʼma.

¹⁷ Mä kullakarojj trabajopan mä waynas parljjaykaspa ukham amuytʼañäni. Uka waynajj munasiñampiw parljjayi, paseytʼir sarañatakiw invittʼaraki. Janis Diosar sirvkchejja munasir suma waynawa. Yaqha kullakajja, uk uñjasajj amuyasiñapatakiw kullakar ewjjtʼi. Ewjjtʼatajj ¿kamsanisa? ¿Janiw kuna jan walïkisa saniti, jan ukajj istʼanicha? Jupatï Jehová Diosar munaschejja, kunatï walïki ukwa lurani. Ukampis jupatï uka waynamp sarnaqaskakispa ukhajja, ¿qʼañu juchat jitheqtaskiw sissnati, jan ukasti chuymaparuw confiyasi sissnacha? (Proverbios 22:3; 28:26; Mateo 6:13; 26:41).

18, 19. ¿Kunsa Joseajj qʼañu juchat jitheqtañatakejj luräna?

¹⁸ José waynajj Egiptonwa esclavot servïna. Patronapan warmipajj sapüruw jupamp ikintasiñatak parljjayirïna. Ukampis Joseajja uk lurañajj jan walïtap yatïnwa. Jehová Diosarojj wal munasïna, kunatï walïki uk lurañwa munarakïna. Ukatwa uka warmir jan iyawskänti. Niyakejjay esclavöchïnjja, janiw yaqha trabajor sarkaspänti. Mä urojja uka warmejj jupamp ikintasiñapatakiw obligañ munäna, ukampis Joseajj escapjjänwa (Génesis 39:7-12 liytʼañataki).

¹⁹ Joseatï qʼañu amuyunïspäna jan ukajj uka warmit wal piensaspäna ukhajja juchachasispänwa. Ukampis Diosamp sum apasiñaw jupatakejj wali wakiskirïna. Joseajj uka warmir akham sänwa: ‘Uywirijajj janiw kunsa “janiw” siskituti, jan ukasti juma sapakwa jan churkituti, warmipätam layku. ¿Kunjamarak nayasti uywirijar uka jan wali luririststi, ukhamarak Dios contrasa juch lurarakiriststi?’ sasa (Génesis 39:8, 9).

20. ¿Kunatsa Joseajj Jehová Diosaruw kusisiyäna sasajj sissna?

²⁰ Joseajj utapat wali jayankchïnsa, Jehová Diosat janipuniw jitheqtkänti, ukatwa Diosajj bendisïna, taqe chuyma jupar servitapatsa wal kusisirakïna (Génesis 41:39-49; Proverbios 27:11). Qʼañu juchat jitheqtañajj chʼamakïspawa. Ukampis aka arunak amtañasawa: “Tatitojj ñanqhar uñisir jaqenakarojj munasiwa, aski arkirinakapan jakañaparojj imiwa, ñanqha lurir jaqenakan amparapat qhespiyaraki” (Salmo 97:10).

21. ¿Kunjamsa mä waynitojj Joseat yateqasïna?

²¹ Diosan servirinakapajj sapüruw jan ajjsartʼasisa kunatï ‘jan walïki ukanak uñisipjje’, kunatï ‘sumäki uksa munasipjjaraki’ (Amós 5:15). Jumajj qhawqha  maranïskamsa, Diosar taqe chuyma servitam uñachtʼayarakismawa. Mä waynitojj mä yantʼanwa colegiopan uñjasïna. Juparojj mä tawaqow akham säna: “Jumatï matemática examenan yanaptʼitätajja, jumampiw ikëjja” sasa. ¿Kunsa uka jilatajj luräna? Joseatwa yateqasïna. Jupajj siwa: “Uka tawaqorojj jankʼakiw janiw sista. Diosan yatichäwinakapar istʼasajja, janiw honraj aljaskti” sasa. Qʼañu jucha luras mä jukʼa kusisiñajja, llakinaka, mayni pachpa juchañchasiñanaka utjayi (Hebreos 11:25). Jehová Diosar istʼañasti wiñayatak kusisiñwa utjayaraki (Proverbios 10:22).

22, 23. ¿Kunjamsa Diosajj juchar purtʼasktan ukhajj yanaptʼistu?

²² Supayajj qʼañu juchar puriyañ munistu. Ukanakat jitheqtañajj awisajj chʼamakïspawa. Taqeninwa awisajj jan wali amuyunakajj utjistaspa (Romanos 7:21-25). Jehová Diosajj uk yatiwa, ‘laqʼätassa’ yatirakiwa (Salmo 103:14). Ukhamajj mä cristianotï qʼañu jucha lurañar purtʼasispa ukhajja, ¿kunsa luraspa? Uka juchapat ¿janit perdonatäkaspa? Jupatï taqe chuyma arrepentisinejja, Jehová Diosajj yanaptʼaniwa, jupajj ‘perdonañatak listokïskiwa’ (Salmo 86:5; Santiago 5:16; Proverbios 28:13 liytʼañataki).

²³ Jilïr irpirinakajj Jehová Diosan regalopawa. Jupanakajj munasiñampiw uñjapjjestu (Efesios 4:8, 12; Santiago 5:14, 15). Jupanakaw Diosamp sumankthapiñatakejj yanaptʼapjjestaspa (Proverbios 15:32).

24, 25. “Amuytʼasiri” jaqëñajja, ¿kunjamsa qʼañu juchar jan purtʼasiñatak yanaptʼistaspa?

²⁴ Suma amtanakar puriñatakejja, Jehová Diosan  leyinakapajj qhawqsa yanaptʼistu ukwa amtañasa. Janiw Proverbios 7:6-23 texton parlki uka waynjamäñ munktanti. Jupajj jan amuytʼasirïtap laykuw qʼañu juchar purtʼasïna. Amuytʼasirïñatakejj janiw chʼikhïñakejj wakiskiti. Jan ukasti kunjamsa Diosajj amuyi uk yatiñatak chʼamachasiñasawa, ukatsti ukarjamaw sarnaqañasaraki. Aka arunak amtañäni: ‘Khititejj yatiñ jikjjatki ukajja, jupa pachpawa munasi; khititejj chʼikhïña jikjjatki ukajja, kusisiñwa jikjjati’ (Proverbios 19:8).

²⁵ Diosan leyinakapajj wal yanaptʼistu, jiwasatï ukar istʼañänejja kusisitaw jakasiñäni, ¿jumajj ukhamarakit amuyta? Jan ukajj ¿Diosan leyinakapat pächastacha? (Salmo 19:7-10; Isaías 48:17, 18). Pächasstajja, kunanaktï Jehová Diosajj juma layku lurawayki ukanak amtasim. Biblian akham siwa: ‘Yantʼapjjam, uñjapjjarakim, Diosajj munasiriwa’ sasa (Salmo 34:8). Kunanaktï Jehová Diosajj juma layku lurawayki ukanakat jukʼamp lupʼïta ukhajja, jukʼampiw jupar munasïta. Kunanaktï Diosajj munaski ukanak munasiñamawa, uñiski ukanaksti uñisiñamarakiwa. Pʼeqemarojj suma amuyunakampiw phoqantañama, kunatï cheqapäki, qʼomäki, munkañäki, sumäki ukanakampiw phoqantañama (Filipenses 4:8, 9). Jiwasajj José waynjamarakïsnawa, juparojj Diosan wiñay yatichäwinakapaw wal yanaptʼäna (Isaías 64:8).

26. ¿Kuna toqetsa jutïr yatichäwinakan yatjjataskañäni?

²⁶ Solteröskañänisa casadöskañänisa, Jehová Diosajj kusisit sum jakasiñaswa muni. Akjjar jutkani uka pä yatichäwinakanjja, chacha warmi sum jakasiñatakejj kunas yanaptʼistaspa ukwa yatjjataskañäni.