Jehová Diosan Reinopat yatiyirinaka:

Olivos qollun saytʼatäpkäna uka apostolonakat maynïrïkasmas ukham amuytʼañäni. Jesusajj jiwasar uñstasajja, janïr alajjpachar makatkasajj akham sistuwa: “Espíritu santojj jumanakjjar jutkani ukhaw chʼam katoqapjjäta, Jerusalén markanwa nayat qhanañchapjjarakïta, taqe Judeana, Samariana ukhamarak taqe aka oraqpachana” sasa (Hech. 1:8). ¿Uka arunak istʼasajj kunsa lursna?

Walja lurañ utjatapat inas sustjassna, inas akham jisktʼasiraksna: “Jukʼanikïtanwa, ¿kunjamarak suma yatiyäwinak taqe cheqan predicañ puediñänisti?” sasa. Kuntï Jesusajj janïr jiwkasajj arskäna uka arunakwa amtassna, jupajj akham sänwa: “Mä esclavojj janiw uywiripat sipans jilankkiti, jupanakatï nayar arknaqapjjchitojja, jumanakarojj arknaqapjjarakïtamwa, jupanakatï nayan arunakaj phoqapjjchejja, jumanakan arunakam phoqapjjarakiniwa. Taqe ukanaksti, sutij kawsaw jumanak contrajj lurapjjani, nayar khitankitu ukar jan uñtʼapjjatap layku” sasa (Juan 15:20, 21). Uka arunakat lupʼisajj inas akham jisktʼasiraksna: “¿Arknaqat uñjasisajj kunjamarak predicañänisti?” sasa.

Jichha tiempot jichhajj parltʼañäni. Jehová Diosan Testigonakapjamajja, “taqe aka oraqpachana” ukhamarak “taqe markanakankir” jaqenakaruw yatiyañasaraki (Mat. 28:19, 20). Ukampis ¿kunjamsa arknaqat uñjaskasas uka luräwimp phoqsna?

Hechos librojja, kunjamsa apostolonakasa mayni cristianonakas Jehová Diosan yanaptʼapampejj predicapjjäna uka toqetwa parli. Aka librojja, uka toqet jukʼamp sum yatjjatañataki ukat kunanakas uka tiempon pasäna uk sum amuyañatakiw yanaptʼistani. Nayrïr patak maranakan jakir cristianonakampi jichha tiempon jakir cristianonakampejj kunansa niya pachpakïtan uk yatiñatakis yanaptʼarakistaniwa. Maysa toqetjja, aka librojj janiw predicación mayatak parlkiti, jan ukasti Diosan arunakap sum yatiyañatakejj kunjam organiztʼatätansa uka toqetwa parlaraki. Taqe ukanakajj Diosar jukʼamp confiyañatakiw yanaptʼätam, cheqansa jichha tiempon Jehová Diosaw markapar irpaskaki.

Jumanakatakejj wal orarapipjjsma, ukhamat Hechos librot yatjjatasajj Jehová Diosar jukʼamp confiyapjjañamataki. Cheqansa jupaw chʼamañchtʼasipkätam, espíritu santopampis yanaptʼasipkarakïtam. Aka librot yatjjatañajj “Diosan Reinopat phoqatpach” jukʼamp yatiyañ munañatakiw chʼamañchtʼapjjätam, salvasiñ thakir mantanipjjañapatak jaqenakar invitañatakis chʼamañchtʼapjjarakïtamwa (Hech. 28:23; 1 Tim. 4:16).