3 YATICHÄWI
Rahab warmejj Jehová Diosaruw confiyasïna
Jericó markansa jaksna ukham amuyasiñäni. Ukajj Canaán oraqenkänwa. Uka markankirinakajj janiw Jehová Diosar uñtʼapkänti. Ukanjja Rahab sutini mä warmiw jakasïna.
Kunjamsa Diosajj enemigonakapar atipjañataki israelitanakar yanaptʼäna, ukat kunjamsa Moisesajj israelitanakaru Egipto markat qhespiyäna ukat Wila qota payar jaljtayäna, taqe ukanakwa Rahab warmejj jiskʼatpach istʼäna. Ukat qhepatjja, “israelitanakaw Jericó marka jakʼan suyasipki” sasin parlir istʼäna.
Jehová Diosar confiyasitap laykuw Rahab warmejj uñaqer israelitanakar yanaptʼäna
Mä arumajja, pä uñaqer israelitanakaw Jericó markar purisajj Rahab warmin utapar sarapjjäna, ukat jupasti utapanwa jupanakar katoqäna. Uk yatisaw uka markankir reyejj Rahab warmin utaparu uka pä israelitanakar katuntañatak jaqenak khitäna. Rahab warmisti, uta techoparuw uka pä israelitanakar imantäna, ukat jaqenakarojj akham sänwa: “Jupanakajj sarjjapjjewa, ukampis arktapjjasma ukhajja, inas jikjjatapjjchisma” sasa. ¿Kunatsa Rahab warmejj uka israelitanakar yanaptʼpachäna?... “Jehová Diosajj cheqpach Diosawa. Ukat Jupaw israelitanakarojj Canaán mark churani” sasaw jupajj taqe chuym confiyasïna.
Janïr sarjjasajj akham sasaw uka pä israelitanakajj Rahab warmir arsupjjäna: “Jericó markajj tukjatäkani ukhajja, jumasa familiamasa qhespipjjätawa” sasa. Ukampis ¿kunsa Rahab warmejj lurañapäna?... Uñaqerinakajj ak sapjjänwa: “Aka wila wiskhajj ventanaman warkkatatäñapawa, ukatsti utamaruw familiam jawsthapïta. Ukham lurasaw qhespipjjäta” sasa. Rahab warmejj ukarjamaw luräna. Ukjjarojj ¿kunas paspachäna uk yattati?...
Jehová Diosaw Rahab warmiru ukat familiapar qhespiyäna
Mä qawqha urunakatjja, amukiw israelitanakajj sojjta uru uka marka walja kut muytapjjäna. Ukat paqallqo urunjja, paqallq kut muytkasaw wali jachʼat artʼapjjäna. Ukhamaruw Diosajj uka markan jachʼa uyunakap allthaptayäna. Ukampis wila wiskhani utajj sayaskakïnwa. ¿Dibujon uk uñjtati?... Rahab warmisa familiapasa ukanwa qhespipjjäna.
¿Kunsa Rahab warmit yateqsna?... Kuntï Jehová Diosajj lurkäna uk istʼasajja, taqe chuymaw Diosar confiyasïna, ukatwa qhespirakïna. Ukhamarakiw jumajj Diosan muspharkañ luratanakapat yateqasktajja. Ukhamajj ¿Diosar confiyasiraktati?... Jïsa, ukham lurañamawa.
