58 YATICHÄWI
Jehová Diosat janipun jitheqtamti
Cheqpach cristianonakarojja janiw kunasa, ni khitisa Jehová Diosar serviñat jitheqtaykistaspati. Jumajj ukhamarakiw Diosat jan jitheqtañ amtpachätajja. Ukham amtatamatjja jan jumajj payachasimti. Jehová Diosasti jupat jan jitheqtatam wali valoranitwa uñji (1 Crónicas 28:9 liytʼäta). Ukampis ¿kunanakas Jehová Diosat jitheqtayiristam? ¿Kunas ukanakar saykatañatakejj yanaptʼiristam?
1. ¿Kunjamsa yaqhanakajj Jehová Diosat jitheqtayañ munapjjestaspa?
Yaqhepanakajj Jehová Diosat jitheqtayañwa munapjjestaspa. ¿Khitinakas Jehová Diosat jitheqtayañ munapjjestaspa? Jehová Diosat jitheqtawayapki ukanakat yaqhepajja, kʼarinakwa Diosan markapat parlapjjaspa, ukhamat Jehová Diosar jan confiyjjañasataki. Jupanakajja apostatanaka sasin uñtʼatäpjjewa. Falso religionanak pʼeqtʼirinakat yaqhepasti, kʼarinakwa jiwasat parlapjjaspa, ukhamat jan amuyasirinakaru Jehová Diosat jitheqtayañataki. Jehová Dios contra saytʼirinakamp jiskhisiñasa, libronakap liyiñasa, Internetankir paginanakapar mantañasa, videonakap uñchʼukiñasa jan walinakaruw purtʼasiyistaspa. Jehová Diosar serviñat jitheqtayañ munapkistu ukanakatjja, Jesusajj akham sänwa: “Jan yäqapjjamti, jupanakajj juykhu irpirinakäpjjewa. Mä juykhutejj yaqha juykhur irpaspajja, panpachaniw pʼiyar jalantapjjani” sasa (Mateo 15:14).
2. ¿Kunjamsa amtanakasajj Jehová Diosat jan jitheqtañ munatas uñachtʼayaspa?
Niyakejjay Jehová Diosar wal munasstanjja, janiw falso religionanakan luräwinakapar mitisiñasäkiti. Janirakiw trabajosasa, kawkïr organizacionanktantï ukasa, ni kunanaktï lurktan ukanakas falso religionanakar apoyañapäkiti. Jehová Diosajj Jachʼa Babiloniat “mistjjapjjam” sasaw markapar ewjjtʼi (Apocalipsis 18:2, 4).
JUKʼAMP YATJJATAÑÄNI
Janipun khitis Jehová Diosat jumar jitheqtayañapatakejj kunsa lurasma, Jachʼa Babiloniamp jan chikachasjjasajj kunjamsa Diosat jan jitheqtatam uñachtʼayasma uka toqenakatwa jichhajj yatjjatañäni.
3. Kʼari yatichirinakat wal amuyasiñasawa
Jehová Diosan markapat jan walinak parlir istʼsna ukhajja, ¿kunsa lursna? Proverbios 14:15 liytʼasajja aka toqetwa parltʼapjjäta:
-
¿Kunatsa taqe kunanaktï istʼktan ukanak jan creyiñasäki?
2 Juan 9-11 liytʼasajja aka toqetwa parltʼapjjäta:
-
¿Kunjamsa apostatanakar uñjañasa?
-
Inas apóstata jaqenakampejj jan parlkstanti, ukampis ¿kunjamsa amuyunakapajj jan waltʼayistaspa?
-
Jehová Diosata ukhamarak markapata jan wali parlirinakar istʼsna ukhajja, ¿kunjamsa Jehová Diosajj jikjjatasispa?
4. Mä cristianojj juchar purtʼasini ukhajj Dios toqet saytʼasiñasawa
Congregacionankir mä cristianon jachʼa juchar purtʼasitap yatiñäni ukhajja, ¿kunsa lurañasa? Nayra Israel markar Diosajj churkäna uka Leyit jichhajj yatjjatañäni. Levítico 5:1 liytʼapjjäta.
Kunjamtï uka versiculon siskejja, maynin jachʼa juchar purtʼasitap yatisajj ancianonakaruw yatiyañasa. Ukampis janïr ancianonakar yatiykasajja, jupa pachpa ancianonakamp parlañapataki, juchanakap yatiyañapatakiw chʼamañchtʼañasa, ukhamatwa jupar munasitas uñachtʼaysna. Janitï ancianonakar yatiykani ukhajja, jiwasaw ancianonakar yatiyañasa, ukhamatwa Jehová Dios toqet saytʼasitas uñachtʼayañäni.
-
¿Kunjamsa ukham lurasajj Jehová Diosar munasitassa jupat jan jitheqtatassa uñachtʼaytanjja?
-
¿Kunjamsa ukham lurasajj juchachasirir munasitassa jupar jan jaytjatassa uñachtʼaytanjja?
-
¿Kunjamsa ukham lurasajj congregacionankirinakar munasitassa jan jaytjatassa uñachtʼaytanjja?
Mä jilatatï jan walir purtʼaschi ukhajj yanaptʼam.
5. Jachʼa Babiloniat jitheqtapjjañäni
Lucas 4:8; Apocalipsis 18:4, 5 liytʼasajja aka toqetwa parltʼapjjäta:
-
¿Falso religionanakan listanakapan sutijajj uñstaskakpachati?
-
¿Falso religionar apoyiri mä organizacionankpachätti?
-
¿Trabajojajj falso religionarut apoypacha?
-
¿Falso religionanakat jitheqtañajäspati?
-
Uka jisktʼanakarutï “jïsa” sasin jumajj sista ukhajja, ¿kuna cambionak lurañamas wakisispa?
Kuna amtarutï purkäta ukajja, suma conciencianïñataki Jehová Diosat jan jitheqtatam uñachtʼayañatakiw yanaptʼañapa.
Maynitï falso religionar apoyiri mä organizacionar yanaptʼañatak mayiristam ukhajja, ¿kunsa jumajj lurasma?
YAQHEPANAKAJJ AKHAM SAPJJEWA: “Kunanaktï apostatanakajj Jehová Diosan Testigonakapat parlapki ukanak jan yatkä ukhajja, kunjamarak cheqa yatichäwinak arjjatästi” sasa.
-
¿Ukham amuyañajj walikïskpachati? ¿Kunatsa ukham amuyta?
¿KUNSA YATEQAWAYTAN?
Jehová Diosat jan jitheqtañ munkstan ukhajja, khitinakatï engañjañ munapkistu ukanakampejj janiw chikachasiñasäkiti.
Amtañataki
-
Kunanaktï apostatanakajj sapki ukanakjja, ¿kunatsa janipun istʼañasäki?
-
Jiwasatï mä jilatan jachʼa juchar purtʼasitap yatstan ukhajja, ¿kunsa lurañasa?
-
Falso religionanakat jitheqtapjjam siski uka mandator istʼañatakejj ¿kunsa lurañasa?
JUKʼAMP YATJJATAÑAMATAKI
Jehová Diosan Testigonakapat kʼarinak parlapkani ukhajja, kunsa lurasma uka toqet yatjjatam.
“¿Sumti taqe kuns yatjjattanjja?” (Yatiyañataki agosto 2018)
Mä organizacionasa, kunanaktï jaqenakajj lurapki ukanakasa, ¿kunjamatsa Jachʼa Babiloniar yanaptʼatap yatisma?
Jehová Diosat jitheqtañasatakejja, ¿kunanaksa cheqa yatichäwinakar uñisirinakat yaqhepajj lurawayapjje?
Kunjamsa sintoísmo religionankir mä sacerdotejj falso religión jaytäna uk yatiñatakejja, “Había buscado a Dios desde niño” sat cheqanwa liytʼasma.
“La Biblia les cambió la vida” (La Atalaya, 1 de julio de 2011)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
