“WAWÄKAYÄTA UKHAJJA, FAMILIAJAN WAL TOQESIPJJERÏNA” sasaw Patricia warmejj säna. Jupajj akham saskakiwa: “Janiw perdonañ yatkayätti. Jilirëjjasasa, chuym ustʼayapjjetäna ukhajj walja urunakaw ukjjat lupʼiskakirïta, janiw ikirïktsa” sasa. Colerasiñasa chuym ustʼayasiñasa janiw kusisit jakaykistaspati, usuntaraksnawa. Yatjjattʼat jaqenakarjamajja, mayninakar jan perdonañ yatipki ukanakajj ¿kunjamäpjjesa?

• Colerata, chuym ustʼataw sarnaqapjje, mayninakampis janiw sum apasipkiti. Ukatwa saparstʼata, yaqhachata amuyasipjje.

• Jankʼakiw kunatsa chuym ustʼayasipjje, llakimpis wal aynachtʼapjje.

• Mayninakajj kunjamsa chuym ustʼayapjje ukjjat wal lupʼipjje, ukatwa jan kusisit jakasipkiti.

• Jan wal lurapjjatap amuyasisajj llakitakiw sarnaqapjje.

• Llakimpiw aynachtʼapjje, presión alta, artritis, migraña asunakampiw usuntapjjarakispa, jan ukajj chuymatwa usuntapjjaspa. *

¿PERDONAÑAJJ KAMSAÑSA MUNI? Jan colerasiña, jan chuyma ustʼayasiña, jan pachpat pachpa kuttʼayaña sañwa muni. Ukampis ukajja, janiw kuna jan waltï maynejj lurki ukajj walikïkaspasa, janis kunas paskaspa ukham uñjaña sañ munkiti. Perdonir jaqejja, mayninakamp sum apasiñatakiw chʼamachasi, ukatwa perdonañ amti.

Perdonir jaqejja, janiw mayninakan jan pantjasipjjañap suykiti, taqeniw luratanakasansa arsutanakasansa pantjastanjja (Romanos 3:23). Bibliajj akham siwa: “Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim” sasa (Colosenses 3:13).

Ukhamajj mayninakar perdontan ukhajja, jupanakar munasitaswa uñachtʼaytanjja. “Munasiñajj wali sum mayachthapi” (Colosenses 3:14). Clínica Mayo ukarjamajja, ¿perdonir jaqenakajj kunjamäpjjesa?

•   Niyakejjay mayninakat sinttʼasiri khuyaptʼayasiri ukhamäpjjchejja, taqenimpiw sum apasipjje.

• Janiw jan wali amuyunakamp apayasipkiti, Diosampis sum apasipjje.

• Janiw llakimp aynachtʼapkiti, ni ratukis colerasipkiti.

• Janiw aynachtʼayir amuyunakampi apayasipkiti.

JIWASPACHPA PERDONASIÑA. Mä revistajj akham siwa: “Jiwaspachpa perdonasiñajja, jan usuntañataki ukat suma amuyunakanïñatakiw yanaptʼistu. Ukampis ukham lurañajj wali chʼamawa” (Disability & Rehabilitation). Jiwaspachpa perdonasiñatakejja, ¿kunjam chuymanïñas yanaptʼistaspa?

• Janiw perfectöñ suyañasäkiti. Pantjasiñajj utjakipuniniwa (Eclesiastés 7:20).

• Pantjasitanakasatwa yateqañasa, ukhamat jan mayamp pantjasiñataki.

• Paciencianïñasawa. Kunjam jaqëtansa uk janiw jankʼak apanuksnati (Efesios 4:23, 24).

• Suma amigonakwa thaqañasa, jupanakaw chʼamañchtʼistani, yanaptʼistani, ukhamarak qhana arunakamp ewjjtʼapjjestani (Proverbios 13:20).

• Yaqhanakar chuyma ustʼaykañäni ukhajja, jankʼakiw humilde chuymamp perdón mayisiñasa. Mayninakampi sum apasiñajja, chuymasan sum jikjjatasiñatakiw yanaptʼistani (Mateo 5:23, 24).

Patricia warmirojja, Biblian yatichäwinakapaw perdonirïñatak yanaptʼäna. Jupajj akham siwa: “Colerasiñajj janiw sum jakaykitänti. Uk apanukjjasajj sumakiw jakasjjayäta. Janiw tʼaqesjjayätti ni yaqhanakarus tʼaqesiyjjayätti. Diosajj wal munasistu, sum jakasiñaswa munaraki, ukwa Bibliajj yatichistu” sasa.

Ron sutini mä chacharojja, Biblian yatichäwinakapaw sum jakasiñatak yanaptʼarakïna. Jupajj akham siwa: “Kuntï mayninakajj amuyapki lurapkaraki uk janiw nayajj mayjtʼaykiristti, ukampis kunanaksa lurä lupʼirakï ukajj nayatäjjewa. Suman jakasiñatakejja, janiw chuyma ustʼayasiñajäkänti ni colerasiñajäkänsa” sasa.