¿JUMAJJ KUSISITAT JAKASTA? Ukhamächi ukhajja, ¿kunas kusisiytam? ¿Familiama, trabajoma, jan ukajj religionamacha? Inas akham amuysta: “Estudiañ tukuyasa, mä suma trabajo jikjjatasa, jan ukajj mä machaq auto alasisaw kusisit jakasï” sasa.

Walja jaqenakajja, kuntï munapki ukanak jikjjatasakiw wal kusisipjje. Ukampis janiw wiñayatak kusisitäpkiti.

Kusisiñajja, sum jikjjatasiña, mayni pachpat kusisitäña, chuymatpach kusisit jakasiña sañwa muni. Cheqas taqeniw ukham jakasiñ muntanjja.

Janiw qollqesa cosasanakasa cheqpach kusisiñ churkistaspati, jan ukasti jakkasajj kunanaksa lurasktan ukaw cheqpach kusisiñ churistaspa. Ukhamajj “akanak jikjjatkä ukhaw kusisit jakasï...” sasin sissna ukhajja, janiw kusisit jakasksnati.

Aka toqet amuytʼañäni. Jan usuntañatakejja, mä jaqejj chʼamañchtʼkir manqʼanakwa manqʼañapa, ejercicionaksa lurañaparakiwa. Kusisit jakasiñatakejja, ukhamarakiw jiwasajj kunanakatï jakäwisan yanaptʼkistaspa ukanak lurañasa.

¿Kunjam chuymanïñas kusisit jakasiñatak yanaptʼistaspa? Ukwa jichhajj mä qhawqhanak uñjañäni.

• WAJJTʼASIRÏÑASAWA, UTJKISTU UKAMPIS KUSISITÄÑASAWA

• JANIW LLAKIMP AYNACHTʼAÑASÄKITI, CUERPOSAS QʼOMÄÑAPAWA

• MUNASIRÏÑASAWA

• PERDONIR JAQËÑASAWA

• MÄ AMTAMP JAKASIÑASAWA

• JUTÏR URUNAK SUYTʼAÑASAWA

Wali suma ewjjtʼanakani mä librojj akham siwa: “Jan juchañchkay [jan ukajj sum] sarnaqer jaqejj kusisiñaniwa” sasa (Salmo 119:1). Kunanakas kusisit jakasiñatak yanaptʼistaspa uk jichhajj yatjjatañäni.