Confiykañ jaqejja, mayitanak phoqeri, arsutanakap phoqeri, jan kʼarisiri ukhamawa. Ukatwa awk taykapasa, amigonakapasa, jefepasa jupar confiyapjje.

Jumatï lurañanakamamp phoqeri, istʼasiri ukham jaqëyätajja, awk taykamajj janiw taqe kunat jarkʼapkätamti.

“Awk taykamajj jumar confiyapjjañapatakejja, amuytʼasir jaqëñataki, lurañanakam sum phoqañatak chʼamachasiñamapuniwa, janiw jupanakan uñjkatakejj ukham lurañamäkiti” (Sarahi).

BIBLIAJJ KAMSISA: “Kunjam jaqëpjjtasa uksa uñakiptʼasisipkakim” (2 Corintios 13:5).

Awk taykamajj jumar mayamp confiyapjjañapatakisa jan ukajj jukʼamp confiyapjjañapatakisa, aka ewjjtʼanakaw yanaptʼätam:

Cheq parlañamawa. Jumatï kʼarisïtajja, jaqenakajj janiw confiyjjapjjätamti. Maysa toqetjja, pantjaskasas cheqpun parläta, honradorakïyäta ukhajja, jukʼampiw jumar confiyapjjätam.

“Taqe kunas walikïski ukhajja, cheq parlañajj facilakiwa. Ukampis jiwasatak jan walïkipansa cheqpun parltan ukhaw mayninakajj jiwasar jukʼamp confiyapjjestu” (Caiman).

BIBLIAJJ KAMSISA: “Taqe kunansa honrado chuymampiw sarnaqañ munapjjarakta” (Hebreos 13:18).

Lurañanakam phoqañamawa. Estados Unidos markanjja, recursos humanos ukan trabajiri jaqenakaruw jisktʼasïna, jupanakat jilapartew (78%) akham sapjje: “Mä trabajo churañatakejj lurañanakap sum phoqerïñapajj wali wakiskiriwa” sasa. Jichhatpach lurañanakam phoqerïñ yateqäta ukhajja, jilïr jaqëjjäta ukhajj wal yanaptʼätam.

“May satak kuns lurta ukhajja, awk taykajajj amuyapjjewa. Ukham sapa kuti lurataj uñjasajj jukʼampiw confiyapjjetu” (Sarah).

BIBLIAJJ KAMSISA: “Nayajj wal jumar confiysma [...]. Nayajj yattwa, kunanaktï sisksma ukanakat sipansa jukʼampwa jumajj luräta” (Filemón 21).

Paciencianïñamawa. Maynejj jiltaskiti janicha uk facilakwa amuysna, ukampis amuytʼasir jaqëjjeti janicha uk amuyañatakejj tiempow munasi.

“Awk taykamasa yaqhanakasa, janiw mä suma luratam uñjasakejj jumar confiyapkätamti, jan ukasti lurañanakam sum phoqañatak chʼamachasipunïta ukhaw jukʼamp confiyapjjätam” (Brandon).

BIBLIAJJ KAMSISA: “Paciencia chuymanïñampi isthapisipjjam” (Colosenses 3:12).