Luratanakasamp yatichañajja, yatichktan ukarjam sarnaqaña sañwa muni. Akham amuytʼañäni, punk leqtʼanipan awkejj “janiw akankkiti” sañapatak wawapar mayispa ukhajja, janiw wawapan cheq parlañap maykaspati.

“Awk taykanakatï sisktan ukarjam jan phoqkañäni ukhajja, janiw wawanakasarojj ukham lurapjjañap mayksnati. Wawanakajj mä esponjar uñtatäpjjewa, jupanakajj ratukiw kuntï sisktan lurktan ukanak yateqapjje. Jiwasatï yatichatasarjam jan lurkañäni ukhajja, wawanakajj uk amuyasin ratukiw sapjjestani” (David).

BIBLIAJJ KAMSISA: “‘Janiw lunthatasïtati’ sasaw yatiytajja, ukhamajj ¿kunataraki lunthatasisktasti?” (Romanos 2:21).

Colegionkir masinakapat sipansa, awk taykanakaw wawanakar yanaptʼapjjaspa, qʼajjo wayn tawaqöjjapjje ukhas yanaptʼasipkakispawa. Ukhamajj awk taykanaka, jumanakaw sum sarnaqapjjañapatak wawanakamar yanaptʼapjjasma, ukatakejj yatichapkta ukarjam sarnaqañatakiw chʼamachasipjjañama.

“Walja kutiw wawanakasar kuns sasksna, jupanakajj janis istʼapkistaspa ukhamäkchisa, kuntï sisktan ukarjam jan lurkañäni ukhajj ratukiw sapjjestani. Janis ukhamaw sañjamäkchejja, jupanakajj kuntï lurktan uk sum uñjasipki” (Nicole).

BIBLIAJJ KAMSISA: ‘Alajjpachat jutki uka yatiña katoqer jaqejja, janiw kʼari chuymani jaqëkiti’ (Santiago 3:17).

Akham jisktʼasim: “¿Kunjamsa esposajarusa wawanakajarus uñjtjja? ¿Kunanaksa televisionan uñchʼuktjja? ¿Amigonakajajj kunjam jaqenakäpjjesa? ¿Mayninakat llakistti?” sasa. Mä arunjja, ¿wawanakamajj jumjam jaqer tukupjjañap munasmati?

“Janiw esposojasa nayas kuntï nanakajj jan lurapkta uk lurapjjañap wawanakajar mayipkti” (Christine).

Perdón mayisiñamawa. Wawanakajj awk taykapan pantjasirïpjjatap yatipjjewa. Ukhamajj jumatï pantjasisajj esposamatsa wawanakamatsa perdón mayisïta ukhajja, cheq parlaña humilde chuymanïñwa wawanakamar yatichäta.

“Pantjasisajj qhan arsusiñasawa, perdón mayisiñasarakiwa. Janitï ukham lurkañänejja, wawanakasajj janiw perdón mayisiñ yateqapkaniti” (Robin).