Perdonañajj chuym ustʼayapkistu uk armaña sañwa muni. Ukampis janiw jan wal lurapkistu ukajj janis kunäkaspa ukham uñjaña sañ munkiti.

BIBLIAJJ KAMSISA: “Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim” (Colosenses 3:13).

“Maynir munasktan ukhajja, janiw jan wali luratanakapak uñchʼuktanti, antisas kunjamsa suma jaqëñatak chʼamachasiski ukwa uñjtanjja” (Aaron).

Chuyma ustʼat sarnaqañajj usuntañaru, jan ukajj llakimp aynachtʼañaruw apistaspa. Janirakiw chacha warmjamas sum jakasjjsnati.

“Mä kutejja, esposojajj wal chuym ustʼayitäna, ukatwa ‘perdontʼita’ sasin sitäna. Jupar perdonañajj chʼamakïchïnsa, perdonayätwa. ¡Qalltatpach perdoniriskayäta! Janiw chacha warmjam jan waltʼayasiñajj utjkaspänti” (Julia).

AKHAM JISKTʼASIM

Chuym ustʼayätam ukhajja, akham jisktʼasiñamawa:

• “¿Jankʼakit chuym ustʼayastjja?”.

• “¿Perdón mayisiñap suyapuntti, jan ukajj pantjasitap armañatakich chʼamachastjja?”.

CHACHA WARMI PARLTʼASIÑATAKI

• ¿Jankʼakit perdonastanjja?

• ¿Jankʼak perdonasiñatakejj kunanaksa lursna?

AKANAKWA LURASMA

• Chachamana jan ukajj warmiman chuym ustʼayatajj jan akham amuyamti: “Yatkasaw ukham luritu” sasa.

• “Taqeniw walja kuti pantjastanjja” (Santiago 3:2). Ukhamajj chachamaru jan ukajj warmimar perdonañatak chʼamachasipunim.

“Panpachan pantjastan ukhajja, perdonañajj janiw chʼamäkiti. Ukampis ‘jupaw juchanejja’ sasin amuyasktan ukhajja, perdonañajj chʼamakiwa. Cheqas maynir perdonañatakejj wali humilde chuymanïñaw wakisi” (Kimberly).

BIBLIAJJ KAMSISA: “Juma contra quejaski ukampejj jankʼaki askicham” (Mateo 5:25).