Biblian yatichäwinakapajj wali chʼamaniwa, jaqenakarojj sum jakasipjjañapatakiw yanaptʼi. Kunjamsa Ricardo ukat Andrés chachanakarojj yanaptʼäna uk uñjañäni.

RICARDO. 15 maranïkasajja, jan walinak luririnakampiw chikachasiyäta. Niyakejjay waynituskchiyätjja, amigonakajajj kuntï lurapjjerïkäna ukanakwa lurjjarakiyäta. Ukatjja, 10 maranak carcelankañwa munayäta. Jakaskayäta ukanjja carcelankirinakajj wali respetata, ajjsarata ukhamäpjjänwa. Jupanakjamäñwa munarakiyäta.

Ukatjja qʼañunak luriri, drogasiri, jaqemp nuwasiri ukhamäjjayätwa. Mä arumajja, pandillanakaw pistolamp baleasipjjäna nayas jupanakampirakïyätwa. Jiwayapjjetaniwa sasaw amuyayäta ukampis escaptwa. Qhepatjja, kunsa jakäwijampi luraskayäta, kunas amtajajja, ukanak sum amuytʼasisajj cambiañwa amtta. Ukampis ¿kunjamsa uk luririskayäta? ¿Khitis yanaptʼitaspäna?

Jilaparte familiajajj janiw kusisita jakasipkänti, walja problemanïpjjänwa. Ukampis mä tiojan familiapajj janiw ukhamäkänti, jupanakajj Biblian yatichäwinakaparjamaw sarnaqapjjäna. Jupanakarakiw Diosan sutipajj Jehová satawa sasin nayrajj yatichapjjetäna. Ukatwa pandillanakajj baleasipkäna uka pasatat sutip aytasis Jehová Diosar yanaptʼa mayista. Qhepürusti, Jehová Diosan mä Testigopaw punku leqtʼanïna, ukajj janiw creyiñjamäkänti. Jupaw Bibliat yatichitäna.

Uka qhepatjja, mä jan walinwa uñjasta. Nayra amigonakajaw jupanakamp chikäñatak telefonot jawsanipjjetäna. Ukar ‘janiw’ sañajj chʼamäkchïnsa, ‘janiw’ sayätwa. Bibliat yatjjataskakiñwa amtta, ukham luratajat janiw arrepentiskti. Jakäwijajj janiw nayrjamäjjeti, jichhaw cheqpach kusisitätjja.

Niyakejjay nayrajj mä pandillampi respetayasiñ laykojj 10 maranak carcelankañ munchiyätjja, Diosarojj akham mayisiyäta: ‘Kunjamtï nayarojj Bibliampi yanaptʼapkitänjja, ukhamarakiw jaqenakar yanaptʼañ munta, tunka marakisay precursorat serviñatak yanaptʼita’ sasa. Diosajj istʼituwa ukatwa 17 maranaka precursorat serviwayta. Janiw kunapachas carcelar mantkti.

Nayra amigonakajat waljaniw carcelankasipkaki, yaqhepasti jiwjjapjjarakiwa. Testigo familiaranakajajj Biblian yatichäwiparjam sarnaqapjjatapat wal yuspärta. Jupanakar wal respetarakta, janipuniw nayra amigonakajarojj ukham uñjirïkti. Diosarojj jukʼampiw yuspärta, Jupaw sum jakasiñ yatichawayitu.

 ANDRÉS. Kawkintï naskayäta jilskarakiyäta ukanjja, jaqenakajj pobrëpjjänwa. Drogasiñanakasa, jaqe jiwayañanakasa, kʼarimp apaqañanakasa, kunayman qʼañu lurañanakasa añchapunïnwa. Awkijajj alcohol umiri, cocainampi drogasiri ukhamänwa. Awkijampi taykajampejj sapakutiw nuwasipjjerïna, jan wali arunakampis toqesipjjerïna.

Waynitükasaw alcohol umaña, droganakamp qolljasiñ qalltta. Jilapartejj callenkakipuniyätwa, lunthatasisa, kuntï lunthataskäyät ukanak aljasaw sarnaqerïyäta. Mä qhawqha maratjja, awkijajj nayamp sum apasiñ munasajj droganaka, jamasat contrabandonak pasayaniña, ukanak aljañ yatichitäna. Jukʼa tiemponakwa walja qollqenëjjayäta. Mä urojja, policianakajj utajar jutasaw maynir jiwayañ munatajat carcelar apapjjetäna. Phesqa mara carcelankañatakiw juchañchapjjetäna.

Mä alwajja, Jehová Diosan Testigonakapan mä arstʼäwip istʼañatakiw taqe presonakar invitapjjetu, uka arstʼäwejj cárcel pachpankänwa, nayajj sarayätwa. Kuntï yatichapkäna ukajj cheqäskapunïnwa ukatwa Bibliat yatichayasiñatak iyawsta. Kuntï Bibliajj qʼoma sarnaqañ toqet yatichki uk qhanwa yatichapjjetäna, janiw mayjtʼayapkänti.

Nayajj kunjamäkayättï uk cambiañatakejj maynin yanaptʼapwa munayäta. Kunattejj yaqhep presonakarojja, Bibliat yatjjatañ qalltatajajj janiw gustkänti, ukatwa jan waltʼayañatak ajjsarayapjjetäna. Jehová Diosaruw uka jan walir saykatañatakejj yatiña ukat chʼama mayisiyäta. Diosan yanaptʼapampejja, kuntï Bibliat yateqaskayäta ukanak jan ajjsarasaw presonakar parlayäta.

Carcelat mistuñajajjäna ukhajja, wal ajjsarayasisajj mä jukʼa tiempomp qheparañwa munayäta. Mistuskayäta ukhajja, yaqhep presonakajj amparampiw ‘jikisiñkama’ sasin sapjjetäna. Yaqhepasti, ‘utar kutʼjjam pastorcito’ sasinwa munasiñamp sapjjetäna.

Diosan yanaptʼap jan thaqkiriskäyät ukhajj kunjamakis jakasiriskäyäta uka toqet janiw lupʼiñ munkti. Nayar munasitapata, nayat jan armasitapat walpun Diosar yuspärta. *