‘Kunapachatï jan wali jaqenakajj qoranakar uñtat jiltapki, taqe jan wali lurir jaqenakas panqarapkaraki ukhajja, wiñayatak tukjatäñatakiw jiltapjje panqarapjjaraki’ (SALMO 92:7).

Kunjamtï pasïr yatichäwin yatjjataniwayktanjja, akapachajj jukʼamp jan waliruw saraski. Ukampis jiwasajj janiw ukanak uñjasajj sustjasiñasäkiti. ¿Kunatsa? 2 Timoteo 3:1-5 textonakan qellqata profeciajja, ‘qhepa urunakan’ jan wali jaqenakajj waljapuniw utjani sasaw qhanañchi. ¿Kuna toqetsa ‘qhepa urunaka’ sasajj parlasktanjja? Akapachajj Diosar jan respetir jaqenakampi phoqantatawa. Niyaw Diosajj khitinakatï jan wali costumbrenakap jan jaytañ munapki uka jaqenakarojj jiwarayani. Khitinakatï Diosar taqe chuyma istʼapkani ukanakakiw aka oraqen jakjjapjjani. Salmo 37:29 qellqatajj akham siwa: ‘Cheqap sarnaqer jaqenakaw oraq katoqapjjani, wiñayatakiw ukan jakapjjarakini’ sasa.

“Niyaw sumankañ churir Diosajj [...] Supayar tʼunjani” (ROMANOS 16:20).

Kunapachatï Supayasa, demonionakasa, jan wali jaqenakas aka oraqet chhaqtayatäjjapjjani ukhajja,  oraqpachanwa sumankañajj utj-jjani. Diosajj akham sistuwa: ‘Janiw khitis ajjsarayjjapjjätamti’ (Miqueas 4:4).

“Diosan tabernaculopajj jaqenakampi chikäjjewa [...]. Taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” (APOCALIPSIS 21:3, 4).

Kuna jan walinaktï Supayasa, Adanampi Evampis utjayawayapki taqe ukanakwa Diosajj askichani. Pantjasirïtas laykojj kuna jan walinakantï uñjasktan ukanaksa askicharakiniwa. Ukatwa tʼaqesiñanakasa usunakas jan utjjaniti, janirakiw “jiwañajj jukʼamp utj-jjaniti”. Diosar munasiri istʼasiri jaqenakakiw wiñayatak jakjjapjjani. Ukampis ¿kawkinsa jakapjjani?

‘Wasarasa waña oraqesa kusisiñamp phoqtʼatäpjjaniwa, pampa wasarasa kusisiniwa, azafrán panqarjamaw panqararakini’ (ISAÍAS 35:1).

Diosajj jan walinak chhaqtayjjani ukhajja, aka oraqejj mä paraisöjjaniwa. Wali suma parquenaka, jardinanakaw taqe cheqan utjani, manqʼañanakas jilarkiriw achurakini (Salmo 72:16). Lamar qotanakasa, jawiranakasa, qotanakasa wali qʼomäjjaniwa, walja chawllanakaw utjarakini. Aka oraqejj janiw mayampi qʼañuchatäjjaniti. Janiw manqʼatjam jiwjjañäniti, janiw pobrenakasa, ni callenakan jakiri jaqenakas utj-jjaniti (Isaías 65:21, 22).

‘Jiwatanakajj jaktanipjjaniwa’ (HECHOS 24:15).

Kawkir familiaranakamatï jan ukajj amigonakamatï jiwapki ukanakarojj ¿wasitat uñjañ munasmati? Aka oraqejj mä paraisöjjani ukhaw Taqe Chʼamani Diosajj jiwatanakar jaktayani. ¡Jupanakamp mayamp jikiskañäni ukhajj wali kusisitapunïñäniwa! Kunjamsa wawanakasa jilïr jaqenakasa jaktapjjäna, ukat wasitat familianakapampi jikisjjapjjäna ukajj Biblianwa qhanañchasi. Jesusajj walja jaqenakan uñjkatarakiw mä qhawqhanir jaktayäna (Lucas 8:49-56; Juan 11:11-14, 38-44).