“Casarat chachanakajj ukhamarakiw warminakaparojj pachpa cuerpoparjam munasipjjañapa. Warmipar munasir chachajja, jupa pachpaw munasi. Janiw khitis pachpa cuerpoparojj kunäkipans uñiskiti, antisas manqʼayiwa, wali munasiñampiw uñjaraki” (EFESIOS 5:28, 29).

Esposow familia pʼeqtʼirejja (Efesios 5:23). Ukampis mä suma esposojja, janiw qhorükiti, jan ukasti esposaparojj wal munasi, kunanakatï wakiski ukanakatakis janiw qollq faltaykiti, chuymapan kunjamäskisa uka toqetsa llakisirakiwa. Ukhamarusa esposapan kusisitäñapatakejj wal chʼamachasi, janiw kuntï jupajj munki ukak lurkiti (Filipenses 2:4). Esposapampi parlki ukhajja, kunjamäskisa kunsa amuyi taqe ukanakwa jupar yatiyi, ukhamarusa esposaparojj sumwa istʼaraki. Janiw esposapatakejj coleraskiti, janirakiw nuwkisa ni arunakampis chuym ustʼaykiti (Colosenses 3:19).

“Casarat warmejj chachaparojj wali respetompiw uñjañaparaki” (EFESIOS 5:33).

Warmejj esposopar respetki, amtanakaparus yanaptʼkaraki ukhajja, familiapan sum jakasipjjañapatakiw yanaptʼi. Esposopajj pantjaski ukhajj janiw jiskʼachkiti, jan ukasti respetaskakiwa paciencianirakiwa (1 Pedro 3:4). Ukatjja kunapachatï mä jan waltʼäwit parlañ munki ukhajja, kunapachas parlani uk wali sumwa amuytʼasi, ukatjja respetompiw parlaraki (Eclesiastés 3:7).

‘Chachajj warmipampiw mayachasjjani, panipasti mä jañchikëjjapjjaniwa’ (GÉNESIS 2:24).

Mä chachampi mä warmimpejj casarasipki ukhajja, panipajj mayarukiw tukjjapjje. Ukatwa jan jaljtañatak wal chʼamachasipjjañapa. ¿Kunsa ukatakejj lurapjjaspa? Taqe chuymaw parltʼasipjjañapa, luratanakampiw munasipjjatap uñachtʼayasipjjañaparaki. Janipuniw espososa ni esposas yaqhamp sarnaqañapäkiti. Maynitï yaqhamp engañaspa ukhajja, maynir chuymap wal usuchjaspa. Janirakiw confianzas utj-jjaspati, familiarus jan waltʼayarakispawa (Hebreos 13:4).

‘Wawarojj kawkïr thaknamas sarañapa uk yaticham, jilïrëjjani ukhasa janiw uka thakit jitheqtkaniti’ (PROVERBIOS 22:6).

Awk taykanakaw wawanakarojj sum yatichapjjañapa, Diosaw uka luräw jupanakar churawayi. Suma chuymanïpjjañapatakiw wawanakar yatichapjjañapa, yateqaskaywa sarnaqapjjañaparaki (Deuteronomio 6:6, 7). Mä wawatï jan sum portaskaspa ukhajja, yatiñani awk taykajj janiw ratuk colerasiñapäkiti, jan ukasti “istʼañatakejj jankʼakïñapawa,  janiw jan amuytʼasisajj parlañapäkiti, janirakiw jankʼak colerasiñapäkisa” (Santiago 1:19). Wawapar castigapkani ukhajja, janiw colerampi atipayasis castigapjjañapäkiti jan ukasti munasiñatwa castigapjjañapa.

‘Wawanaka, awkimarus taykamarus istʼapjjam, respetapjjarakim’ (EFESIOS 6:1, 2).

Wawanakajja awk taykanakaparojj taqe chuymaw istʼapjjañapa respetapjjañaparaki. Istʼasirïpki ukhajja, familian suman jakasiñampi kusisit jakasiñampiw utji. Wawanakajj jilïrëjjapjje ukhajja, awk taykanakapar sum cuidasaw respetapjjatap uñachtʼayapjjaraki. Sañäni, awk taykan utapajj suma askichtʼatäñapawa, wakischi ukhajj qollqe toqetsa yanaptʼapjjañaparakiwa (1 Timoteo 5:3, 4).