Biblian yateqawayktan uka yatichäwinakamp yanaptʼayasisajja, walja millón jaqenakajj janiw yaqhachir jaqëjjapjjeti. Ukampis janiw chʼamasampikejj yaqhachañ chhaqtayañ puedksnati. Ukhamajj ¿kunas yaqhachasiñ chhaqtayañatak yanaptʼistaspa?

Nayratpachas gobiernonakajj mayninakar jan yaqhachasiñapatak wal chʼamachasiwayapkchejja, janipuniw chhaqtayañ puedipkiti. Ukhamajj ¿yaqhachasiñajj wiñayatakit utjpachäni?

Yaqhachañ chhaqtayañatakejja, mä gobiernojj akanak lurañapawa:

1. 1. Jaqenakan chuymapan yaqhachañajj utjki uk cambiapjjañapatakiw gobiernojj chʼamañchañapa.

2. 2. Mayninakajj yaqhachasinwa chuym ustʼayapjjestu, uka laykuw mayninakar jan walit uñjaraktanjja, taqe ukanakwa chhaqtayañapa.

3. 3. Jan khitirus yaqhachiri gobernantenakanïñapawa.

4. 4. Oraqpachankir taqe kasta jaqenakaruw mayachthapiñapa.

Mä gobiernow taqe ukanak lurani sasaw Bibliajj qhanañchi. Uka gobiernosti ‘Diosan Reinopawa’ (Lucas 4:43).

Kunanaksa uka gobiernojj lurani uk amuytʼañäni.

“Jaqenakajj yateqapjjaniwa kunatejj cheqapäki ukjja” (ISAÍAS 26:9).

“Cheqa uñjäwisti sumankañwa utjayani, samarañana sarnaqasiña, jan ajjsarasa, ukasti wiñayatakïniwa” (ISAÍAS 32:17).

¿Kamsañsa uka textonakajj muni? Kunanakatï sumäki ukwa Diosan Reinopajj jaqenakar yatichani. Kunatï walïki jan walïki, kunatï cheqapäki jan cheqapäki ukanak sum amuyjjtan ukhajj mayninakarojj sumwa uñj-jjtanjja. Diosan Reinopanjja, taqe kasta jaqenakar munasiñajj wali wakiskirïtapwa taqenis yatipjjani.

“Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa” (APOCALIPSIS 21:4).

¿Kamsañsa uka textojj muni? Jan walinakajj qhawqsa tʼaqesiyistu taqe ukanakwa Diosan Reinopajj chhaqtayani. Niyakejjay jan walinakajj jan utj-jjchinitejja, khitinakatï tʼaqesiyat uñjasipki ukanakajj janiw khitirus uñisjjapjjaniti.

“Jupajj janiw aleq uñkatasaki kunsa uñjkaniti, chʼajjwanaksa janirakiw aleqa parlanak istʼasaki tʼaqjkaniti. Aynachtʼatanakarusti cheqa luräwimpiw uñjani, markan utjiri pobrenakan arsusitanakapsti arjjatarakiniwa” (ISAÍAS 11:3, 4).

¿Kamsañsa uka textojj muni? Diosan Reinopan Jesucristo reyipajja, alajjpachatwa aka oraqerojj jaqenakar cheqapar uñjasa apnaqanini, janiw khitirus yaqhachkarakiniti. Jesusajj taqe markanakaruw mä igualak uñji, suma leyinakap oraqpachan phoqayañatakis chʼamanirakiwa.

Diosan Reinopajja, jaqenakan ‘mä amuyunikïpjjañapataki, mä pachpa munasiñanikïpjjañapataki, mayachtʼat sarnaqapjjañapataki, mä pachpa amtanikïpjjañapatakiw’ yanaptʼi (FILIPENSES 2:2).

¿Kamsañsa uka textojj muni? Diosan Reinopan jakasipkani uka jaqenakajja, janiw pata chuymakejj mayachtʼat jakasipkaniti. Cheqpachapun munasipjjatap laykuw ‘mayachtʼat sarnaqapjjani’.