¿ Jakañ vidar respetañajj utjaskiti?
JAKAÑ VIDAR RESPETAÑAJJ KUNATSA WALI IMPORTANTEJJA
Usuchjasiñjama ukat jan waltʼäwinakar puriñjama ukanak lurañajja, jakañ vidasarusa mayninakan jakañ vidaparus janis respetksna ukhamawa.
-
Cigarro fumañajj janiw cáncer usuk utjaykiti, jan ukasti, uka usut jarkʼaqasiñajj cuerpotakejj jukʼamp chʼamawa. Cáncer de pulmón usumpi jiwirinakatjja, 90% ukhaniw cigarro fumapjjäna, jan ukajj cigarron jewqʼep samapjjäna.
-
Sapa marajja armanakamp disparasin jan waltʼayasiñanak utjatap laykojja, walja jaqenakaw wali llakita jikjjatasipjje. Universidad de Stanford (Estados Unidos) ukajja, mä yatiyäwipan akham siwa: “Escuelanakan armanakamp jan waltʼayasipki ukanakat jan kamachtʼat escapapki ukanakajja, walja maranakaw wali llakita jikjjatasipjje sasaw yatjjatatanakajj sapjje”.
-
Mä auto apnaqeritï umatächi, jan ukajj drogamp qollasitächi ukhajja, mayni auto apnaqerinakatakisa, uka thaknan saririnakatakis mä peligrowa. Jakañ vidar jan respetapki ukanak causajj waljaniw usuchjata jan ukajj jiwata uñjasiwayapjje.
KUNSA JUMAJJ LURASMA
Jan usuntañatakejj cuidasiñamawa. Kunanakatï cuerposar jan waltʼaykaspa uk apanukuñatakejj jichhaw chʼamachassna. Ukanakat yaqhepajj fumaña, machaña, droganakamp qolljasiña ukanakawa. Taqe ukanakajj cuerpomar jan waltʼayiwa, jakañ vidarusa, familiamarus jan respetatamwa uñchtʼayi.
Kunanakatï jan waltʼaykiristam ukanakat wal amuyasim. Jan kuna accidentenakar purtʼasiñatakejj utamajj seguröñapawa. Autom sum uñakiptʼasim, wali cuidadomp apnaqarakim. Kunanakatï jan waltʼañaru jan ukajj jiwañar purtʼasiykiristam ukanak mayninakan chʼamañchatpachas jan luramti.
Mayninakarojj suma chuymamp uñjapjjam. Yaqha kasta jaqenakaru, qollqeni jan ukajj jan qollqeni jaqenakaru, jukʼa jan ukajj wali yatjjatat jaqenakar kunjamsa uñjtan ukanwa jakañ vidar respetomp uñjatasajj amuyasiraki. Cheqas yaqhachasiñanaka jan ukajj uñisisiñanak utjatap laykuw jan walinakasa, guerranakas oraqpachan utji.
JEHOVÁ DIOSAN TESTIGONAKAPAJJ KUNSA LURAPJJTA
Jaqenakajj kunjamsa sum jakasipjjaspa ukwa yatichapjjta. Bibliat yatichapjjataj laykojja, walja jaqenakaw jan wali vicionakapa, kunanakas cuerpopar jan waltʼayäna ukanak apanukuwayapjje.
Diosar adorañatak utanak lurkasajja, accidenter jan purtʼasiñatak leyinakajj utjki ukarjamapuniw lurapjjta. Diosar adorañatak utanak utachañana ukat yaqha ukhamanakan yanaptʼapki uka voluntarionakajja, jan accidentenakar purtʼasiñatakejj mä capacitación katoqapjje. Diosar adorañatak utanakajja, jan mä accidentejj utjañapatak utjki uka leyinakarjamaw sapa kut uñakipasi.
Jan walin uñjasirinakaruw yanaptʼapjjta. Niya jichhanakakejja, oraqpachan jachʼa jan waltʼäwinakan uñjasirinakaruw labores de socorro ukampi yanaptʼapjjta. 200 jachʼa jan waltʼäwinakanwa yanaptʼapjjta, 12 phajjsinakaw ukham yanaptʼapjjarakta. Niya 12 millón dolaranakaw donacionanakat gastasirakïna.
Ébola sat usojj África Occidental (2014) ukat República Democrática del Congo (2018) ukankirinakar jan waltʼayäna ukhajja. Kunsa uka usumpi jan contagiasipjjañapatakejj lurapjjaspa ukwa Jehová Diosan Testigonakapajj walja jaqenakar yatichapjjayäta. Walja jaqenak nayraqatan mä discurso arstʼañatakejj representantenakaw khitasïna, uka discursojj “Istʼasirïñajj jakañ vida salvi” satänwa. Reunionanakajj apaskäna uka cheqanakanjja, ampar jareqasiñanakaw uchasïna. Jan contagiasiñatakejj ampar jareqasiñasa ukat yaqha ukhamanaka lurañas kunja wakiskirisa ukwa qhanañchapjjayäta.
Sierra Leona markanjja, Ébola usump jan contagiasipjjañapatakejj waljaniruw Testigonakajj yanaptʼapjjäna. Ukham lurapjjatapat mä radiojj jupanakar felicittʼänwa.
Ébola usojj 2014 maran utjkäna ukhajja, Liberia markan mä Salón del Reinon ampar jarisiñaw uchatäski.
a Nayra Oriente Medio cheqan uka leyejj utjkäna ukajja, familian jan usuntañapataki ukat mayninakat llakisiñas kunja importantesa ukwa uñachtʼayi.
