¿Mayninakar respetañajj utjaskiti?
MAYNINAKAR RESPETAÑAJJ KUNATSA WALI IMPORTANTEJJA
Mayninakar respetañajja sumaptayiwa, jukʼampi jan waltʼañar jan puriñatakiw yanaptʼaraki.
-
Bibliankir mä textojj akham siwa: “Suma arunakampi jaysañajja colerasiñ apaqewa, ukampis usuchjir arunakajj colerayiwa” sasa (Proverbios 15:1). Jan wali arunakasa jan wali luräwinakasa, jukʼamp jan waltʼäwirukiw puriyistaspa. Ukhamtï lurañänejja jukʼamp jan walinakanwa uñjassna.
-
Jesusajj akham sänwa: “Mä jaqejj kunatï chuymapan phoqantatäki ukanak parlaraki” sasa (Mateo 12:34). Mayninakat jan respetompi parltan ukhajja, inas chuymasan mä jan walejj utjchi. Mayninakat jan respetompi parlasajj jan jiwasjam jakapki, yaqha markatäpjje, yaqha jañchinïpjjaraki ukanakat kuns amuytan uk inas uñachtʼayaskarakstan, ukhamajj kuntï jupanakat amuytan ukanak cambiañasaw wakisispa.
Jichhanakakiw 28 markanakan 32.000 jila jaqenakar mä encuestajj lurasiwayi, 65% jaqenakajja janipuniw jichhürunakanjamajj markaparu jaqenakaru jan respetasirinakajj uñjasirikänti sasaw sapjjäna.
KUNSA JUMAJJ LURASMA
Khitimpitï parlkäta ukarusa, jan jumjam amuyki ukarus respetañamawa. Kuna arunakatï maynir sum jikjjatasiykaspa ukanak parlañatak chʼamachasim, ukhamatwa mayninakat jan wal jan amuyjjätati, janirakiw juzgjjätasa.
Kunjamtï jaqenakampi uñjatäñ munktajja, ukhamarak jumajj jupanakar uñjam. Jumatï jaqe masimar respetañatak chʼamachasïta ukhajja, jupanakajj ukhamarakiw respetapjjätam.
Perdonañatakejj jankʼakïñamawa. Maynitï parlatapampi jan ukajj luratapampi jan waltʼaystam ukhajja, janiw jupat jan wal amuyañamäkiti, perdonañamawa.
JEHOVÁ DIOSAN TESTIGONAKAPAJJ KUNSA LURAPJJTA
Jakasipkta uka lugaranakansa, trabajonakajansa taqeniruw respetaptjja, mayninakan ukham lurapjjañapatakis chʼamañchtʼapjjaraktwa.
Taqe jaqenakaruw Biblia sum uñtʼapjjañapatak gratisak yatichapjjta, ukampis janiw khitirus nanakjam amuyapjjañapataki, nanakjam creyipjjañapatak obligapkti. Jan ukasti, kunanakarutï creyipkta ukanakat jaqenakar parlasajja, Bibliankir aka ewjjtʼarjamaw lurapjjta: ‘llampʼu chuymampi wali respetompiw parlapjjta’ (1 Pedro 3:15; 2 Timoteo 2:24).
Yaqhachasiñanakarojj rechazapjjtwa. Maynitï Biblian yatichäwinakapat yateqañ munchi ukhajja, uka jaqerojj reunionanakajan sumwa katoqtʼapjjta, janiw kunäkipans yaqhachapkti. Cheqas taqenir munasiñataki ukat ‘taqe jaqenakar respetañatakiw’ chʼamachasipjjta (1 Pedro 2:17).
Gobiernonkir autoridädanakarojj respetapjjtwa jakasipkta uka cheqanakanwa ukham lurapjjta (Romanos 13:1). Leyinak istʼapjjtwa impuestonaksa pagapjjaraktwa. Politicarojj janis mitisipkstjja, mayninakajj política toqet mä amtaru puripjje ukarojj respetapjjtwa.