¿Kunatsa utat uta yatiyañax wali wakiskirixa?

“Jupanakasti janipuniw sapürusa amuktʼapkänti Jesucristxat yatichaña, parlañsa, templona ukhamarak utanakansa.” (HECH. 5:42.)

1, 2. 1) Jehová Diosan Qhanañchirinakapaxa, ¿kuna luräwipatsa jilpach uñtʼatäpxi? 2) ¿Kunatsa aka yatichäwin parlañäni?

 PÄ JAQIWA utat uta visittʼasipki, suma isthaptʼata ukat katuqtʼir mistsunki ukampix mä qhawqha arunakampiw Diosan Apnaqäwipat parltʼapxi, chiqasa taqi markanakanwa ukham uñjasi. Utanitix istʼchixa Bibliat apstʼat qillqatanakwa uñachtʼayapxi ukatxa, Bibliat ukhamaki yatichapxirisma sasin sapxaraki. Parlañ tukuyxapxi ukhaxa yaqha utarurakiw visittʼapxi. ¿Jumax ukham yatiyaraktati? Ukhamächi ukhaxa, amuypachataw janïr jupanakamp parlkasax Jehová Diosan Qhanañchiripjamaw uñtʼxapxpachätamxa. Chiqäskapuniwa, utat uta yatiyirinakjam uñtʼatapxtanwa.

² Jehová Diosan Qhanañchirinakapjamaxa Jesusan arupar phuqañatakix kunayman tuqitwa yatiyir sartanxa ukat arkirinak tukuyapxaraktanxa (Mat. 28:19, 20). Qhatunakansa callenakansa ukat yaqha chiqanakansa yatiyaraktanwa (Hech. 17:17). Ukhamaraki, telefonotsa cart qillqtʼasasa walja jaqinakampiw parltanxa ukat wakisirjamächi ukhaxa sapür luräwinakasan sarnaqkasasa yatiyaraktanwa. Internetansa Bibliat apstʼat qillqatanakax 300 jila arunakar jaqukipataw utjarakistu. * Ukham yatiyasax wali askinakwa jikxataraktanxa. Ukampisa, walja lugaranakanxa utat utatpunwa yatiyir sartanxa. ¿Kunatsa ukham yatiytanxa? ¿Kunjamatsa Diosan markapax utat uta yatiyirinakat uñtʼatäpxpacha? ¿Ukat kunatsa jichhürunakan wali wakiskirixa?

Apostolanakax kunjamsa yatiyapxirïna

3. ¿Yatiyir sarañatakix kuna iwxtʼanaksa apostolanakax katuqapxäna, ukat uk phuqañatakix kuns lurapxañapäna?

³ Utat uta yatiyañax Bibliarjamaw lurasi. Kunapachatï Jesusax apostolanakar yatiyir khitäna ukhax akham sasaw iwxtʼäna: “Kawkïr jiskʼa markarusa, jan ukax jachʼa markar mantasasa thaqtapxam khititï askïki uka jaqiru” sasa. ¿Kunjamsa thaqhapxañapäna? Jaqinakan utanakapar visittʼasa, kunattix Jesusax jupanakarux sänwa: “Utar mantkasinxa suma arumpi aruntapxam. Utanitix askïnixa, uka suma aruntax askïniwa” sasa. ¿Apostolanakax jaqinakar visittʼañatakix jawsatakit sarapxirïna? Janiwa, Jesusan aka arunakapatwa uk amuysnaxa: “Janitix katuqapkätamxa, ni istʼapkarakïtamsa ukkhaxa, mistuwayxapxam uka utatxa, uka markatsa ukhamarak kayunakamatsa laqʼa polvonakxa thalarasiwayxapxam” sasa (Mat. 10:11-14). Jaqinakar parltʼañatakix jupanakaw nayraqat qhispiyasiñ arunak yatiyasax ‘taqi jiskʼa markanakaru sarapxañapäna’, ukaw Jesusan iwxtʼanakapat qhan amuyasi (Luc. 9:6).

4. ¿Kawkinsa Bibliax utat uta yatiyañ tuqit yatichi?

⁴ Apostolanakaxa utat uta yatiyapxirïna uka tuqit qhan Bibliax yatiyi. Amuytʼañataki, cristian tamax 33 maran uttʼayatakän ukhaxa kunanaksa lurasipkäna ukwa Hechos 5:42 qillqatanxa yatiyistu: “Jupanakasti janipuniw sapürusa amuktʼapkänti Jesucristxat yatichaña, parlañsa, templona ukhamarak utanakansa”. Niya pä tunka mara pasatatsti, apóstol Pablox Éfeso tamankir irpir chuymaninakarux akham sasaw amtayäna: “Jumanakar Tatitun arunakapat parlañatxa janiw inaktʼkäyätti,  jumanakatak askïtap layku. Utanakansa, ukhamarakiw mayninakarusa taqin uñjkatarakiw jumanakarux yatichapxsma” sasa. ¿Janïr uka irpïr chuymaninakax cristianopkäna ukhat Pablox jupanakar visitpachäna? Ukhamäspanwa, kunattix jupanakar akham sasaw parlatayna, “Diosar arrepientisipxam, ukatsti Tatit Jesucristor iyawsapxarakim” sasa, ukat yaqhanakampita (Hech. 20:20, 21). Hechos 20:20 qillqatat parlkasaxa Archibald Thomas Robertson sat jaqix Comentario al texto griego del Nuevo Testamento sat qillqatapanxa akham siwa: “Aka yatiyiritxa wakisispaw ak qhanañchaña, taqit sipansa jukʼamp yatiyirïna, utat uta yatiyirïna” sasa.

Jichhürunakanxa walja tʼiju tʼijunakaw utji

5. ¿Diosan Arupat yatiyañaxa Joel profetan arunakaparjamax kunamp sasisa?

⁵ Nayra patak maranakan yatiyaskän ukax kunjamsa jichhürunakan jukʼamp yatiyasiñapän uk uñachtʼayañatakikïnwa. Kunayman laqʼunaka, sañäni tʼiju tʼijunaka llakkañsa qʼal manqʼsuwayapkaspa ukamp sasiw ajllit cristianonakan yatiyatapaxa sasaw Joel profetax säna (Joel 1:4). Mä ejercitjam sarantasax uka tʼiju tʼijunakax pirqanak thuqukipas utanakaruw mantapxi ukat taqi kuntix jikxatapki ukanaksa qʼal manqʼsuwayxapxaraki (Joel 2:2, 7-9 liytʼasiñapawa). Aka uñachtʼäwixa, kunjamsa Diosan markapax jichhürunakan jan qarjasa taqi chiqan yatiyasipki uk uñachtʼayistu. Uka profecia arunakar phuqañatakix ajllit cristianonakasa ukat jupanakamp chika sarir ‘yaqha ovejanakasa’ kunayman tuqitwa yatiyapxi, ukampisa utat uta yatiyañawa jukʼamp wakiskirixa (Juan 10:16). Jehová Diosan Qhanañchirinakapaxa, ¿kunjamsa apostolanakax yatiyapxirïna ukhamti yatiyaraktanxa?

6. ¿1922 maranxa kunsa ajllit cristianonakarux amtayasïna, ukat yaqhipanakax kamsapxänsa?

⁶ 1919 marat aksaruxa sapa cristianow yatiyir sarañapa sasaw qhanañchasïna. Amuytʼañataki, The Watch Tower 15 de agosto de 1922 uka revistanxa mä yatichäwipax akham säna: “El servicio es esencial”, ukanxa ajllit cristianonakaruw amtayasïna wali wakiskirïtapa “taqi chuyma Bibliat apstʼat qillqatanakat jaqinakar yatiyapxañapataki ukat utanakapar visittʼasaxa utanimpix parltʼapxañapataki alaxpach Apnaqäwix jakʼankxiw” sasa.  Bulletin sat qillqatanxa (Boletín, jichhaxa Diosan Apnaqäwipat Yatiyañataki satäxarakiwa) kunjamsa jaqinakampi parltʼañax wakisispa uka yanaptʼanak utjchïnsa, qalltanxa jukʼanikiw utat uta yatiyir sarapxirïna. Yaqhipanakax jan yatiyañ laykux kunayman parlapxirïna, uka luräwix jupanakarux jiskʼachkaspas ukham amuyapxäna. Sapa kutiw yatiyir sarañatakix chʼamachasïna ukatwa waljanix Jehová Diosan markapat jithiqtawayxapxäna.

7. ¿1950 uka maranakanxa kuna yanaptʼas wali wakisirïnxa?

⁷ Uka qhipa maranakansti yatiyirinakax jilxattaskakïnwa. Ukampisa, utat uta yatiyir sarañatakix yanaptʼatäñaw wakisinxa. Estados Unidos sat markat amuytʼañäni. 1950 uka maranakanxa 150.000 qhanañchirinakatxa 42.000 jilat kullakanakax qillqatanakak lakirapxirïna jan ukasti callenakan revistanak aptʼatakiw sayapxirïna. Ukatxa 60.000 qhanañchirinakaxa janiw yatiyirix mistxapxänti walja phaxsinakaw ukham lurapxirïna. ¿Kunjamsa taqiniru utat uta yatiyir sarapxañapatakix yanaptʼasisapäna?

8, 9. ¿1953 maranxa kuna wakichäwis aka Uraqpachan uttʼayasïna, ukat kuna askinakas jikxatasïna?

⁸ 1953 maranxa Nueva York sat markan walja markanakat jutirinakaw mä jachʼa tantachäwin tantachasipxäna ukanxa wasitatwa utat uta yatiyir sarañax wali wakiskiriw sasin amtayasïna. Irpir chuymaninakax jilat kullakanakarux utat uta yatiyapxañapatakix yanaptʼapxañapawa sänwa Nathan H. Knorr sat jilataxa. Ukxarux saskakïnwa “Taqiniwa suma yatiyäwinak utat uta yatiyañatakix wakichtʼatäpxañapa” sasa. Jankʼakirakiw aka Uraqpachan utat uta yatiyir sarapxañapatakix mä wakichäwi uttʼayasïna. Janïr utat uta yatiyir saririnakax kunjamsa Bibliampi yanaptʼayasisax jaqinakamp parltʼapxaspa, jisktʼanakapar qhanañchtʼapxaspa ukat amuytʼayapxaspa uka tuqinakat yanaptʼa katuqapxäna.

⁹ Aka wakichäwimpix walja askinakwa jikxatasïna. Niya tunka maranxa, yatiyirinakasa ukat Bibliat yatxatirinakasa mä ukhatxa mä ukhampi jilaw jilxattawayäna. Ukat jichhürunakanxa niya paqallq millón Jehová Diosan Qhanañchirinakapawa aka Uraqpachan suma yatiyäwinak yatiyasipki. Ukham utat uta yatiyañatak wal chʼamañtʼasipxatapatxa Jehová Diosax markaparux bendicirakiwa, yatiyirinakan wal jilxattatapatwa ukax qhan amuyasi (Isa. 60:22).

Qhispiyasipxañapatakiw jaqinakar chimpusi

10, 11. 1) ¿Ezequiel libronxa kuna visionas uñsti? 2) Jichhürunakanxa, ¿kunjamsa uka visionax phuqasiski?

¹⁰ Utat uta yatiyir sarañax wali wakiskiriwa, Ezequiel libron 9 jaljapan jikxataski uka visionaw uka tuqit qhan amuytʼayistaspa. Uka visionanxa, Ezequiel profetax suxta jaqinakaruw sapa maynis mä jachʼa thuru lawas aptʼatkam uñjäna uka taypinsti mä jaqiruw uñjarakïna lino isimpi isthapita ukat thixniparux qillqañ yänakanirakinwa. Ukatsti uka jaqirux Diosax sarakïnwa: “Jerusalén marka muytam, kawkïrinakatix aka markan jan wali luräwinakap layku wali llaktʼatäsipki ukanakaru mä chimpu paranakaparu uskurakim” sasa. Chimptʼañ tukuyxasaxa, uka thuru lawanak aptʼatäpkan uka suxta jaqinakaruxa jan chimptʼatäpki uka jaqinakar jiwarayapxam sasirakïnwa (Ezequiel 9:1-6 liytʼasiñapawa).

¹¹ Uka ‘lino isimpi isthapit jaqixa’ alaxpachar saririnakat aka uraqin jiltʼasipki uka ajllit cristianonakawa. Diosan Arupat yatiyasa ukat arkirinak tuyusawa ajllit cristianonakax Jesusan ‘yaqha ovejanakap’ taypinkapkanis uka jaqinakarux chimpupkaspas ukham chimptʼasipkaraki (Juan 10:16). ¿Kunas uka chimpuxa? Uka jaqinakax Jesusan arkirinakapäpxiwa Diosar katuyata, bautisata ukat Jesusjam suma jaqïñatak chʼamachasipxaraki ukaw uka chimpuxa, paranakaparus chimptʼatäpkaspas ukhama (Efe.  4:20-24). Yaqha ovejanaka satäpkis ukanakax ajllit cristianonakampix mä sapa tamakïpxiwa ukat jaqinakar chimpuñsa yanaptʼapxarakiwa (Apo. 22:17).

12. Ovejanakjam istʼasir manso jaqinakarux thaqhaskakiñasawa, ¿kunjamsa Ezequielan visionapax uk sum uñachtʼayistu?

¹² Khitinakatix “wali llaktʼatäsipki” ukanakar thaqhañax jankʼakïñapawa, kunattix jaqinakax jiwañan uñjasipxaspa ukwa Ezequiel chachan visionapax uñachtʼayistu. Ukhamawa, akat mä jukʼaruxa tʼunjañataki thuru lawas aptʼatkamäpxän uka suxta jaqinakawa mä arunxa Jehová Diosan angelanakapawa jan chimptʼatäpki ukanakarux jiwarayapxani. Uka tiempot parlkasaxa Jesusaw wali chʼaman angelanakapampi “Diosar jan katuqirinakar mutuyiriw jutani, ukhamaraki Tatit Jesucristosan qhispiyasiñ arunakapar jan istʼirinakarusa” sasaw apóstol Pablox säna (2 Tes. 1:7, 8). Jaqinakax suma yatiyäwinakar istʼapxanit janicha ukhamarjamaw taripatäpxani ukwa Pablon arunakapat amuysna, ukampisa Diosan arupat taqi chuyma tukuykam yatiyañax apasiskakiñapawa (Apo. 14:6, 7). Jehová Diosan taqi luqtirinakapax mä luräwi katuqtanxa, janiw ukhamak uñjañasäkiti (Ezequiel 3:17-19 liytʼasiñapawa).

13. 1) ¿Kunsa apóstol Pablox phuqañ munäna ukat kunatsa? 2) ¿Jumasti jaqi masimaru ukham yanaptʼañ munaraktati?

¹³ Apóstol Pabloxa taqiniruw suma yatiyäwinak yatiyañ munäna, ukatwa akham qillqatayna: “Nayax taqitwa manüta, griegonakatsa jan griegonakatsa, walja amuytʼaninakatsa, jukʼa amuytʼaninakatsa. Jichhasti nayax jankʼakïtwa qhispiyasiñ suma arunak yatiyañatakixa, ukhamarak jumanakarus Roma markan jakasir jilatanaka” sasa (Rom. 1:14, 15). Diosaxa, Pablorux khuyaptʼayänwa ukatwa wal yuspäräna. Ukat Diosan khuyapayasiñap jikxatapxañapatakix jaqinakar taqi chuyma yanaptʼañ munäna kunjamtix jupax khuyaptʼayatäkan ukhama (1 Tim. 1:12-16). Mä jaqir uñtʼasaxa uka jaqit manükaspas ukat suma yatiyäwinak yatiyasakis uka manu phuqkaspa ukham Pablox amuyasïna. Jumasti, ¿jaqi masimat manükasmas ukhamti amuyasirakta? (Hechos 20:26, 27 liytʼasiñapawa.)

14. ¿Kunatsa taqi chiqanakana ukhamaraki utat uta yatiytanxa?

¹⁴ Jaqinakan qhispiyasipxañapatak yanaptʼañax wali askïkchisa janiw uka amtampikix utat uta yatiyir sarktanti. Malaquías 1:11 qillqatanxa, Jehová Diosax akham siwa: “Taqi akapach uraqinwa nayarux jachʼañchapxitu [...], ukatsti qʼuma ofrendanakarak luqtapxitu” sasa. Jehová Diosan arsutaparjamax luqtirinakapaw aka Uraqpachan altʼat chuymampi Diosan sutip yatiyasipki ukat jachʼañchasipkaraki (Éxo. 6:2, NM; Sal. 109:30; Mat. 24:14). Jiwasax Jehová ‘Diosarupuniw yupaychañ’ muntanxa ukatwa taqi chiqanakansa utat utsa yatiyaraktanxa (Heb. 13:15).

Muspharkañanakaw jakʼachasisinki

15. 1) ¿Jericó markar muyuntapkäna uka paqallqüri urunxa kunjamsa israelitanakax jukʼamp luräwinipxäna? 2) ¿Kunsa yatiyañ tuqit uñachtʼayistu?

¹⁵ ¿Kunjamsa jutïrin yatiyasiskani? Jericó markar muyuntapkäna ukax Josué libron qillqatawa, ukawa jutïrin kunjams yatiyasiskani uk uñachtʼayistu. Amtañäni janïr Jericó markar tʼunjkasaxa, suxta uruwa urun mä kuti, Jericó markar muytapxäta sasaw israelitanakarux Diosax säna. Ukampisa, paqallq urüxan ukkhaxa jukʼamp luräwinakaw utjäna. Josué chacharux Jehová Diosax sänwa: “[Jumanakax] paqallqu kutiw markaru muytapxata,  ukatsti sacerdotenakaxa pututu phustʼapxani. Kunapachatï pututu phustʼiri istʼapxat ukhaxa, jumanakaw wali jachʼat artʼapxäta ukatsti Jericó markan pirqanakapax tinkuraniwa” sasa (Jos. 6:2-5). Inas jichhürunakanxa yatiyañ tuqit luräwinakax ukhamarak jilxatchini. Kunjamäskpansa aka ñanqha pachax tʼunjatäkani ukkhax Diosan sutipa ukhamarak Apnaqäwipasa sumapuniw qhanañchatäxani.

16, 17. 1) ¿Janïr aka ñanqha pachax tʼunjatäkipanxa kunas yatiyasiñapa? 2) ¿Kuna jisktʼanakarusa jutir yatichäwin qhanañchasiskani?

¹⁶ Jutïrinxa yatiyäwisax ‘jachʼatsa nuwasiwïn artʼasksna’ ukhamäspawa. Diosan muspharkañ taripäwinakapat parlkasaxa ‘alaxpachat jachʼa chhijchhis jaqinakxaru purinispa’ ukhamäniwa, “uka chhijchhinakasti yaqhipanakax pusi tunka kilow pesapxäna” ukham sasin Apocalipsis librox yatiyarakistu. Ukatpï, Apocalipsis 16:21 qillqatanxa jachʼa ‘tʼaqhisïwiniw’ sarakixa. Janïraw yatktanti utat uta yatiyañax kunja wakiskirïnisa Diosan qhip qhipa taripäwinakapat yatiyañanxa. Ukampisa akaw yatisi janïr ‘jachʼa tʼaqhisïwi’ tukuykipanxa Jehová Diosan sutipax taqi aka Uraqpachanwa yatiyatäxani (Apo. 7:14; Eze. 38:23, NM).

¹⁷ Uka muspharkañ luräwinak suytʼkasaxa Diosan Apnaqäwipat suma yatiyäwinak taqi chuyma yatiyasipkakiñäni. Chiqasa, aka mayitaru phuqañatakix utat uta yatiyañasawa. ¿Utat uta yatiyasax kuna jan waltʼäwinakansa jikxatassna? ¿Kunjamatsa uka jan waltʼäwinakar atipsna? Jutir yatichäwiw uka jisktʼanakar qhanañchani.

[Qhanañchäwi]

¿Kamsasmasa?

• Bibliarjamaxa, ¿kunatsa utat uta yatiyir sartanxa?

• ¿Kunjamsa jichhürunakanxa utat uta yatiyir sarañax wali wakiskirïtap qhanañchasi?

• ¿Jehová Diosan luqtirinakapax kunatsa jaqinakar yatiyapxañapapunixa?

• ¿Kuna muspharkañanakasa jakʼachasisinki?

[Jisktʼanaka]

[5 janan fotonakapa]

Pabljamaxa, ¿jaqinakar taqi chuyma yatiyañ muntati?

[6 janan fotopa]

Knorr sat jilata 1953 marana