Phuqañjamäki ukak amtañax wal kusisiyistu

“¡WASITAT aynachtʼxarakiktwa!” ¿Kuntï amtkayätan uk jan phuqañjamäxasax qhawqha kutis ukham sirïtanxa? Mä kullakax asu wawapar uñjañ laykuxa jan tiemponiw uñjasispa ukat Diosar yupaychañatakis ukhamarak taman kuna luräwinakatï utjki ukanak jan phuqïrjamäsax wali llakitaw uñjasispa. Mä jilatax kunjamtix wawat uywatäkan uk amtasisax janis kunatakïkaspa ukat taman janis kuns lurkaspa ukham inas amuyasirakchispa. Ukhamaraki mä chuymankipstat kullakax chʼamanïkän ukhax taman luräwinakapan wal lurtʼiripachänwa jichhax uk jan lurañjamäxasax inas llakimpi wali aynachtʼat jikxatasxarakchi. Christiane sat mä kullakaxa familiapar yanaptʼañ laykux janiw Diosar luqtañan kunjamtix jupax munki ukham lurxiti, ukhaman uñjasisaxa jupax akham siwa: “Kunapachatï mä arstʼäwin mayninakar precursorjam irnaqtʼañatak chʼamachtʼasi ukhaxa, awisax jachaqtʼästwa” sasa.

¿Ukham amuyunakar atipjsnati? Kunjamtï jakasipki uk suma amuyumpi uñjañatakixa, ¿kunsa yaqhip cristianonakax lurapxi? ¿Kunjamsa kunatï phuqañjamäki ukak amtañax jiwasatakix askïspa?

Iyaw sirïpxañäni

Apóstol Pabloxa akham sasaw iwxtʼäna: “Tatitunkasax kusisitäpxapunim taqi urunakana. Wasitat sapxsma kusisipxam” sasa. Ukxarusti kunjamsa kusisitakïsksna ukwa qhanañcharakïna: “Suma chuymanïpxatamax [jan ukax iyaw sirïpxatamax] taqi jaqinakan uñtʼatäpan” (Fili. 4:4, 5). Ukhamawa, kusisita, chuymas phuqtʼata Diosar luqtañatakix wakisiw kunatï jakawisarjama, chʼamasarjama lurirjamästan ukanakak amtañasa. Jan sum amuytʼasisa kunatï jan phuqañjamäki uk jikxatañ munañänixa wali qaritaw uñjasiñäni. Ukampisa, janiw yatiyir misturjamäxti, janjamakiw uk lurkiristti sas yatiyir jan sarañax janiw walïkaspati.

Kunjamsay jakaschiñäni, ukampis Jehová Diosarux taqi chuyma luqtañasawa, ukwa Jupax muni (Col. 3:23, 24). Jan ukhamäkaspaxa, janirakiw Jupar yupaychañatak katuyaskayätan uka arsutasxa phuqkaraksnati (Rom. 12:1). Ukatxa, janirakiw Diosar taqi chuyma luqtirinakjam chuymas phuqtʼata kusisita sarnaqkañäniti ukat Diosan yaqha bendicionanakapsa katuqkaraksnati (Pro. 10:22).

Biblian “iyaw siri” sas jaqukipatäki uka aruxa mayninakar suma amuyumpi uñjir jaqïspawa. Aka aruxa janiw sinti waytʼasirïña sañ munkiti. Ukhamasti mä iyaw sir jaqixa jakäwipan kunjamantix jikxataski ukxa wali amuyumpiw uñji. ¿Ukham lurañax chʼamäspati? Chiqasa, yaqhipanakax mayninakarux sum uñjapxaspa, ukampisa jupax janiw ukham uñjaskiti. Amuytʼañataki: mä munat amigosaru walja luräwinakampi qarit sarnaqir uñjsna ukhaxa, ¿ukham jan qariñapatakix  janit iwxtʼksna? Jiwasax ukhamarakiwa qhawqxay lurirjamästan uk amuyasiñasarakiwa (Pro. 11:17).

Khitinakatï qhuru awk taykan uywatäpki ukanakatakixa kuntï chʼamaparjam jan lurirjamäpki uk suma amuyump uñjañax chʼamawa. Yaqhipanakax wawäkasinxa taqi kuns sum lurasakis awk taykanakapan munasitäpxaspa ukham amuyasipxirïna. Jiwasatï ukham amuyunichiyätan ukhaxa, janiw kunjamtï Jehová Diosax uñjkistu ukham uñjaskaraktanti. Ukampisa Jupaxa taqi chuyma luqtatas laykuwa munasistu uk janiw armañasäkiti. Diosan Arupaxa akham sasaw chuymachtʼistu “Jupax jiwasanakan laqʼätas yati, ñiqʼit luratapxatas yatiraki” sasa (Sal. 103:14). Kun lurañatakis kawkikamas chʼamasax utji ukxa Jupaw yati, ukat munasistuwa, kunattix taqi chuymasampiw Jupar luqtasktanxa. Ak amtañaw yanaptʼistani Diosax janiw qhurükiti, uk amtañäni ukhaxa facilakiw altʼat chuymampi qhawqhakamxay lurirjamästan uks yatiñäni ukat janirakiw jiwaspachpas kunatï jan phuqañjamäki uks lurkarakiñäniti (Miq. 6:8).

Ukampisa uk yatisasa yaqhipanakax janis Diosan chuymapar kusisiyksna ukham amuyapxaraki. Ukham amuyunïsta ukhaxa, ¿janit mä suma amuytʼasir munat amigomampi iwxtʼayaskasma? (Pro. 27:9.) Sañäni, inas precursor regularjam irnaqtʼañ munsta. Ukax mä suma amtäwiwa. Ukampisa uka amtarjam lurañax inas chʼamächi. Kunjamsa jukʼa luräwinakampikix kusisit jakasisma uka tuqit amigomax iwxtʼiristamwa. Jan ukasti familiamar uñjañanïtam yatisinxa jupaw precursorjam irnaqtʼañatakix horasäspati janich uk amuytʼañ yanapiristamxa. Precursorjam irnaqtʼasmati jan ukasti jakäwiman kuna lurañanakas apanukuñam wakisispa uk panpachaniw amuykiptʼapxarakisma. Chacha warmïpki ukanakaxa, chʼamaparjam qhawqhay warmipax lurirjamächi ukxa chachaw amuytʼayañapa. Warmitï mä phaxsin precursorjam irnaqtʼañ amtchixa, chachawa janïr qalltkasax sum samartʼañamaw sasin iwxtʼarakispaxa. Ukhamatwa chʼamachtʼat jikxatasirakini ukat yatiyir saratapatsa kusisitarakïniwa.

Kuntï lurirjamäkta ukak lurañamawa

Inas chuymankipstatäsina jan ukax usutäsinsa jan nayrjam Jehová Diosar luqtxstati. Jan ukax jiskʼa wawanakanïsax ukanakar uñjañ laykux janiw sum Bibliat yatxatxti, tantachäwinakansa janiw sum istxti sasin inas amuyasiraksta. Ukampisa, ¿janit jan lurirjamäkta ukanakatak sinti llakisisax awisax kuntï luraskta ukanakat armaskta?

Ukhamarakiw nayra Israel markan jakasiri mä levitarux pasäna. Jupaxa mä maranxa pä semanaw templon luqtirïna ukax mä suma luräwikchinsa, sapüruw jupax luqtañ munäna; chiqasa ukax mä suma amtänwa ukampisa janiw phuqañjamäkänti (Sal. 84:1-3). ¿Jan llakimpi apayasiñatakix kunas Diosat jan jithiqtiri levitarux yanaptʼäna? Diosan templopan  mä urukisa luqtäxa nayatakix wali suma churäwipuniw sasaw jupax amuyasïna (Sal. 84:4, 5, 10). Ukhamarakiwa, jiwasanakaxa kuntï jan lurañjamäki ukanakak lupʼiñat sipansa kuntï lurirjamäktan ukanakwa wali askjam uñjañasaxa.

Nerlande sat ma kullakat amuytʼapxañäni, jupaxa Canadá sat markan jakasiraki janiw jupax sarnaqkiti jan ukasti silla de ruedas satäkis ukan quntʼatakiwa. Ukhaman uñjasisax yatiyatapax sinti jukʼakïkaspas ukham amuyasïna. Ukampisa, uta jakʼapan mä jachʼa qhaturuw territorioparjam uñxäna ukat kuntï amuykäna ukax mayjtʼxarakïnwa. Nerlande sat kullakax akham siwa: “Uka jachʼa qhatunxa mä qunuñaw utji uka jakʼaruw sillaxan quntʼasta. Khitinakatï uka qunuñar quntʼasir jutapki ukanakar yatiyañaxa nayatakix wali kusiskañawa” sasa. Jupatakix ukham yatiyañaxa wali askipuniwa ukat kusisitaw jikxatasiraki.

Jakäwisan kunjamtï jikxatasktan ukarjam kuns lurañäni

Amuytʼapxañäni vela satäkis ukamp apnaqat barcox qutan sum sarantaskaspa. Akatjamatxa, jallumpi thayampix wal sartanispa ukat uka barco apnaqirixa vela satäkis uk apthapxakiwa. Jupaxa janisay uka jallumpi thayampirux atipjkchinixa, uka barcop jan kuna chijir puriñapatakix yanaptʼaspawa. Ukhamarakiwa, awisax jan waltʼäwinakax “jallumpi thayampis wal sartankaspa” ukhamawa janiw kuns kamachksnati. Ukhampachasa uka jan waltʼäwinakarux saykatsnawa jakäwisan kunjamantix jikxatastan ukhamarjam amtasax janchi tuqitsa amuyunakasansa kusisitäñatsa jan aynachtʼañatakix amuytʼasiñasawa. Ukhamtï lurañänixa, Diosar luqtäwisanxa chuymas phuqtʼata ukat kusisitaskakiñäniwa (Pro. 11:2).

Mä qhawqha tuqit amuytʼapxañäni. Wali qarit jikxatassna ukat uka arumax tantachäwix utjarakistaspaxa, wakisispawa urunxa jan sinti qariñasa; ukhamatwa tantachäwir sum sarañäni ukat jilat kullakanakasampix chʼamañchtʼasirakiñäni. Jan ukax mä kullakax wawapa usutätap laykux utat uta jan yatiyir mistxaspa ukhaxa, utaparu yaqha kullakar jawstʼasinxa wawap ikiñkamax telefonotsa yatiyapxarakispawa.

Jakäwiman kunjamtï jikxataskta uk phuqañ laykux, inasa tantachäwinakan kuntï yatxataskani ukxa jan sum wakichasxstati, ukhamächi ukhaxa, ¿kamachasmasa? Kuntï puedkta ukak yatxatasmaxa, ukampis sum yatxatañama. Chiqpachansa, kunatï phuqañjamäki ukak amtasaxa Diosarux kusisit luqtaskaksnawa.

 Chiqasa, awisax ukhamarjam lurañatakixa wakisispaw amuyumpi amtatasarjam phuqaña ukat chʼamachtʼasiñasa. Amuytʼañataki, Francia markankir Serge ukat Agnès sat mä chacha warmit parltʼañäni, jupanakax kuntï amtapkäna ukxa jaytxapxañapänwa. Chachax akham sänwa: “Warmijax usurïtap yatisinxa kuntï misionerjam irnaqtʼañatak amtapkäyat ukaxa ina chʼusarukiw tukusiwayxäna.” Serge sat jilataxa jichhax pä imill wawanïxasax kunsa jupasa warmipasa lurapxatayna uk qhanañchtʼaraki: “Janisay yaqha markan misionerjam irnaqtʼañjamäkchinxa, markasan ‘misionerjam’ irnaqtʼaraksnawa sapxayätwa, ukatwa yaqha aru parlir gruporux sarxapxta” sasa. ¿Ukham amtapxatapatxa kuna askinaksa jikxatappachäna? “Taman mayninakar wal yanaptʼasax wali kusisitaw jikxtasipxta” sasaw Serge sat jilatax säna.

Odile sat 70 maran mä chuymankipstat kullakaxa Francia tuqinrakwa jakasi, qunquripanxa artrosis satäkis uka usuniwa janiw jaya tiempo saytʼat aguantkiti. Odile kullakaxa ukham usurnukstatäsinxa janiw utat uta yatiyxänti ukatwa llakit jikxatasïna. Ukampisa llakimp aynachtʼayasiñat sipansa, telefonotwa yatiyañ qalltäna. “Janiw chʼamäkiti, amuykayäta ukat sipansa jukʼamp kusisiñ jikxatarakta” sasaw säna. Ukham yatiyasaxa wasitatwa kusisit jikxatasirakïna.

Kuntï phuqañjamäki ukak amtasax wali askinak jikxataraksna

Kuntï phuqañjamäki ukak amtasaxa janiw wasitat aynachtʼxaraktwa sasin siskañäniti. Kunatï phuqañjamäki ukak amtañänixa qhawqhay chʼamasax utjchi ukarjamaw lurarakiñäni. Luräwinakasax jukʼaskpansa, ukhamarjam lurasawa, chuymas phuqtʼat kusisita jikxatasirakiñäni.

Ukhamaraki, chʼamasarjam qhawqhay lurirjamästan uk sum amuyasiñäni ukhaxa, uka amuyumpirakiw jilat kullakanakasar uñjañäni ukat kuntï lurirjamäpki ukakirak jupanakatsa mayiñäni. Ukhamatwa taqi kuntï jiwas layku jilat kullakanakasax lurapki uksa yuspärarakiñäniwa, ukat maynit mayniru yanaptʼasisa munasisa sum sarnaqarakiñäni (1 Ped. 3:8). Jehová Diosax wali munasir Awkiwa janiw kuntï jan phuqañjamäki ukanak maykistaspati uk janiw armañamäkiti. Ukat amtanakamasa, kuntï jikxatañ munkta ukanakax phuqañjamäni ukhaxa, Jehová Diosar yupaychañ tuqit luräwinakamansa chuymas phuqtʼata ukat kusisitarakïyatawa.

[29 janan qhanañchäwipa]

Chuymas phuqtʼata ukat kusisita Diosar luqtañatakixa, kuntï suyktan ukanakax phuqañjamäñapawa ukat qhawqhay chʼamasarjam lurirjamästan ukak amtañasa

[30 janan fotopa]

Nerlande sat kullakax yatiykasax kuntï lurañjamäki ukak lurasaxa kusisitaw jikxatasiraki

[31 janan fotopa]

Jan waltʼäwinakax “jallumpi thayampis wals sartankaspa” ukamp sasiwa, ukat wali amuyumpiw ukanakar saykatañasaxa

[Fotox khitin apsutasa]

© Wave Royalty Free/age fotostock

[32 janan fotopa]

Serge ukat Agnès sat chacha warmix yaqha amtanïxasax kusisipxiwa