Utat uta yatiyasax kunjamsa jan waltʼäwinakar atipjsna

“Diosasanxa jukʼampwa chʼam katxatapxta jumanakaru Diosan suma arunakapa yatiyañataki jachʼa nuwasiñ taypina.” (1 TES. 2:2, MT.)

1. ¿Kuna jan waltʼäwinakansa Jeremiasax jikxatasïna ukat kunjamsa ukanakar atipjäna?

 JEREMÍASAX jiwasjam jaqikirakïnwa. Kunapachatï Jehová Diosax ‘markanakan profetapäñapatak’ uttʼaykan ukhaxa, jupax sänwa: “¡Ay, Tata! ¡Nayax wawasktwa, janiw parlañsa yatkti” sasa. Ukampisa, Diosar alkatasaxa mayitaparux istʼänwa (Jer. 1:4-10). Jaqinakax janiw yäqapkänti, janirakiw istʼapkänti jupat sawkasipxänwa ukhamarak nuwjataw uñjasïna, pusi tunka jila maraw ukhaman uñjasitayna (Jer. 20:1, 2). Awispaxa janiw yatiyañ munxänti, ukampisa jan istʼasiri jilapart judío jaqinakarux yatiyaskakïnwa. Diosan chʼamapaw Jeremiasarux yatiyaskakiñapatakix yanaptʼäna jan ukhamäkasapänxa janiw uk lurkasapänti (Jeremías 20:7-9 liytʼasiñapawa).

2, 3. Jeremiasjamaxa, ¿kuna jan waltʼäwinakarus Diosan luqtirinakapax saykatapxañapa?

² Jichhürunakanxa Diosan walja luqtirinakapax Jeremías profetjam uñjasiraktanxa. Kunapachatï utat ut yatiyir sarañax waktʼxistäna ukhaxa, yaqhipanakax akham sapxpachäyatänwa: “Janipuniw nayax utat uta yatiyir sarkiristti sasa”. Ukampisa, yatiyañax Jehová Diosan munañapätap yatisinxa chʼam katxarusax jan axsarasaw yatiytanxa. Ukhamawa, yatiyaskakiñatakix kunayman jan waltʼäwinakan uñjastanxa ukatwa yaqhipatakix saytʼatäskañax wali chʼamaxa. Chiqpachansa, utat uta yatiyañ qalltañasa ukhamaraki aka ñanqha pachan tukusiñapkam yatiyañasa chʼamakiwa (Mat. 24:13).

³ Jumaxa Jehová Diosan Qhanañchirinakapampi  mä qhawqha tiempo inas Bibliat yatxatasksta ukat tantachäwinakaparusa sarxaraksta, ukampisa, ¿janïrat utat uta yatiyir sarañatakix amtkta? Jan ukax bautisatäxsta ukhaxa, ¿jumatakix jan usutäkasinsa yatiyir sarañax chʼamakiti? Jichhürunxa taqi markanakan utat uta yatiyirinakax utji ukham yatiyañatakixa kunayman jan waltʼäwinakaruw atipapxi. Jehová Diosan yanaptʼapampixa jumax utat uta yatiyir sararakismawa.

Chʼam katxarupxañäni

4. ¿Kunas Pablorux jan axsartʼasa yatiyañapatakix yanaptʼäna?

⁴ Uraqpachan yatiyasiski ukax nayrar sartaskakiñapatakixa janiw jaqin yatiñapampi, chʼamapampi luratäkiti, jan ukasti Diosan qullan ajayupampiw lurasi uk taqiniw yattanxa (Zac. 4:6). Chiqasa ukhamarakiw yatiyäwisatxa sasispa (2 Cor. 4:7). Apóstol Pablot amuytʼañäni. Mä kutixa jupampi ukat misionero masipampix uñisirinakapan jawqʼjataw uñjasipxäna uka tuqit parlasax jupax akham qillqäna: “Ukatsipana, nayrana Filiposan tʼaqhiskasasa pʼinqachatäkasasa [...]. Diosasanxa jukʼampwa chʼam katxatapxta jumanakaru Diosan suma arunakapa yatiyañataki jachʼa nuwasiñ taypina” sasa (1 Tes. 2:2, MT; Hech. 16:22-24). Ukham taqi chuyma yatiyiritakix kunjamatarak yatiyañax awisax chʼamäspansti sasin inas amuysna, ukampis ukhamänwa. Jiwasjamarakiwa, Pablox jan axsartʼasa taqi chʼamampi yatiyañatakix Jehová Diosan yanaptʼap munpachäna (Efesios 6:18-20 liytʼasiñapawa). ¿Kunjamatsa jupat yatiqassna?

5. ¿Kunas yanaptʼistani chʼam katxaras yatiyaskakiñatakixa?

⁵ Chʼam katxaruñatakisa jan axsarasa yatiyañatakisa Diosat mayisiñaw yanapistani. Mä precursorax akham satayna: “Jan axsarayasisa parltʼañatakix Diosat mayistwa, jaqinakan chuymaparu purtʼañatakisa mayisipuntwa, yatiykasina kusisiñ jikxatañatakisa mayisiraktwa. Chiqasa, aka luräwixa Diosankiwa janiw jiwasankkiti. Jan yanaptʼapampix janiw kuns lurksnati” (1 Tes. 5:17). Jan axsartʼasa yatiyaskakiñatakix taqiniw Diosaru qullan ajayup mayisipkakiñasa (Luc. 11:9-13).

6, 7. 1) ¿Ezequielax kunsa visionan uñjäna, ukat kun sañs muni? 2) ¿Uka visionatxa kuna askinaksa yatiqaraksna?

⁶ Jan axsaras yatiyaskakiñatakix kunas yanaptʼistaspa ukax Ezequiel libron qhanañchasiski. Mä visionanxa Jehová Diosaw mä rollo purapxaru qillqsuta Ezequielarux churäna, uka qillqatansti “jachañanaka, tʼaqhisiñanaka, axsarayañanaka” ukanakanïnwa ukatsti manqʼantañamaw sasaw säna. Ukat sarakïnwa: “Jichhasti aka qillqata manqʼantam, kuntix nayax jumar churksma uka, ukampi sistʼasirakim” sasa. ¿Kun sañs muni aka visionaxa? Kuntï Ezequielax yatiyañapäkän uk manqʼantkaspas ukhamäñapänwa. Mä arunxa chuymaparuw puriñapäna. Ukat jupa pachpaw akham säna: “Nayasti uka qillqxa manqʼanttwa, miskʼit sipansa jukʼampi muxsarakïnwa lakaxanxa” sasa. Diosan arunakapat yatiyañaxa Ezequielatakix wali sumänwa; miskʼsa manqʼantkaspa ukhamänwa. Janiw kuntï yatiykan ukarux jaqinakax istʼañ munapkänti, ukampis aka profetatakix Jehová Diosan sutipxaru parlañasa ukat arunakapat yatiyañasa wali askipunïnwa (Ezequiel 2:8–3:4, 7-9 liytʼasiñapawa).

⁷ Aka visionatxa jichha tiempon jakasir Diosan luqtirinakapax wali askinakwa yatiqtanxa, kunattix jupjamarakiw jan yäqasiri jan istʼasir jaqinakar yatiyaraktanxa. Yatiyäwisax Jehová Diosan wali aski churäwiparjam uñjaskakiñatakix Arupat liyiña ukat yatxataña ukaw yanaptʼistaspa. Jiwasatï Bibliat awisaki ukat janirak sum yatxatkañäni ukhaxa janirakiw Diosan Arupat kuna yatiqatasas chuymasan utjkaniti. Ukhamaxa, ¿Biblia sum liyiñatakisa ukat sapüru jukʼamp yatxatañatakisa jumax chʼamachasismati? Diosan Arupat liytʼasaxa, ¿sapüru uka tuqit lupʼismati? (Sal. 1:2, 3.)

Kunjamatsa Bibliat parlañ qalltsna

8. ¿Utat ut yatiykasaxa kunjamsa yaqhip yatiyirinakax Bibliat parltʼañ qalltapxi?

⁸ Utat ut yatiyasaxa walja yatiyirinakatakix  utanimp parltʼañaw chʼamaxa. Chiqpachansa yaqhip chiqanakanxa yatiyañax janiw faciläkiti. Yaqhip jilat kullakanakaxa, sum amuytʼasa mä jukʼa arunakampikiw parlañ qalltapxi ukat mä tratado churapxaraki ukham lurañawa jupanakatakix askixa, kunjamtï recuadron iwxtʼaski ukhama. Inas uka tratadon pʼiqiñchäwipasa jan ukax suma dibujonakas istʼkistu ukan chuymapar purchispa, ukhamatwa kunatsa visittʼasktan uk qhanañcharaksna ukat jisktʼaraksnasa. Ukhamaraki kimsa jan ukax pusi tratadonak uñachtʼayasinxa kawkiriy jupatakix sumächi uk ajllisirakispawa. Ukampisa, janiw tratadonakak lakirkañäniti janirakiw sapa utan tratadonakampiki parlañ munktanti, jan ukasti jaqinakamp parltʼasaxa Bibliatwa yatichañ muntanxa.

9. ¿Kunatsa suma wakichtʼasiñax wali wakiskirixa?

⁹ Kunjamatsay yatiychiñäni, janiw ak armañasäkiti sum wakichtʼasiñäni ukhaxa jan axsarasa ukat kusisitarakiw utat uta yatiyañäni. Mä precursor jilatax akham sataynawa: “Suma wakichtʼatäkt ukhaxa jukʼamp kusisiñ jikxatta kunattix ukarjamaw jaqinakampix parltʼañ muntxa”. Yaqha precursorax sarakiwa: “Kuna tuqitsa mä qillqatax parli uk uñtʼasaxa, taqi chuymaw jaqinakarux uka qillqatampix yatiytxa” sasa. Wakichtʼasisax kunjamsa parltʼañäni ukxa pʼiqisan amuykiptʼañax wali askïkchisa walja jilat kullakanakatakix  jachʼat parlas yatsuñaw jukʼamp askixa. Ukhamatwa yatiyatapax Jehová Diosan nayraqatapan jukʼamp askïtap uñjapxi (Col. 3:23; 2 Tim. 2:15).

10. ¿Kunjamatsa yatiyir mistsuñatak tantachäwinakax mayninakar jukʼamp yanaptʼaspa?

¹⁰ Yatiyir mistsuñataki tantachäwinakanwa kunjamsa yatiysna uka iwxtʼanak katuqaraktanxa ukhamatwa jaqinakarus sum yatichsna ukat utat ut yatiyir sarasinsa kusisiñ jikxataraksna. Examinando las Escrituras diariamente sat qillqatax yatiyir sarañ tuqit parlchi ukhaxa, liytʼasinxa mä jukʼa qhanañchasirakispawa. Ukampisa, yatiyañataki irpsür jilataxa tiempo apstʼasisax kunanakatsa uka chiqan parltʼsna jan ukax kunjam yatiyañas askïspa ukwa mä demostracionampi uñachtʼayañapa ukatsti ukarjamaw ukürux yatiyasispa. Ukhamatwa jilat kullakanakax yatiyañataki suma wakichtʼatäpxarakinixa. Irpir chuymaninakasa ukat yatiyir mistsuñataki yaqha irpsur jilatanakasa sum wakichtʼasipxani ukhaxa mayninakarus yanaptʼapxani ukat horasaparuw tukuyapxarakini (Rom. 12:8).

Istʼañax wali askiwa

11, 12. Khuyapayasiñ chuymamp istʼañäni ukhaxa jaqinakan chuymaparuw pursna. Uka tuqit parlir experiencianak arstʼma.

¹¹ Jaqi masisar Bibliat parltʼasa chuymapar puriñ munstan ukhaxa janiw aliqaki wakichtʼasiñasäkiti; jan ukasti taqi chuymaw jupanakar yanaptʼañ munañasa. Ukat sum istʼasarakiwa jupanakat llakisitassa uñachtʼaysna. Tamanak tumptʼir mä jilatax akham sataynawa: “Paciencia chuymanïña ukat sum istʼañawa suma yatiyäwinakar iyawsapxañapatakix yanaptʼi ukhamarjam lurasaw munasiñsa ukat jaqi masisat llakisitassa uñachtʼayaraksna” sasa. Khuyaptʼayasiñ chuymampi istʼañaxa jaqinakan chuymapar puriñatakiw yanaptʼistaspa, jichhax uk mä experiencian uñjañäni.

¹² Francia tuqin Saint-Étienne sat markankir, Le Progrès sat mä periodiconxa, mä warmin carta qillqanitapatwa yatiyasïna, uka warminxa kimsa phaxsin asu wawapaw jiwatayna. Wawajan jiwatapatxa pä warmiw utajar visittʼanipxitäna sasaw cartapan säna. Ukat “jankʼakiw Jehová Diosan Qhanañchirinakapjatap amuyta, ukat suma arunakampi janiw kuns yatiñ munkti sañ munayäta, ukampisa kunatsa Diosax tʼaqhisiñanak utjayaskaki uka tuqit parlir mä folleto uñjasaxa, utajar katuqtʼayätxa, ukampis yatichäwip istʼasin aynachtʼayañatakikïnwa. [...] Jehová Diosan uka Qhanañchirinakapax niya mä hora jilaw nayamp parltʼawayapxäna ukat khuyapayasiñ chuymampiw istʼapxitäna. Sarxapxäna ukhaxa, janiw sinti llakitäxayätti, ukat wasitampi kuttʼanipxañapsa munarakiyätwa” sasaw qillqatayna (Rom. 12:15). Tiempompixa, aka warmix Bibliat yatiqañ qalltxäna. Kuna tuqitsa Jehová Diosan Qhanañchirinakapax parltʼawayapxäna uk amtasiñat sipansa uka warmix kunjamsa khuyapayasiñ chuymampi istʼawayapxäna ukwa jukʼamp amtasïna.

13. Kawkha chiqanakantï yatiyktan ukhamarjamaw jaqinakampi parltʼaraksna,¿Kunjamsa uk lursna?

¹³ Jaqi masisarutï llakinakapat khuyapayasiñamp istʼapxañänixa, kuntï Diosan Apnaqäwipax jupanak layku lurkani ukxa jukʼamp sum qhanañchtʼsnaxa. Amuypachätawa suma yatiyirinakaxa sum istʼañ yatipxi (Pro. 20:5). Uka jilat kullakanakaxa khitinakarutï visittʼapki ukanakarux taqi chuymaw yanaptʼañ munapxaraki. Janiw kawkhans jakasi kuna sutinisa ukak qillqtʼapkiti, jan ukasti kunansa yanaptʼañax wakisi kunjamatsa yanaptʼapxaspa ukanaksa qillqtʼasipxarakiwa. Utanitix jan waltʼäwinakapat parltʼaspaxa, Bibliat apstʼat qillqatanakat yatxattʼawayasaw mä qhawqha urunakat uka yatiyäwimpix kuttʼapxaraki. Apóstol Pabljamarakiwa, jaqinakaru Diosan Arup parlañ laykux kunatï wakiski ukhamarjam jaqinakampi parltʼapxaraki (1 Corintios 9:19-23 liytʼasiñapawa). Ukham taqi chuyma jaqinakat llakisitasaxa chiqpach yupaychäwir mantapxañapatakiw yanaptʼi ukhamaraki ‘Diosan khupayasiñap’ uñachtʼayaraki (Luc. 1:78).

 Kusisit chuymampi yatiyasipkakiñäni

14. ¿Yatiykasax kunjamatsa Diosat yatiqasitas uñachtʼaysna?

¹⁴ Jehová Diosax askirjamaw uñjistu ukatwa jiwaspach kuns amtir lurarakistu. Taqi chʼaman Diosäkchisa janiw jupar iyawsañasatakix waytʼkistuti, jan ukasti munasiñapampiw jawsistu, ukat khitinakatï uka suma churäwinakap yuspärapxi ukanakax suma bendicionanak katuqapxaraki (Rom. 2:4). Luqtirinakapjamaxa khuyapayasir Diosasat suma yatiyäwinak yatiyañatakix wakichtʼatäñasawa (2 Cor. 5:20, 21; 6:3-6). Chiqasa, kawki chiqanakantï yatiyktan ukan kusisit chuymampiw yatiyapxañasa, uka lurañax chʼamakïspawa. ¿Kunas yanaptʼistaspa kusisit chuymampi yatiyaskakiñatakixa?

15. 1) ¿Jaqinakax jan istʼañ munapxchispa ukhaxa kunsa apostolanakax lurapxañapäna? 2) ¿Kunjamatsa khitinakatï askïki uka jaqinakaru thaqsna?

¹⁵ Maynitix yatiyatanakamar jan istʼañ munkchinixa janiw sinti llakisipxañamäkiti jan ukasti khitinakatï askïki uka jaqinakaruw thaqhapxañama sasaw Jesusax apostolanakaparux säna (Mateo 10:11-15 liytʼasiñapawa). ¿Jiwasax kunjamsa ukham lursna? Phuqañjam amtäwinak amtasa. Amuytʼañataki, mä jilataxa quri thaqhirïkaspas ukham amuyasisinxa akham sasaw sarirïna: “Jichhüruxa mä jukʼa quri jikxatapunïwa” sasa. Yaqha jilatasti akham amtäna “yatiykasaxa sapa semana mä istʼir jaqiru jikxatañ amtta ukat mä qhawqha urunak pasatatxa utapar kuttʼaña ukat yatiqañ munataparusa yanaptʼañ amtta” sasa. Yaqhip yatiyirinakax utat uta yatiyasaxa, wakisirjamächi ukhaxa, Bibliat mä jukʼa liytʼañatakiw chʼamachasipxaraki. ¿Jumax kunakxay lurirjamasta ukarjam amuytʼasisax kun lurañsa amttati?

16. ¿Kunatsa yatiyaskakiñasaxa?

¹⁶ Utat uta yatiyasaxa wali askinakwa jikxattanxa ukampisa janiw jaqinakax istʼit janicha ukatäkiti. Chiqawa, yatiyir saratasax suma chuyman jaqinakan qhispiyasipxañapatakiw yanaptʼi, ukampisa yaqha wakiskir amtanakarakiw yatiyañatakix utji. ¿Kawkïrinakasa? Yatiyasax Jehová Diosar munasitas uñachtʼaytanxa (1 Juan 5:3). Ukat jaqinakan wilapatsa janirakiw juchañchatäkañäniti (Hech. 20:26, 27). Ukhamaraki Diosan ‘taripañ horasapax purinxiwa’ sas ñanqha lurir jaqinakarus yatiyarakiñäniwa (Apo. 14:6, 7, MT). Ukampisa, taqi akanakat sipansa Diosan sutip jachʼanchasiñapatakiw suma yatiyäwinakax yatiyasiski (Sal. 113:3, NM). Ukatwa, jaqinakax istʼpansa janisa Diosan Apnaqäwipat yatiyaskakiñasaxa. Suma yatiyäwinak yatiyañ layku chʼamachtʼastan ukhaxa Jehová Diosax wali askitwa ukar uñji (Rom. 10:13-15).

17. ¿Akat mä jukʼarux kunsa jaqinakax yatipxani?

¹⁷ Jila part jaqinakaxa janisay yatiyäwisar istʼañ munapkchixa, akat mä jukʼarux janiw ukhamäxaniti (Mat. 24:37-39). Taripañ urut yatiyañapatak khitasinxa, kutkatasir israelitanakax uküruw yatipxani “mä profetan jupanak taypin utjatapa” sasaw Jehová Diosax Ezequielarux säna (Eze. 2:5). Ukhamarakiwa, kunapachatï Jehová Diosax aka ñanqha pachar taripkani ukhaxa jaqinakaxa amuyapxarakiniw Jehová Diosan Qhanañchirinakapaxa chiqpach Diosan khitanitäpxatapa ukat utat uta ukhamaraki yaqha chiqanakansa yatiyapkäna ukanakax Diosan Arunakapätap yatipxarakini. ¡Aka qhipa urunakan Diosan sutip apañasa ukat Jupan Arunakapat parlañasa jiwasanakatakixa wali askipuniwa! Ukhamasti, utat uta yatiykasaxa Diosan chʼamapampiw kuna jan waltʼäwinaksa atipapxañäni.

¿Kamsasmasa?

• ¿Kunjamatsa jan axsarayasis yatiysna?

• ¿Utat uta yatiykasax Bibliat parltʼañ qalltañatakixa kunas yanaptʼistani?

• ¿Kunjamsa jaqinakat taqi chuyma llakisitas uñachtʼaysna?

• ¿Kawkha chiqanakantï jaqinakar yatiyktan uka chiqanakan kusisit chuymampi yatiyañatakix kun lurañasas wakisispa?

[Jisktʼanaka]

[10 janan recuadropa/fotopa]

Biblia tuqit parltʼañataki yanaptʼanaka

Qalltañataki

◼ Utaniru arunttʼasaxa, mä tratado churasma ukat sarakismawa: “Visittʼiruw jutaskäyäsma, aka tratadon parlki uka chuymachtʼir yatichäwipat yatiyañataki” sasa.

◼ Jan ukasti tratado churasaxa sasmawa: “Visittʼaskäyäsmawa aka tratadon parlki uka yatichäwipat mä jukʼa jumamp amuykiptʼañataki” sasa.

Utanitix tratado katuqasinixa

◼ Akham jisktʼarakismaxa, ¿kunatsa aka tratadon pʼiqiñchäwipax parlaski? sasa.

◼ Sum istʼäta ukat kunatsa ukham amuyi uksa amuyañamarakiwa. Arstʼatapatxa yuspärañamawa ukat janiw arunakapat armasiñamäkiti.

Jukʼamp parltʼaskakiñataki

◼ Bibliat mä qhawqha tʼaqanak liytʼasax amuykiptʼarakismawa. Kunay utanirux llakisiychi ukhamarjamaw parltʼañama.

◼ Istʼañ munchi ukhaxa, Bibliat apstʼat mä qillqat churasma, wakisirjamänixa kunjamsa Bibliat yatichasi uks uñachtʼayarakismawa. Jukʼamp parltʼañatakix yaqhüruw kuttʼani sasin sañamaraki.